OMEk baieztatu egin du bi hantabirus kasu izan direla gurutzaontzian, eta zazpi kasu aztertzen ari dira

Osasunaren Mundu Erakundeak (OME) Cabo Verdeko kostaldean atxikita dagoen Hondius ontziari lotutako hantabirusaren bi kasu baieztatu ditu, Oceanwide Expeditions enpresak jakinarazi duenez. Guztira, zazpi dira kutsatutakoak, OMEk esan duenez.

Gainera, arnasketa-sintomak dituzten bi tripulatzaile (batek infekzio arina dauka, eta besteak, akutua) eta maiatzaren 2an hildako bidaiariarekin lotutako pertsona bat ebakuatu egin dute. "Orain arte, ez da sintomarik duen beste inor identifikatu", ohartarazi dute ohar batean. Hala, datozen orduetan bi gaixo (Britainia Handiko eta Herbeheretako nazionalitatea dute) lekualdatzea aurreikusi dute.

Gainerako bidaiariak eta tripulatzaileak ontzian egongo dira lehorreratzeko portu bat zehaztu eta horretarako baimena izan arte (Las Palmas eta Tenerife daude aukeren artean). "Gurutzaontzian giroa lasaia da, bidaiariak, oro har, lasai daude", adierazi du Oceanwide Expeditionsek, eta enpresak esan du "bidaiariei informazio argia eta lasaitasuna emateko lanean dabil, baita lehorreratzea eta kontrol medikua arintzeko ere".

Apirilaren 11n bidaiari bat hil zen itsas bidaian, baina ezin izan zen zehaztu heriotzaren arrazoia. Haren gorpua apirilaren 24an lehorreratu zen Santa Elenan, emazteak lagunduta, aberriratzeko. Handik egun batzuetara, apirilaren 27an, ontzi-enpresari jakinarazi zioten emakumea gaixotu egin zela itzulerako bidaian, eta hil egin zela. Maiatzaren 4an, berriz, hantabirusaren aldaera bat zela baieztatu zen. Bi hildakoak Herbehereetakoak ziren.

Apirilaren 27an bertan, bidaiari britainiar bat larri gaixotu zen eta Hegoafrikara eraman zuten. Johannesburgon dago, ZIUan, egoera kritikoan baina egonkor, hantabirusaren aldaera batek jota dago. Maiatzaren 2an hirugarren bidaiari bat hil zen, alemaniarra, baina oraindik ez da zehaztu zergatik hil zen.

Gurutzaontzitik kanpo

Gainera, OMEk uste du gaixo eta hildakoak gurutzaontzitik kanpo infektatu zirela. "Gure hipotesia da, kasuen kronologia kontuan hartuta — ditugun sei edo zazpi kasu susmagarriak, hasierako pazientea, lehen kasua eta haren emaztea aintzat hartuta—, Argentinan ontziratu zirela eta han egiten ari ziren jardueraren batean kutsatu zirela", adierazi du Maria Van Kerkhove epidemiak eta pandemiak prebenitzeko eta prestatzeko OMEren zuzendariak.

Agerraldia izan den bidaiak espedizio-bidaia bat eskaintzen zuen, eta parte-hartzaileetako batzuk hegaztiak behatzen eta basa-faunarekin lotutako beste jarduera batzuetan aritu ziren.

Beraz, OMEk darabilen hipotesiaren arabera, infekzioa lehorrean gertatu zen, eta ondoren infektatuak gainerako bidaiariekin elkartu ziren ontzian.

14 espainiar ontzian

Espainiako Osasun Ministerioak astelehen honetan baieztatu duenez, gurutzaontzian 14 espainiar daude, 13 bidaiari eta tripulazioko kide bat (Katalunian bizi dira bost bidaiari). Espainiako Ministerioak lankidetza estuan dihardu OMErekin, Herbehereetako eta Erresuma Batuko agintariekin koordinatuta.

Itsasontzian 23 nazionalitatetako 149 lagun (88, bidaiariak) zeuden. Ushuaiatik (Argentina) abiatu ziren martxoaren 20an Cabo Verderantz, Hegoafrikan geldialdia eginda, eta bidaia maiatzaren 4an amaitzea aurreikusita zuen.