Zer da hantabirusa, karraskariek transmititzen duten eta gaixotasun larriak eragin ditzakeen birusa?

Hantabirusa karraskariek transmititzen duten birus multzo bat da, gaixotasun larriak eragin ditzake. Ez da intsektuen bidez kutsatzen, gaitza duten animalien gernua, gorozkiak zein listua ukituz eta partikula kutsatuak arnastuz transmitizen da.

Birus zoonotiko horrek arnasbide eta giltzurrunetako koadro larriak sor ditzake, eta hasierako sintomak gripearen antzekoak izan ohi dira: sukarra, giharretako mina eta nekea, besteak beste. Gizakion artean kutsatzea oso arraroa bada ere, infekzioak bilakaera larria izan dezake.

Hantabirusaren inguruan jakin beharrekoak

Zer da hantabirusa?

Bunyaviridae familiako hogei bat birusek osatzen dituzte hantabirusak, baina familia horretako beste birus mota batzuek ez bezala, ez dira intsektuen bidez kutsatzen, infektatutako karraskarien bitartez baizik.

Birus zoonotiko bat da, hau da, gizakiak kutsa daitezke, animalien bidez. Gaixotasun larriak eragin ditzake. Heriotza tasa % 5 eta % 15 bitartekoa da, birus motaren arabera.

Birusaren familia bi talde handitan banatzen da, jatorri geografikoaren arabera: Europa eta Asiakoa, alde batetik; eta Amerikakoa, bestetik.

Nola kutsatzen da hantabirusa? 

Kutsatutako karraskarien gernua, gorozkiak zein listua ukituta kutsa daiteke, baita hozkaden bidez ere, nahiz eta zailagoa izan.

Animalia horiek birusaren gordailu naturala dira.

Birusa hartzeko bide ohikoenen artean dago aerosolak edo kutsatutako hautsa inhalatzea.

Karraskariek, berriz, haginkaden edo atzaparkaden bitartez kutsatzen diote elkarri birusa.

Pertsonen artean, bestalde, ez da batere ohikoa birusa kutsatzea. Halere, gerta daiteke eta gaixotasuna larria izan daiteke. Askok asteak eta hilabeteak behar dituzte osatzeko.

Zer sintoma ematen ditu eta zein da pronostikoa?

Gizakietan, Europa eta Asiatik iritsitako hantabirusek sukar hemorragikoa eta giltzurrunetako sindromea eragin ohi dute. Inkubazioak 2-3 aste irauten du.

Amerikatik heldutako birusak, ordea, biriketako sindromea eragiten du. Eboluzioa oso azkarra izaten da, eta denbora gutxian arnas gutxiegitasuna eragin dezake.

Gainera, bi gaixotasunak batera ager daitezke. Horrek esan nahi du aldi berean hainbat organo kaltetu ditzakeela.

Gizakietan, gaixotasuna neumoniarekin edo beste patologia batzurekin nahasteko aukera ere badago.

Hasiera bateko sintomen artean sukarra, buruko mina, giharretako mina, goragalea eta nekea ager daitezke. Alegia, gripearekin nahas daiteke.

72 ordu lehenago kutsatu den pertsona bati hantabirusa diagnostikatzea oso zaila da. Horregatik, beharrezkoa da sintomak hasi eta 72 ordura analitika errepikatzea.

Zein dira prebentzio neurri ohikoenak?

Etxeak eta biltegiak ondo ixtea gomendatzen dute, karraskariak sar ez daitezen. Komeni da, halaber, zaborrik ez pilatzea.

Era berean, karraskarien gorozkiekin zikindutako tokiak ongi garbitzea aholkatzen dute, leku horiek ondo aireztatzea, eta garbitzeko orduan eskularruak, betaurrekoak eta maskarak erabiltzea.

Bestalde, ez da komeni urik gabe erratza pasatzea. Hautsa kentzeko detergenteak edota produktu desinfektatzaileak erabili behar dira, bai eta lanbas eta trapu bustiak ere.

Ez du tratamenturik ezta txertorik ere

Gaur egun ez dago hantabirusak eragindako infekzioentzako tratamendu jakin bat. Horregatik, ezinbestekoa da diagnostiko goiztiarra eta ospitalera sintomak azaldu bezain pronto joatea, ZIUn sartzeko eta arnasketa arazo larriagoak izateko aukera txikiagoa izan dadin.