Baliogabe utzi dute Gipuzkoan kirol-elkarte batean izena emateko eskola-kirolean parte hartzeko derrigortasuna

Gipuzkoako Foru Aldundiak eskola-kirolari buruz onartutako araudiak dio 13 urtetik beherako haurrek Multikirola programan —izen hori dauka eskola-kiroleko programak— izena eman behar dutela, edozein kirol-elkartetan izena eman ahal izateko. Adin txikikoek askotariko kirol jarduerak egitea izan da arauaren helburua. Bada, atzotik, bertan behera dago betebehar hori.

Pasaiako familia batek jarritako salaketari erantzunez, EAEko Justizia Auzitegi Nagusiak baliogabe utzi du derrigortasun hori, adin-txikikoen eskubideen kontra egiten duela ebatzita. Zehazki, KG-2023-0314 eta 40-133/2021 foru-aginduen hainbat artikulu utzi dituzte bertan behera. 

Salatzaileak auzitara jo zuen, 9 eta 11 urteko bere alabek ezin zutelako Askatuak saskibaloi taldean izena eman, eskola-kirolean parte hartzen ez zutelako. Epaiaren arabera, "Maddik eta Eiderrek eskubidea dute nahi duten kirol jardueran izena emateko, euren ikastetxeko kirol programan aurrez izena eman gabe". 

Bere argudioetan, Auzitegiak dio askotariko kirolak egitea "lehenetsi" egin behar dela, baina ezin dela "derrigorrezkoa" izan, besteak beste, Euskadiko Jarduera Fisikoari eta Kirolari buruzko Legea bera "urratzen" duelako. Ildo beretik, sententziak dio Gipuzkoako Aldundiak ezarritako "betebeharrak" adin txikikoen "eskubideak urratzen" dituela.

Bestalde, Gipuzkoako araudiak lurralde arteko oreka hausten duela ere badio sententziak. Izan ere, Bizkaian eta Araban "askotariko kirolen aldeko eredua lehenesten da, baina ez dago derrigortasunik". Hori horrela, epaileak uste du EAEko hiru lurraldeen arteko desoreka eragiten duela araudiak.

Azkenik, Auzitegiak nabarmentzen du "haurrei entzun" egin behar zaiela, dituzten "lehentasunak" eta egiten dituzten "aukerak" kontuan hartuz.

Helegitea

Gipuzkoako Foru Aldundiko Kirol Departamentuak jada iragarri du epaiaren aurkako errekurtsoa jarriko duela Auzitegi Gorenean, eta gogorarazi du harik eta auzitegi eskudunak kasazio-errekurtsoa ebatzi arte, eskola kirolaren programaren jarduera bere horretan mantenduko dela. 

Goizane Alvarez Kiroletako diputatuak azpimarratu duenez, "Multikirola defendatzen jarraituko dugu, orain arte egin dugun bezala". "Oso argi daukagu Gipuzkoako kirol-hastapenaren ereduak onura handiak dakartzala adingabeen garapenerako eta pertsonen prestakuntzarako".

Gipuzkoako programa "zorrotz" defendatu du diputatuak. "Programa horrek lortu du, ahalegin handiarekin, helduek diseinatutako kirol-hastapeneko eredu bat alde batera uztea eta adingabeen onuran pentsatutako eredu batera igarotzea. Horretan jarraituko dugu. Politika horiek oinarri zientifiko batek babesten ditu", azaldu du, ohar batean.