Jendetza EAEko hondartzetan, kontrolekin, 2 fasearen lehenengo asteburuan

Deseskalatze prozesuaren 2 fasearen lehenengo asteburu honi udako giroa egokitu zaio, eguzkitsua eta tenperatura altuekin. Horren ondorioz, herritar ugari bildu dira larunbat honetan EAEko hondartzetan.

Dena dela, koronabirusaren kutsatzeak saihesteko asmoz, arauen betetzea kontrolatzen ibili dira Ertzaintzako eta Udaltzaingoko agenteak. Hortaz, bi metroko distantzia gordetzen ez zuten herritarrei arreta deitu diete, eta baita eguzkia hartzera hondartzan etzan direnei ere, Udalak hori debekatu duen udalerritan, hain zuzen ere.

Gipuzkoa

Gipuzkoako hondartza gehienetan, ordea, eguzkia hartzeko etzan gaitezke. Hala ere, Orioko eta Getariako Udalek iragarri dutenez, larunbat honetatik aurrera euren hondartzak "dinamikoak" izango dira, hau da, bakarrik izango dira paseatzeko, bainua hartzeko eta kirola egiteko.

Hondarribian, porturako sarrera itxi behar izan du Ertzaintzak, jendetza bildu delako bertan. Deban, egunean zehar bozgorailu bidez gogoratu dituzte jarraitu beharreko arauak.

Bestalde, Kontxako hondartzan, Donostian, jende asko egon da, eguerdi aldera bereziki, baina ez da izan aurreko egunetako jende pilaketarik, eta oro har herritarrek bi metroko distantzia errespetatu dute.

Bizkaia

Hondartzetako erabilera murritzagoa izan da Bizkaian, izan ere, Udal gehienek etzanda egoteko aukera debekatu dute (Muskizen, Zierbenan eta Bakion, esaterako). Hala eta guztiz ere, hainbat pertsona etzan dira, eta udaltzainek arreta deitu diete. Bakion, gainera, aire-zaintza ere egin du Ertzaintzak helikoptero bidez, eta itsasoan txalupa batekin.

Araba

Landa eta Garaioko barne hondartzetan, Zadorrako urtegietan, "lasaitasuna" izan da nagusi, zenbait erabiltzailek adierazi duenez. Ertzaintza eta Miñoiak edukiera eta sarrerak kontrolatzen ibili dira. Landan, adibidez, eguerdirako aparleku guztia beteta zegoen, eta Garraion, % 50eko edukierarekin, ordu berean bete da. Hortaz, Ertzaintzak ez du auto gehiago pasatzen utzi.

Erantzukizunez jokatzeko

"COVID-19a ez dago oporretan", ohartarazi du Nekane Murga Osasun sailburuak. Horregatik, herritarrei erantzukizuna eskatu die berriro, hondartzetan zein garraio publikoan pilaketak saihesteko eta balizko agerraldiak eragozteko; izan ere, Euskadi "hasierako kutxatilara" itzuli daiteke.

Azken egunetan, eguraldi onarekin, hondartzetan, pasealekuetan eta metroan ikusi diren irudiak eta pilaketak ez dira errepikatu behar, Murgak prentsaurrekoan azpimarratu duenez. Hondartzen erabilera "dinamikoa" egiteko gomendioa eman zuen Osasun Sailak, gogorarazi duenez.

"Taldean, toallak, edariak, kremak partekatuz eguzkipean ez etzan. Hori da beti saihestu behar duguna", eskatu du sailburuak.