Microsofteko teknikarien itxurak eginez, telefono bidezko iruzurrak Nafarroan

Espainiako Poliziak azken egunotan ohartarazi du iruzur mota baten bigarren bolada bat izan dela, urte hasieran Nafarroan atzemandakoa. Ustezko egileak, telefono dei batean, Microsofteko teknikarien itxurak eginez, ordenagailuetan ustezko birus bat atzeman dutela ohartarazten dute.

Modu honetara, hainbat iruzur salatu dituzte Iruñean, 2.800 eta ia 6.000 euro artekoak, poliziak ohar baten bidez jakitera eman duenez.

Egileek euren zerbitzuak eskaintzen dituzte arazoa konpondu ahal izateko, trukean 4 eta 15 euro artean eskatuz. Horretarako, sakelako telefonoan hainbat aplikazio instalatzea eska dezakete, hala nola, Team Viewer Team Support edo Air Droid4. Hainbat webgunetan sartzea ere eskatu dezakete, erabiltzaileen izenak, pasahitzak eta datu pertsonalak galdetuz, hala nola, NANa edo kreditu-txartelen zenbakiak.

Behin telefono deia jaso duenak datu horiek emanda, ustezko egileek ordenagailuen kontrol osoa hartzen dute eta haren banku-kontuetan sartzen dira.

Edozein ordainketa egiteko edo edozein datu pertsonal emateko erabakia hartu baino lehen, zerbitzuak eskaintzen dituen erakunde edo enpresekin, aipatutako erakunde edo enpresetako arduradunekin eta Polizia Nazionalarekin harremanetan jartzea gomendatzen da, aholkularitza jasotzeko.

Internet bidez iruzurrak saihesteko, gure ordenagailuan birusik edo malwarerik ez sartzeko antibirus bat edukitzea eta eguneratuta egotea gomendatzen da, programetara sartzeko baimenak irakurtzea eta identifikatu gabe eta posta elektronikoz edo promo kamuflatuen bidez iristen diren estekak ez irekitzea.

Era berean, "Identitate digitala" zaintzea eskatzen da, hau da, Internetera norbere buruari buruzko informazio gehiegi ez igotzea, eta sare sozialen pribatutasuna konfiguratzea, xantaiak edo nortasun-lapurretak saihesteko. Ildo horretan, gogorarazten da funtsezkoa dela orrialdeak https:// segurtasun kodea duela bermatzea.

Era berean, azpimarratzen da garrantzitsua dela gure WiFi sarearen sarbidea ukatzea, eduki desegokiak lortzeko edo edozein jarduera kaltegarri egiteko erabil dezaketelako. Sare publiko bat erabiliz gero, informazio sentikorra trukatzea saihestu behar da.