Venezuelarekin bat egin du munduak, eta gobernu askok laguntza eskaini dute lurrikaren ostean
Albistearen berri izan orduko mundu osoko gobernu eta erakundeek babesa eta laguntza eskaini diete Venezuelako gobernuari eta herritarrei.
Familia bat, gaua aterpe barik igarotzen, lurrikarren ondoren. Foto: EFE.
Venezuelan bart izan diren lurrikaren albisteak mundu osora zabaldu den babes eta elkartasun oldea sortu du.
Imanol Pradales lehendakariak Venezuelako lurrikaren ondorengo "momentu zail hauetan Euskadiren elkartasun eta babes osoa" igorri dizkie venezolar guztiei eta "bereziki gertukoak galdu dituztenei. "Lurrikarek ehunka hildako eta zauritu eragin dituzte Venezuelan, eta jasotzen ari garen albisteak gero eta okerragoak dira". "Tragedia izugarria" dela esan du.
Venezuelan bertan, Maria Corina Machado eta Edmundo Gonzalez oposizioko liderrek babesa eskatu diote nazioarteari.
Nicolas Maduro Venezuelako presidente kargugabetuak elkartasun mezua bidali dio bere herrialdeari asteazkeneko lurrikaren ostean: "Une zail honetan batasun nazionalerako, lasaitasunerako eta maitasunerako dei egin nahi dut", adierazi du Madurok New Yorken idatzitako eta sare sozialetan zabaldutako mezu batean. New Yorkeko espetxe federal batean daude preso Maduro eta Cilia Flores emaztea. "Inor ez dadila bakarrik geratu, komunitate bakoitzak zaindu ditzala bere haurrak, aitona-amonak eta gaixoak, eta lagun diezaiogun denok erreskate taldeen, PNBren (polizia), FANBren (armada), babes zibilaren, suhiltzaileen, langileen eta boluntarioen lanari", idatzi du.
Albistearen berri izan orduko mundu osoko gobernu eta erakundeek babesa eta laguntza eskaini diete Venezuelako gobernuari eta herritarrei.
Latinoamerikatik, Mexiko, Brasil, Ekuador, Argentina, El Salvador, Txile, Dominikar Errepublika, Panama eta Costa Ricako buruzagiek elkartasuna adierazi diote Venezuelari, eta Venezuelara laguntza humanitarioa bidaltzeko prest agertu dira.
Donald Trump AEBko presidenteak ostegun honetan adierazi duenez, Washington prest dago Venezuelari laguntzeko eta, adierazi duenez, Gobernu estatubatuarraren "agentzia guztiei" agidnu die "azkar jarduteko prest" egon daitezela.
Europatik, Antonio Tajani Italiako Atzerri ministroak iragarri du Babes Zibileko mekanismoa martxan jartzeko eskatuko diola Europar Batasunari, Venezuelako larrialdirako esku-hartzeak "koordinatzeko eta finantzatzeko".
Espainiako Gobernuak azaldu duenez, agintariekin harremanetan dago "beharrak ebaluatzeko", eta "premiazko laguntza guztia bidaltzeko prest" dagoela adierazi du. Larrialdi Unitate Militarraren (UME) eta Garapenerako Nazioarteko Lankidetzarako Espainiako Agentziaren (AECID) laguntza eskaini dio Venezuelari. Defentsa Ministerioa erreskaterako USAR eliteko taldeko 54 erreskatista Venezuelara bidaltzeko prestatzen ari da, erreskate lanetan laguntzeko. Unitate horren funtzio nagusia da egitura kolapsatuen azpian harrapatuta dauden biktimak aurkitzea, egonkortzea eta ateratzea, espazio konfinatuetan eta hondamendi handien agertokietan.
Alemaniako Gobernuak, bere aldetik, A400M garraio militarrerako sei hegazkin eskaini dizkio Venezuelari, eta Berlini eskatu ahala bidalitzeko prest daudela esan du. A400M hegazkina, batez ere, langileak eta materiala garraiatzeko erabil daitezke, eta, adibidez, Laguntza Teknikorako Agentziaren (THW) edo Alemaniako Gurutze Gorriaren (DRK) laguntza-hornidurak azkar lekualdatzeko, esaterako. Gainera, aireontzi taktiko hori ebakuazio medikoko misioetarako egokitu daiteke (MedEvac) eta pazienteen garraio sanitariorako erabili.
Maxime Prevot Belgikako Atzerri ministroak adierazi duenez, "Europar Batasuneko Babes Zibileko Mekanismoa aktibatzen bada, Belgika laguntza emateko prest dago".
Txinako Gobernuak doluminak adierazi ditu ostegun honetan Venezuelak jasandako 7,2 eta 7,5 lurrikarengatik, eta herrialdearen beharren arabera, eskura duen "laguntza guztia" emateko prest dagoela adierazi du.
Narendra Modi Indiako lehen ministroak ere doluminak eman dizkio Venezuelari, eta bere herrialdea laguntza emateko prest dagoela ziurtatu du. "India ahalik eta laguntza gehien emateko prest dago", idatzi du Xn.
Vladimir Putin Errusiako presidenteak doluminak igorri dizkio Delcy Rodriguez Venezuelako presidenteari eta, era berean, Dmitri Peskov Kremlinen bozeramaileak adierazi du Venezuelak Errusiari laguntza eskatuz gero, azkar erantzungo duela. "Gure lagun venezuelarrek eskatzen badigute, noski, berehala erantzungo dugu", esan du.
Zure interesekoa izan daiteke
Venezuelako 7,2 eta 7,5 magnitudeko bi lurrikarek herrialdearen iparralde osoa astindu eta dozenaka hildako eragin dituzte
Venezuelako agintariek larrialdi egoera ezarri dute, 164 dira dagoeneko hildakoak eta ia mila zaurituak, nahiz eta kopurua nabarmen handitu daitekeen. AEBko Zerbitzu Geologikoaren arabera, hildakoen kopurua 10.000 eta 100.000 artekoa izan liteke.
Euskal jatorria duen emakume bat, Venezuelako lurrikaran desagertutakoen artean
Hasieran Lehendakaritzak eta familiaren iturriek haren heriotza baieztatu badute ere, erreskate taldeak haren bila ari dira oraindik, eraikin bat behera etorri eta gero.
Agustin Otxotorena, Venezuelan bizi den euskal herritarra: "Egunak argitzen duenean, gauza latzak ikusiko ditugu"
Agustin Otxotorena Venezuelan bizi den euskaldunari elkarrizketa egin diote Egun Onen, bertan izan diren lurrikarak direla eta. Dioenez, hainbat eraikin erori dira, baina oraindik gaua da han, hortaz, ezin dute balantzerik egin oraindik.
Europa itolarrian, beroaren ondorioz
Kontinenteak egunak daramatza ezohiko tenperatura altuak jasaten. Beroari aurre egiteko egokituta ez dauden herrialdeak dira gehienak eta herritarrak ahal duten moduan ari dira egun hauek igarotzen. Okerrena, gainera, etortzeko dago herrialde horietan.
Brexitak irabazi eta 10 urtera, "rejoin": dimisioak, ekonomia ahula eta independentismoaren gorakada Erresuma Batuan
Hamarkada bat pasa da Erresuma Batua EBtik atera zenetik, eta tarte horretan Keir Starmer dimisioa emango duen seigarren lehen ministroa da; ekonomiak ez du suspertzea lortu, eta independentismoak indarra hartu du Eskozian, Galesen eta Ipar Irlandan.
Hurrengo bi hilabeetan Irango petrolioa saltzeko baimena eman du AEBk, negoziazioak ondo doazelako
Pakistanek eta Qatarrek, Burgenstocken (Suitza) egiten ari diren negoziazioetako bitartekariek, adierazi dutenez, lehenengo saioa "giro positiboan egin da" eta "aurrerapauso pozgarriak" izan dira.
Zergatik eman du dimisioa Keir Starmerrek? Hauek dira kolokan utzi zuten polemikak
Agintariaren dimisioaren ondorioz, Erresuma Batuak zazpigarren lehen ministroa izango du hamar urtean.
Keir Starmerrek Erresuma Batuko lehen ministro kargua utziko duela iragarri du
Ordezkoa bilatzeko prozesua uztailaren 9an hasiko da, eta egun horretatik aurrera hautagaitzak aurkeztu ahal izango dira alderdia zuzentzeko eta lehen ministro kargua lortzeko. Starmerrek adierazi du bere asmoa trantsizio ordenatu bat erraztea dela, eta erreleboa modu egonkorrean gertatzea.
Abelardo de la Espriella ultraeskuindarrak irabazi ditu Kolonbiako hauteskundeak, %1eko aldearekin
Hautagai ultraeskuindarrak 250.000 boto atera dizkio Ivan Cepeda ezkertiarrari bigarren itzuliko aurre-zenbaketan, eta oposizioak 33.000 mahai inpugnatu dituela iragarri du. Gustavo Petro presidenteak adierazi du oraindik ezin duela presidente berria izendatu.