Zer eguraldi izango dugu gaur?

Eguraldiaren iragarpenak kolokan jarri du aste osoan zehar eguzki-eklipse oso historikoaren jarraipena.

Euskalmeteko aurreikuspen-ereduen arabera, asteazken honetan zerua oskarbi egongo da, oro har, Euskal Herri osoan. Halere, behe-laino batzuk agertu daitezke kantaurialdean, baina eklipsearen ostean. Gainerako lurraldeetan eguzkia izango da nagusi, eta ez da hodeirik espero.

Eguraldiaren iragarpen zehatza EAErako, Euskalmeten eskutik

Euskalmetek argitu duenez, kontuan izan behar da eklipsea gertatuko den orduan (19:30-21:30) eguzkia oso behean egongo dela ortzi-mugan, eta beraz, eklipsea ikusterako orduan eragina izan lezakeen hodeitza behaketa puntutik mendebaldera dagoena izango dela. 

Zein izango da eklipsearen momentuko eguraldia Araban?

Asteazkenean, egunaren hasieran, lainoa edo behe-hodeiak sor daitezke zenbait bailaratan, baina bizkor desegingo dira eta giro eguzkitsua nagusituko da. Arratsalde-gauean ez da baztertzen erdi mailako hodei edo goi-hodeiren bat sor daitekeenik, baina, printzipioz, ez luke mendebaldera ikuspena eragotziko.

• Hodeitza: behe-hodeien probabilitate oso baxua eta erdi-mailako hodeien eta goi-hodeien probabilitate baxua Euria egiteko probabilitatea: 0 %  
• Haizea: Ipar-osagaiko haize ahul-bizia, bolada gogorren batekin
• Tenperatura Gasteizen: 31-33 ºC eklipsearen hasieran, eta amaieran 27-28 ºC ra jaitsiko da 

Zer eguraldi izango da Bizkaian eklipsean?

Asteazkenean, goizeko lehen orduetan, behe-hodeien tarteak agertuko dira eta goizean zehar desegiten joango dira. Eguerdi partean giro eguzkitsua izango dugu eta zerua oskarbi egongo da. Egunaren erdialdeko orduetan haizea ipar ekialdetik finkatuko da, arratsaldean iparraldera aldatuko da eta arratsalde gauean ipar-mendebaldera. Ipar-mendebaldeko haize heze horrek egunaren amaieran Bizkaia mendebaldeko kostaldean behe-hodei bakan batzuk sortzea eragin lezake, baina litekeena da hodeiak eklipsearen ondoren sortzea, gauean zehar. 

• Hodeitza: behe-hodei bakan batzuk izateko probabilitate baxu-ertaina Euria egiteko probabilitatea: 0 %  
• Haizea: Ipar-mendebaldeko haize ahula, tarte biziekin
• Tenperatura Bilbon: 26-27 ºC eklipsearen hasieran, eta amaieran 24-25 ºC-ra jaitsiko da

Zer eguraldi egingo du Gipuzkoan eklipsearen unean?

Asteazkenean behe-hodeien tarteak izango dira egunaren hasieran, baina goizean zehar desagertuz joango dira, zerua ia oskarbi geratu arte. Eguerdi aldera, haizea ipar-ekialdetik finkatuko da; arratsaldean iparraldera aldatuko da eta ondoren ipar-mendebaldera. Ipar-mendebaldeko haizearen eraginez, behe hodeien multzoak sor litezke, baina litekeena da gauean agertzea, eklipsearen ostean. 

• Hodeitza: behe-hodeien probabilitate baxua Euria egiteko probabilitatea: 0 % 
• Haizea: Ipar-mendebaldeko haize ahula, tarte biziekin
• Tenperatura Donostian: 26-27 ºC eklipsearen hasieran, eta amaieran 24-25 ºC ra jaitsiko da

Nafarroan ez arazorik espero eklipsea behatzeko. AEMETen arabera, zerua hodei gutxirekin edo oskarbi egongo da lurraldearen zatirik handienean, eta 35º-tik gorako tenperaturak izango dira Tuteran edo Iruñean.

Ipar Euskal Herrian, MeteoFrancek zeru garbiak eta 30 gradurainoko tenperaturak iragarri ditu.