Iñaki Martinez de Lunak jasoko du 2023ko Manuel Lekuona Saria

Iñaki Martinez de Luna (Vitoria-Gasteiz, 1950) soziologo eta soziolinguista arloko ikertzaileak jasoko du 2023 Manuel Lekuona Saria, urte luzez euskal kulturaren alde egindako lanagatik, 1983tik sari hau ematen duen Eusko Ikaskuntza erakundeak ostiral honetan iragarri duenez.

Martinez de Lunak 40 urtean euskara biziberritzeko prozesuaren ezagutza zientifikoan sakontzeko eta euskal gizartearen errealitateari buruzko hainbat ikerketa garrantzitsu zuzendu ditu. Hala, "jarduera zientifikoa eta Euskal Herriaren garapenarekiko konpromiso aktiboa uztartu ditu" bere ibilbide profesionalean.

Eusko Ikaskuntzaren arabera, Martinez de Lunaren curriculum zabalak "berrikuntzaren aldeko bokazio argia erakusten du, eremu ezezagunei heldu eta sinergiak sortzeko grina. Zentzu horretan, bere ekarpena euskara biziberritzeko prozesuaren inguruko egungo lankidetza-giroaren baitan kokatzen da".

Epaimahaiak nabarmendu duenez, "Iñaki Martinez de Lunak aparteko dedikazioa du gure hizkuntzak gainditu behar dituen erronkei eta bere biziraupena bermatzeko baliatu behar dituen aukerei buruzko hausnarketan eta ekintzan", mundu osoko hizkuntza gutxituekin duen konpromisoaren baitan, bai eta "ikuspegi ireki eta mugarik gabea" ere.

Epaimahai instituzionala ondorengo erakundeetako ordezkariek osatu dute: Jose Miguel de Barandiaran Fundazioa, Eresbil-Musikaren Euskal Artxiboa, Euskal Kultur Erakundea, Etxepare Euskal Institutua, Euskalerriaren Adiskideen Elkartea, Euskarabidea-Euskararen Nafar Institutua, UNESCO Etxea eta Eusko Ikaskuntza bera.

Bizitza bat euskarari emana

Iñaki Martinez de Luna Soziologian doktore da Deustuko Unibertsitatean. Halaber, tokiko eremuan egindako lanak nabarmentzen dira, baita azterketa eta ikerketa taldeetan egindakoak: Eusko Ikaskuntzan, Euskaltzaindian, Euskal Herriko Unibertsitatean, Garabiden eta Soziolinguistika Klusterrean. Azken horretan, haren sortzaileetariko bat eta lehen lehendakaria izan zen, eta baita Bat aldizkariaren zuzendaria ere. Azpimarratzekoa da, halaber, Euskaltzaleen Topagunearen baitan sortutako Topalabe hausnarketa-taldean izandako lekua, balio handiko ekarpenak egin dituena, hala nola "Berrikasi eta Berrikusi" (2015) eta "Berrindartu eta jauzi" (2020) txostenak.

Eusko Jaurlaritzako Lehendakaritzako Prospekzio Soziologikoen Kabineteko arduraduna izan da 1986tik 2015era, eta UPV/EHUko irakasle ondokoa 1989tik 2015era. Euskararen Erakunde Publikoa-Office Public de la Langue Basque erakundeko Euskararen Aholku Batzordeko kide izan zen, eta egun Arabako Foru Aldundian eta Eusko Jaurlaritzan da, baita Euskara Sustatzeko Ekintza Plana (ESEP) azpibatzordearen zuzendaria ere. Euskaltzain urgazlea da, eta gaur egun "Euskararen Biziberritza Araban" proiektua koordinatzen du horren baitan. Araban lan handia egin du euskararen alde, Gasteizko GEU elkarteak egindako jarduerak horren erakusle, elkarte horretako presidente izan baitzen 2013 eta 2015 artean.