Bi lurrikara gogorrek Venezuela astindu dute eta, gutxienez, 235 hildako eta 4.300 zauritu utzi dituzte

7,2 eta 7,5 indarreko bi lurrikara bortitzek Venezuela astindu dute gaur goizaldean. Epizentroa Sierra Aroan izan dute lurrikarek, herrialdearen ipar-mendebaldean, Caracasetik 315 kilometrora (200 km lerro zuzenean), baina herrialdeko dozena erdi estaturi eragin die.

Delcy Rodriguez Venezuelako bitarteko presidenteak jakinarazi duenez, gutxienez, 235 dira hildakoak, eta 4.300etik gora, zaurituak. Euskal jatorriko emakume bat dago hildakoen artean. 

Estatu Batuetako Zerbitzu Geologikoaren (USGS) arabera, ondorioak askoz larriagoak izan daitezke. "Litekeena da biktima ugari eta kalte handiak egotea, eta hondamendiak oso eragin zabala izatea", adierazi du USGSk. Eredu automatikoen bitartez egindako hasierako estimazioen arabera, hildakoen kopurua 10.000 eta 100.000 artekoa izan liteke.

Gutxienez 2.927 familia daude kaltetuta, 157 desagertu daude, 200 pertsona harrapatuta, 250 eraikin kaltetuta daude eta zortzi ospitaletan, horietako batzuk "ebakuatu behar izan dituzte", Gobernuaren arabera.

La Guairan bakarrik 100 eraikin baino gehiago kolapsatu ziren; bitartean, makineria astuneko 100 ekipo baino gehiago mobilizatu ziren harrapatuta dauden pertsonak berreskuratzeko, eta ostiral honetarako hainbat erakundetako 11.500 segurtasun funtzionario martxan jartzea espero da.

Delcy Rodriguez Venezuelako presidenteak La Guaira bisitatu du, Diosdado Cabello Barne ministroarekin eta Jorge Rodriguez Parlamentuko presidentearekin batera.

Rodriguezek jakinarazi duenez, 200 milioi dolarreko funtsa osatu dute kaltetutako eremuak berreraikitzeko. "Iragarri nahi nuke 200 milioi dolarreko funts bat sortuko dugula Nazioarteko Diru Funtsean ditugun baliabideekin, azpiegitura eta ospitaleak berreraikitzeko aukera emango diguna, etxeak galdu zituztenentzat etxebizitzak eraiki ahal izateko", zehaztu du Venezuelako buruzagiak.

Era berean, "hondamendi natural honen biktimei berehalako arreta emateko" funts bat sortuko dela iragarri du, "doluan diren dozenaka familientzako". 

Aroa mendilerroan, ipar-mendebaldean

Venezuelak larrialdi egoera ezarri du Aroa mendilerroan, herrialdearen ipar-mendebaldean, 7,2 eta 7,5 magnitudeko bi lurrikara izan ostean. Dardaren ondorioz, hogei bat erreplika izan dira, eta eraikinak eta etxebizitzak erori dira.

Delcy Rodriguez jarduneko presidenteak jakinarazi duenez, bi lurrikarak minutu gutxiko aldearekin izan dira, eta larrialdi egoera ezarria zela baieztatu egin du. Azaldu duenez, gutxienez 20 erreplika zenbatu dituzte dagoeneko.

Diosdado Cabello Politika, Herritarren Segurtasun eta Bake presidenteordeak adierazi duenez, Palos Grandes eta Altamira auzoetan eszena "oso kezkagarriak" izan dira, eta hainbat eraikin eta etxebizitza erori direla ziurtatu du.

Kalte handiak sei estatutan

Hiriburuaz gain, agintariek jakinarazi dute kalte handiak izan direla Miranda, Guaira, Aragua, Carabobo, Trujillo eta Falcon estatuetan, eta kalteak izan direla Yaracuyn, Laran eta Meridan. Cabellok ohartarazi du egitura askok kolapsatzeko arriskua dutela.

Guaira estatua da kaltetuenetakoa. Bertan, Maiketiako Nazioarteko Aireportua aldi baterako itxi dute, bere instalazioetan izandako kalteen ondorioz, eta estatua "hondamendi naturaleko eremu" izendatu dute, "kolapsatu zuten eraikin kopuruagatik", nahiz eta ez duten oraindik horren datu zehatzik eman.

Lurrikarek oinarrizko zerbitzuei ere eragin diete. Gobernuak hainbat eskualdetako hornidura elektrikoan eta ur-horniduran izandako gorabeheren berri eman du. Era berean, eraikinetan zuzeneko gas-zerbitzua aldi baterako ixteko agindu du, segurtasun-ikuskapenak egiten direnera arte.

Bestalde, bertan behera geratu dira metroko eta trenbideko zerbitzuak, erreskate-lanak eta kalteak ebaluatzeko lanak errazteko. Eskolak ere bertan behera geratu dira aste osoan, eta funtsezkoak ez diren jarduerak bertan behera utzi dira.

Osasun arloan, agintariek osasun sare publiko eta pribatu osoa aktibatu dute zaurituak artatzeko, eta Gobernuak dei egin die medikuei, erizainei eta osasun langileei beren lanpostuetan sartzeko eta larrialdiak artatzeko.

Telefonicak, Movistar eta O2ren bidez, doan deitzea ahalbidetuko die Venezuelako biztanleek komunikatuta jarrai dezaten.

Era berean, 'eSIMFlag' zerbitzuak doako zerbitzu-egunak eskainiko dizkie arrazoi profesionalengatik, humanitarioengatik edo larrialdiengatik Venezuelara joan behar duten pertsonei, konektibitatea bermatzeko herrialdera iristen direnetik eta han dauden bitartean.