Lanbideren bulegoek gaur ekin diote berriro arreta presentzialari
Gaur, astelehena, Lanbide Euskal Enplegu Zerbitzuaren bulegoek berriro ekin diote aurrez aurreko arreta zerbitzuari. Horretarako, Lanbideko erabiltzaile eta langileen osasuna babesten duten neurriak sustatu dira.
Beatriz Artolazabal Eusko Jaurlaritzako Enpleguko eta Gizarte Politiketako sailburuak eta Borja Belandia Lanbideko zuzendari nagusiak Salburuan (Gasteiz) dagoen bulegoa bisitatu dute gaur goizean. Bertan, osasun-segurtasuneko neurri guztiak ezarri dira dagoeneko, eta neurri horiek Lanbideren 42 bulegoen sarera zabalduko dira: metakrilatozko manparak, distantziak gordetzeko markak eta edukiera mugatua adierazteko kartelak, bai eta gel higienizatzaileak eta/edo paperezko zapi garbitzaileak ere, besteak beste. Modu berean, ohiko garbiketa sendotuko da.
Artolazabal sailburuak azaldu duenez, "berriro irekitzeko, osasun-segurtasuneko gomendio eta irizpideak beteko dira, eta pertsona guztiak babestuko dira". Hori dela eta, bulegoetan pilaketarik ez egoteko, aurretiko hitzordu sistema sustatuko da. Aldi berean, komunikazio telematikoa sustatzen eta bultzatzen jarraituko da, etxetik egin daitezkeen izapide guztiei bide emateko. "Helburua da bulegoetan ahalik eta jende-kopuru txikiena batzea eta geletan itxaroteko denborak murriztea", adierazi du.
Nahi dutenek aurretiko hitzordua eskatu ahalko dute, Lanbideren webgunearen bidez (www.lanbide.euskadi.eus) edo erakundeak herritarrak artatzeko dituen telefonoen bidez: 945 160 600 edota 630 305 452. Enpleguko eta Gizarte Politiketako sailburuaren hitzetan, "Lanbidek aurretiko hitzorduen egutegia diseinatu du, eta, horretarako, denborak banatu ditu esku-hartze bakoitzerako, bulegoetako itxarongelan tamainaren arabera edukiera mugatu bakoitzak onartzen duen pertsona-kopurua baino handiagoa ez batzeko".
Gainera, sailburuak nabarmendu du Qmatic Mobile sistema ezarri dela hitzordura iritsi izana egiaztatzeko itxarongelan dagoen pantaila ukitu gabe. Hitzordua eskatutakoan, QR kodea bidaltzen zaio erabiltzaileari. Itxarongelako pantailak QR kodearen irakurgailua duenez, erabiltzailea bulegora iritsitakoan, mugikorreko kodea irakurgailura hurbiltzean txartel birtuala sortuko da, eta horretarako ez da ezer ukitu beharko. "Sistema horrek hitzordua aktibatuko du, itxarongelako pantailan agertuko da, eta mahaiaren deia ere mugikorrera bidaliko da; horrela, jendeak bulegotik kanpo itxaron ahalko du bere txanda, beharrezkoa bada".
Babes-neurri kolektiboak direla eta, bulegoetara doazen erabiltzaileek maskara eraman beharko dute, ezinbestean; bakarrik joatea lehenetsiko da, posible denean; arreta jaso aurretik eskuak paperezko zapiz edo gel higienizatzailez garbitzeko eskainiko zaie, eta dokumentazio guztia aldean eramatea gomendatuko zaie, bereziki NANa eta/edo pasaportea. Era berean, beren datuak jaso dituzten inprimakiak aurkeztu behar badituzte, inprimaki horiek Lanbideren webgunetik deskargatzeko eskatuko zaie eta beteta eraman ditzatela, ahal den neurrian, erabiltzaile bakoitzari arreta emateko denborak arintzeko.
Komunikazio telematikoa sendotzea
Lanbide arreta presentzialera bueltatuko da, baina, halaber, komunikazio telematikoa sustatzen eta bultzatzen jarraituko dute eta, horretarako, bere web-kanalean eta harremanetarako telefonoetan bulego batera joateko beharrik gabe egin daitezkeen izapide guztiak jarriko ditu: Lanbiden izena ematea, NireLanbidenet-era sartzeko pasahitzak eskatzea, LEABD (enplegua eskatzeko txartela) dokumentua eskatzea, berriztatze-dataren informazioa eskatzea, ziurtagiriak bidaltzea (izen-ematearena, izen-ematearen aldiena, urteko kobrantzena, espedientearen egungo egoerarena), prestakuntza-ikastaro bateko aurretiko izen-ematea edo enplegu-eskaintzetako izen-ematea.
Aurrerapauso hori, nolanahi ere, Lanbiderentzat menderaezinak diren bi irizpideri eutsiz ematen da: batetik, hala behar duten pertsona guztiek Lanbideren arreta jasotzen jarraituko dutela bermatzea eta, bestetik, sarbide unibertsala ziurtatzea, baita baliabide telematikoetarako sarbidea ere. Horretarako, Lanbidek akordioa du KZ Gunearekin, eta, horren bidez, pertsona batzuek oztopo izan dezaketen eten digitala gainditu ahalko da. Akordio horri esker, hala behar duten pertsona guztiek mekanismo ez-presentzial horietara jo ahalko dute KZ Guneko bulegoen bidez.
Zure interesekoa izan daiteke
Gipuzkoako Auzitegiak absolbitu egin ditu haurra hiltzen saiatzeagatik akusatu zituzten gurasoak
Gipuzkoako Probintzia Auzitegiak absolbitu egin ditu gurasoak, haurra hiltzen saiatzeagatik akusatu ostean; ondorioztatu du ezin izan dela frogatu, neskatoaren lesioek jatorri traumatikoa zutenik edo kolpe baten ondorio zirenik.
3I/ATLAS kometa Lurrera ahalik eta gehien hurbildu da, eta ezustekorik gabe urruntzen ari da
Zientzialari errusiarrek baztertu egin dituzte, berriro ere, estralurtarren ustezko ontzi bat zela zioten teoriak.
Etxebizitzak gero eta gehiago kezkatzen du euskal gizartea, eta Osakidetzarekiko eta Ertzaintzarekiko konfiantza hobetzen ari da
Etxebizitza eskuratzea da euskal gizartearen arazo nagusia, azken Deustobarometroaren arabera; bitartean, osasunaren, segurtasunaren eta migrazioaren inguruko kezkak behera egin du, eta zerbitzu publikoekiko konfiantza berreskuratu da.
Guardia Zibilak erietxera eraman ditu Beloradotik joandakoekin Urduñan bizi ziren mojetako bost, osasun-baldintza kaxkarretan zeudelakoan
Ostegun honetan Santa Klarako monastegitik 87 eta 101 urte arteko bost moja atera dituzte eta Basurtuko erietxera eraman dituzte azterketa egitera, epailearen aginduz. Guardia Zibilak jakitera eman duenez, emakumeak osasun-baldintza txarretan bizi zirela egiaztatu ahala izan dute. Adierazpen horiek gezurtatzeko helburuz, etxeko mojetako batek sareetan zabaldu ditu eraikin barruko irudiak.
Fiskalak erretiratu egin ditu Zestoako akusatu nagusiaren aurkako akusazio guztiak, eta gainerako bostentzat isuna eskatu du
Salatzailearen bikotekide ohiaren deklarazioa entzun ostean, fiskalak frogatutzat jo du gizonarekiko beldur gaindiezina izan zuela eta zigor eskaerak aldatu ditu. Absoluzioa eskatu du akusatu nagusiarentzat eta gainerakoentzat, berriz, espetxe zigorra beharrean isunak eskatu ditu hertsatze delituagatik.
Moto gidari bat zauritu da Donostian, GI-20an hainbat ibilgailuren artean izandako istripuan
08:00ak aurretik izan da ezbeharra eta errepidea itxita gelditu da momentuan, auto ilara luzeak eraginez. Geroxeago zabaldu ahal izan dute erreietako bat.
Gabonak, inoiz baino garestiago: trikimailuak eta alternatibak, gure menua merkatzeko
Arkumea, bisigua, turroia, ostrak, anana... Gabonetan pairatzen dugun prezioen gorakadaren ondorioz, produktu batzuk gure mahain izatea ia ezinezkoa izaten da. Baina ez etsi, alternatiba goxoak egon badaude gure Gabonetako menua hain garestia ez izateko.
Elkartasun uholde bati esker, EITB Maratoiak 361.665 euro batu ditu zahartze osasuntsuaren aldeko ikerketarako
Beste urte batez, ehunka pertsonak eta erakundek euren onena eman dute zahartze osasungarria ikertzeko dirua biltzeko. Guztira, egun osoan zehar, EITB Maratoiak 361.665 euro batzea lortu du, eta kopuru horrek hazten jarraituko du datozen egunetako dohaintzei esker.
BiomaGUNEk ohartarazi du aspartamoa "kaltegarria" izan daitekeela bihotzerako eta garunerako
Aspartamoa pisua galtzen lagun dezakeen edulkoratzaile artifiziala da, baina azukrea baino 200 aldiz gozoagoa da.
Hego Euskal Herrian premiazko txertaketa baimendu dezala eskatu dio Espainiako Gobernuak Europar Batzordeari, dermatosi nodularrari aurre egiteko
Frantziako estatuarekiko mugatik hurbil dauden eskualdeetan txertatu nahi ditu Espainiako Gobernuak abelburu guztiak, hau da, Euskadin, Nafarroan eta Aragoin. Izan ere, azken orduetan foku gehiago agertu dira Frantziako Estatuan, mugatik hurbil, gainera. Neurri horren helburua da gaixotasunaren hedapena eten eta gainerako erkidegoetara ez iristea.