Oinezko batzuei eraso egin ostean Santurtziko Udaltzaingoak atxilotu zuen gizona hil egin da

Santurtziko Udaltzaingoak gizon bat atxilotu zuen astelehenean, bide publikoan hainbat oinezkori eraso egin ostean, indarrez mendean hartu eta gero. 

Poliziak atxilotu eta bi egunera hil da. ESAN sindikatuak jakinarazi duenez, ospitalera eraman zuten, eta bertan hil da.

Adineko pertsona bati makila kendu zion, eta kaletik zihoazen oinezko batzuk kolpatzeko erabili zuen. Bertaratu ziren agenteei ere eraso zien, eta lesioak eragin zizkien.

Poliziek eskura zituzten baliabideak erabili zituzten gizona mendean hartzeko, eta osasun-zentro batera eraman zuten gero.

Erreakzioak 

Ostiral honetan eskainitako prentsaurreko batean, Imanol Urrutxua Santurtziko Segurtasun zinegotziak adierazi duenez, Udalak konpromisoa du gertatutakoa argitzeko, eta "testuinguru zail batean" izandako polizia-jarduera aztertzeko. 

Auzia Ertzaintzaren Kontrol eta Gardentasun Batzordearen esku dago jada. Urrutxuaren hitzetan, ikerketa amaitu ondoren, "ez dugu inolako erantzukizunik saihestuko, halakorik balego". Hala ere, horren arabera, "orain arte jasotako informazioak ez du erakusten jarduera desegokirik egon denik".

Zinegotziak, halaber, Udalaren doluminak helarazi dizkie hildakoaren senideei, eta nabarmendu du "gertatutakoaren larria" dela, eta "senideekiko nahiz agenteekiko errespetuagatik", "ezinbestekoa" dela auzia "ahalik eta modu zorrotzenean aztertzea".

ESANek, berriz, tristura adierazi du heriotzagatik, eta babesa eman die bai familiari bai esku hartu zuten poliziei, horien jarduna legezkotasunaren, beharraren, kongruentziaren eta proportzionaltasunaren printzipioen araberakoa izan zela defendatuz.

Bestalde, Santurtziko EH Bilduk Udaleko gobernu taldeari eskatu dio iker dezala herritarraren heriotza.

Sare sozialetan zabaldutako ohar batean, koalizio subiranistak doluminak helarazi dizkie "hildakoaren senideei eta lagunei", eta, gaineratu duenez, "ezinbestekoa da gertatutakoari buruzko informazio guztia ezagutzea".

Horregatik, gobernu taldeari eskatu dio bai joan den osteguneko udalbatzarrean bai ondorengo informazio-bileran bildutako "informazio guztia" EH Bilduri emateko.