Hizkera inklusiboa erabiltzeak ekidin egiten du munduari maskulinotik begiratzea, ikerketa baten arabera

Hizkera inklusiboa erabiltzeak jokabidean nola eragiten duen aztertu du Emakunderen beka jaso duen ikerketa batek, eta, besteak beste, ondorioztatu du ekidin egiten duela munduari maskulinotik soilik begiratzea.

Laura Vela-Plo, Marina Ortega-Andres eta Marta De Pedis ikertzaileek egindako "Hizkuntza, aldaketa sozialerako tresna: Hizkuntza inklusiboaren erabileraren ondorio batzuen azterketa teorikoa eta enpirikoa" ikerketa aurkeztu du gaur Emakundek, Gasteizen.

Arlo horretan euskaraz zein gaztelaniaz dauden hutsune enpiriko eta teorikoak bete nahi izan dituzte ikertzaileek; izan ere, gai horri buruzko ikerketa gehienak ingelesa edo alemana oinarri hartuta egin dira.

Halaber, euskarari dagokionez helburu zehatz bat jarri dute mahai gainean. Euskara genero gramatikalik gabeko hizkuntza denez, "hizkuntzaren erabilera sexistarik sortzen ez duela uste da, eta hori ez da guztiz egia", adierazi dute egileek.

Lanak hiru ikasketa esperimental biltzen ditu —horietako bi, gaztelaniaz—, EHUko ikasleekin eta gainerako herritarrekin egindakoa, eta bestea euskaraz, euskal unibertsitateko ikasleekin soilik. Lehenengo bien emaitzetatik ondoriozta daitekeenez, hizkera inklusiboa erabiltzeak ekidin egiten du munduari maskulinotik soilik begiratzea; aitzitik, maskulino generikoa erabiltzean, areagotu egiten da horretarako joera.

Hala ere, erresistentzia ugari hauteman dituzte bi taldeetan: hizkuntza inklusiboa ez dela erabilerraza, hizkera baino larriagoak diren beste arazo batzuk daudela... Aldi berean, inkestatutako batek ere ez du uste hizkera inklusiboko estrategiak erabiltzea alferrikakoa edo barregarria denik.

Euskarazko ikerketan, pertsona gehienek egoki jo dituzte emakumeak esplizituki aipatzen dituen hizkera inklusiboko estrategiak ibiltzea, nahiz eta onartzen duten ez dutela ezagutzen euskara modu inklusiboagoan erabiltzeko modurik.

Ikertzaileek, halaber, argi utzi dute hizkera inklusiboa erabiltzea baztertzeko zabaldu diren "aitzakiak" baliogabeak direla, hizkuntzaren ekonomia, anbiguotasun faltsua eta genero gramatikal eta soziala nahastea, besteak beste.