Espainiako Gobernuak gaur onartu asmo ditu etxebizitza dekretuak
Parlamentua deseginda, Diputazio Iraunkorrean onartu nahi ditu, gehiengoa baitu dekretu orokorra ateratzeko. Hala ere, ezingo luke alokairu kontratuak berritzearen gainekoa onetsi, EAJren kontrako botoa dela eta. Jeltzaleek aurreratu dute dekretuaren "letra txikiak" zer dakarren jakin arte ez dutela zirt edo zart egingo.
Espainiako Gobernuak etxebizitzari buruzko lege-dekretuak onartuko ditu berriro Ministroen Kontseiluak gaur egingo duen bileran.
Pedro Sanchez Espainiako gobernuburuak hauteskundeak azaroaren 29ra aurreratu ostean, Gobernuko iturriek adierazi dute dekretuak onartzeko asmoa dutela.
Onartzen badira, Parlamentuak hilabeteko epean onartu beharko dtu, eta desegingo denez, Diputazio Iraunkorrak izango du horretarako ahalmena.
Organo horrek Kongresuko osoko bilkuraren ordezkoaren rola betetzen du, funtzio jakin eta berezi batzuk ez daitezen arretarik gabe geratu ganbera desegin denean edo haren agintaldia amaitu denean.
Kongresuko osoko bilkuran ez bezala, Gobernuak gehiengo nahikoa izango luke Diputazio Iraunkorrean aurreko astean bertan behera geratu ziren bi dekretuetako bat gutxienez onartzeko, Juntsen botoa ez litzatekeelako beharrezkoa izango.
68 diputatuk osatzen dute Diputazio Iraunkorra, gehi Francina Armengol Kongresuaren presidenteak: 27, PPk; 24, PSOEk (Armengolekin 25 dira); 6, Voxek; 6, Sumarrek, eta bana, ERCk, EAJk, Juntsek, Bilduk eta Mistoak (Podemos).
Banaketa horrekin, taldeen botoak mantenduko balira, etxebizitzaren arloko neurri gehienak jasotzen zituen dekretua aurrera atera ahal izango litzateke.
Orduan babesa eman zuten alderdien botoak 35 izango lirateke, eta 34, PP, Vox eta Juntsenak.
Bigarren dekretuaren kasuan, hau da, alokairuak automatikoki berrtzea aurreikusten duenarenean, EAJk berriro kontra bozkatu balu, ez litzateke aurrera aterako.
Ministroen Bilera amaitzean, 12:30ak aldera, Pedro Sanchezek agerraldia egingo du Moncloan.
EAJk argitu du Espainiako Gobernuak babesa eskatu diola dekretua onartzeko
EAJko iturriek baieztatu dute Espainiako Gobernuaren dei bat jaso duela, etxebizitza dekretua babes dezala eskatzeko. Aitor Estebanen alderdiak, baina, ez du bere botoa erabakiko testuaren "letra txikiak" zer dakarren jakin arte.
Alderdiak nabarmendu du Espainiako Gobernuak aurkeztutako testu berriak negoziaziatzeko orduan kontuan hartuko duela "pertsona zaurgarriak eta jabe txikiak babesten diren ala ez".
Dekretuek aldaketa batzuk izango dituzte
Ernest Urtasun Kultura ministroak azaldu du Ministroen Kontseiluak asteartean onartuko dituen errege-dekretuek aldaketak izango dituztela Kongresuak iragan ostiralean atzera botatakoekin alderatuta, baina ziurtatu du ez dutela "inolako babes-neurririk" murriztuko.
"Dekretuak ezin dira aurrekoan aurkeztutako berdinak izan, baina berma dezaket aldaketa horiek ez dutela inolaz ere adostutako babes neurrietako bakar bat ere murriztuko, bat ere ez", esan du.
"Babesa areagotuko duen hobekuntzarik baldin baldin badago, bihar arteko tartea daukagu aztertzeko", gaineratu du.
Frente Zabala deituriko koalizio berria osatuko duten alderdien prentsaurrekoan egin ditu adierazpenak Kultura ministroak.