'Agur Jaunak' doinuarekin agurtu dute Carlos Garaikoetxea lehendakaria Ajuria Enean

Gaur Iruñeko San Alberto beilatokian egon ondoren, bihar Ajuria Enean jarriko dute Carlos Garaikoetxearen hil kapera, 10:00etatik 14:00etara. Aurretik, Imanol Pradales lehendakariak harrera egingo dio hilkutxari eta familiar jauregiaren atarian bertan.

Arratsaldean, hilkutxa Iruñeko Hilerrira eramango dute, eta han, etxekoek bakarrik agurtuko dute. Azkenik, hileta elizkizuna 19:30ean egingo da Iruñeko San Frantzisko parrokian. 

Eusko Legebiltzarrak minutu bateko isilunea egingo du, Carlos Garaikoetxea lehendakariaren omenez, datorren osteguneko osoko bilkuran.

Lehendakari ez ezik, legebiltzarkide ere izan zen 2001. urtera arte. 

Javier Remirez Nafarroako Gobernuko presidenteordeak jakinarazi duenez, Maria Chivite presidenteak bihar (19:30) Iruñeko San Frantzisko parrokian egingo den hileta elizkizunean parte hartuko du.

Gaur ez da Iruñeko beilatokira joango, agenda arrazoiak tarteko, baina bihar hiletan parte hartuko du.

Hitz hauekin amaitu du Imanol Pradales lehendakariak adierazpen instituzionala: 

"Eskerrik asko zure herriari, Euskal Herriari, zure onena emateagatik.

Eskerrik asko sinesten zenuena defenditzeagatik.

Eskerrik asko bidea erakusteagatik.

Izan zinelako gara.

Agur eta ohore, Carlos Garaikoetxea lehendakaria!"

"Euskadik gure autogobernuaren arkitekto nagusia galdu zuen atzo", azpimarratu du Imanol Pradales lehendakariak. 

10:30ean zabaldu dute Garaikoetxea lehendakariaren hil-kapera, Iruñeko San Alberto beilatokian eta 21:00ak arte egongo da zabalik.

Carlos Garaikoetxea lehendakariaren familiari doluminak adierazi dizkio Nafarroako Parlamentuak. Izan ere, Eusko Jaurlaritzako lehendakari izan aurretik Nafarroako parlamentari izan zen urtebetez, 1979tik 1980ra. 

Garaikoetxea lehendakariaren hil-kapera, Iruñean jarriko dute, San Alberto beilatokian, 10:00etatik 21:00etara. Irekiera 09:00etatik 10:00etara atzeratzea erabaki du familiak, San Alberto beilatokiko arduradunek Euskadi Irratiari jakinarazi dionez.

EAJren Euzkadi Buru Batzarrak (EBB) bere atsekabea adierazi du, Carlos Garaikoetxea lehendakariaren heriotza eta, eta jeltzale guztien izenean, doluminak helarazi dizkie familiari.

Arratsaldean zabaldutako oharrean, EBBk nabarmendu du Garaikoetxeak gidatu zuen Eusko Jaurlaritzak ezarri zituela "gure erakundeen eta euskal autogobernuaren oinarriak, gaur egun, ongizatearen sinonimo direnak". 

Imanol Pradales lehendakariak Carlos Garaikoetxearen papera nabarmendu du, giza eskubideen eta justizia sozialaren defendatzaile eta "garai zailetan ezina ekinez gainditu zuen lider" gisa.

"Nafarra. Euskalduna eta abertzalea. Demokrata”. Pradalesek gogorarazi du Garaikotexea "euskal autogobernuaren eta ongizatearen arkitektoa" izan zela. Hala adierazi du lehendakariak mezu batean, eta pragmatikoa, ameslaria, zentzuduna, ausarta, karismatikoa eta talde-gizona dela azpimarratu du.

Gaur iluntzean, Teleberri albistegiaren ondoren, 'Garaikoetxea, eraiki gabeko herrialde' dokumentala emitituko dute ETB2 katean. Bertan,  Carlos Garaikoetxea lehendakariak berak eta bere gobernukide nabarmenek egindako kontakizunaren bidez gogoratuko dute nola jarri ziren martxan erakundeak, nola garatu zen Gernikako Estatutua eta nola iritsi ziren lehen eskumenak. Garaikoetxearen argituratu gabeko elkarrizketa da. Ikusi, lotura honetan. 

Patxi Lopez lehendakariak eta PSOEren bozeramaileak Kongresuan adierazi du "errespetu instituzionalaren sinonimo" zela Carlos Garaikoetxea. Haren "aholkuak" jaso zituela azaldu du, eta beti "baliagarri" izan zaizkiola. "Aholku egokiak eta eskuzabalak", zehaztu du. 

Eba Blanco Eusko Alkartasuneko idazkari nagusiak bere doluminak agertu dizkio Carlos Garaikoetxearen familiari eta hurbilekoei, eta harek egindako ekarpena goratu du. "Doluminak Lehendakariaren familiari eta hurbilekoei, bere heriotza dela eta. Eusko Alkartasunarentzat suposatzen duen galera izugarriaren aurrean, alderdiari eta Euskal Herriari eman dion guztiagatik gure esker onak baino ezin dizkiogu erakutsi Garaikoetxeari, betiko lehendakaria", idatzi du sare sozialetan. 

Maria Chivite Nafarroako Foru Erkidegoko presidenteak bere atsekabea agertu du, Carlos Garaikoetxearen heriotzagatik, eta hark Nafarroarekin izan duen "konpromiso politikoa" azpimarratu du. Halaber, esan du "Euskadi demokratikorako trantsizioan" izan zuen papera ezinbestekoa izan zela.