Alarde zatitua beste urte batez Irunen, San Martzial egunarekin batera

Ez da aldaketarik egongo protokoloan Irungo Alardearen aurtengo edizioan, eta Alarde Tradizionalak 07:40ean ekin dio ibilbideari, Urdanibia plazatik abiatuta, eta 10:20ean izan da Alarde Parekidearen txanda. 11:30ak aldera, hiru eskopeta tirok bigarren desfilearen amaiera markatu dute, eta horrek eman die amaiera bi alardeei, oso giro bero, baina lasaian.

Beroa ohiko desfilearen hasieratik nabarmendu da, termometroak 20 gradutik gora markatzen zuten jada. Goizak aurrera egin ahala, tenperaturak ere gora egiten jarraitu du eta, desfile mistoa hasi denean, 30 gradutik gertu egon da.

Tokiko hedabideen arabera, 6.800 pertsonak baino gehiagok hartu dute parte alarde tradizionalean, jendetsuena izaten jarraitzen du hortaz. Hala ere, desfile mistoa, non emakumeek ere eskopetero gisa desfilatzen duten, hazi egin da aurten, 13 konpainiak hartu dute parte. Iaz berriz, 12 konpainia izan ziren, eta 2.200 pertsona inguru bildu ziren.

Zatiketa horren harira, Miren Elgarresta Emakunderen zuzendariak esan du garrantzitsua dela "azken urteotan atzematen ari diren aurrerapausoak egonkortzea". "Elkarrizketaren, akordioaren eta lankidetzaren bidez berdintasunaren bidean pausoak emateko aukera" aprobetxatzeko deia egin du.

Elgarrestak horixe adierazi du Irun gaur bizitzen ari den egun handia dela eta, tradizionala eta gizonezkoak eta emakumezkoak soldadu gisa onartzen dituen parekidea banatuta aterako baitira.

Elgarresta eta Noemi Ostolaza Emakunderen idazkari nagusia Irunen daude alarde parekideari babesa emateko, eta laguntza eskaintzeko, emakumeek gizonen legez parte hartzeko aukera izan dezaten "ekitaldi publiko, herriko eta parte-hartzaile honetan".

Cristina Kaborda Irungo alkateari eta udalbatza osoari ere laguntza eskaini die, "etorkizunean jaiak guztiz parekideak izan daitezen" bideak irekitzeko.

Desfileak bateratzeko aukeraz galdetzean erantzun du “Irunen alardea bizitzeko bi modu daudela, biak legalitatetik”, eta “hori dela ekainaren 30ean irundarrek alardea ospatzeko modua, bizi nahi duten lekutik”.

Ines Ibañez de Maeztu jarduneko Arartekoa ere bertan izan da, “emakumeek Alardean duten parte hartzeko eskubidea” babesteko, eta “emakumeek arlo guztietan, baita jaietan ere, berdintasunerako eskubidea” dutela aldarrikatzeko.

Azaldu duenez, emakumeek “berdintasunerako eskubide ukaezina dute, baita protagonistak izatekoa ere, berdintasunez, eta arlo ekonomiko, sozial, kultural eta politikoan, salbuespenik gabe”.

“Baita tokian tokiko jaietan ere, ospakizunetako tradizioak gorabehera”, azpimarratu du.