Hantabirusak kutsatutako gurutzaontziko hiru gaixoak Herbehereetara ebakuatuko dituzte

Hantabirus agerraldi batek jotako gurutzaontzia hiru pertsona Herbehereetara ebakuatzeko prestakizunetan ari da, premiazko arreta medikoa behar baitute. Operazioa kaltetutako agintariekin koordinatuta egiten ari da, enpresak eta Herbehereetako Kanpo Arazoetarako Ministerioak ohar baten bidez jakinarazi dutenez.

"Kutsatutako hiru pertsonak, tartean Herbehereetako herritar bat, Herbehereetara eramaten ari dira, eta bertan beharrezko tratamendu medikoa jasoko dute", jakinarazi du Ministerioak. Gainera, gurutzaontzia kudeatzen duen enpresari ebakuatzen lagunduko diotela nabarmendu du.

Gaixoen ebakuazioa Cabo Verdeko agintariekin koordinatuta egiten ari da (ontzia uharte horien kostaldearen parean dago), baita Herbehereetako Osasun Publikoko Institutu Nazionalarekin eta bidaiarien jatorrizko herrialdeetako osasun-erakundeekin ere.

NOS Herbehereetako irrati-telebista publikoaren arabera, hiru gaixoak "larri baina egonkor" daude.

Gurutzaontzia kudeatzen duen konpainiak jakitera eman duenez, orain arte ez da kasu sintomatiko gehiagorik identifikatu ontzian, aurrekoez gain. Itsasontziak Cabo Verdeko uretan jarraitzen du, agintariekin hurrengo urratsak adosteko hizketan, "balizko lehorreratze bat" eta jarraitu beharreko ibilbidea barne.

Ildo horretan, Espainiako Osasun Ministerioak berretsi du kasu sintomatikoak eta arrisku handiko kontaktuak Cabo Verden dauden bitartean ebakuatzen badira, ez dela beharrezkoa izango Kanaria Uharteetan geldialdia egitea, bidaian zehar kasu berriren bat agertu ezean.

14 espainiar itsasontzian

Gurutzaontzia Argentinako Ushuaiako portutik atera zen eta Cabo Verderantz zihoan. Guztira 147 pertsona doaz ontzian (88 bidaiari eta 59 tripulatzaile). Horietatik 14 espainiarrak dira (13 bidaiari eta tripulatzaile bat): bat galiziarra da, eta beste bost Katalunian bizi dira.

Galiziako bizilagunaren kasuan, Galiziako Osasun kontseilaritzak ziurtatu du ez duela sintomarik.