Los Gallardoseko sutea ez da hedatu eta badirudi aurki egonkortzeko modua izango dutela

Felix Bolaños Espainiako Gobernuko Presidentetza, Justizia eta Gorteekiko harremanen ministroak gaur arratsaldean jakinarazi duenez, Los Gallardosen (Almerian) ostegunean piztutako suteak ez du gaurkoan aurrera egiterik izan, eta goizean zuen perimetro bera du arratsaldean (6.600 hektarea kiskalita). Gainera, gauerako aurreikuspen meteorologikoak ere onak dira, eta hala, badirudi sutea egonkortzeko modua izango dutela datozen orduetan. 

Turre udalerrian paratutako aginte postuan agerraldia egin du Bolañosek. Aurrez, erretako eremua bisitatu ahal izan dute agintariek, eta egiaztatu "etxe gehienek" ez dituztela kalterik izan. 

"Suak ez du aurrera egin gaur", iragarri du pozarren. Haizeak indarra galdu du eta hezetasun mailak gora; hori horrela, meteorologiak emandako "arnasaldia baliatu dute" suhiltzaileek.

Nobedaderik ez, desagertutakoen inguruan

Bestalde, ostegunetik aurkitu ezinda dauden 23 pertsonen eta formalki desagertuta dauden zazpien bila ari da Guardia Zibila. Erretako eremuan etxez etxe ibili dira begiratzen, baina oraingoz ez dute biktima gehiago topatu. Ofizialki, 12 dira hildakoak. 

Horrez gain, Bedar herrian kiskalita aurkitu dituzten ibilgailuak —lau auto eta motor bat— norenak diren egiaztatu nahian dabil Kriminalista unitatea.

Gaur bi pertsona atxilotu dituzte agenteek, desobedientzia larria egotzita. Izan ere, etxera itzuli ziren Guardia Zibilak handik ateratzeko agindua emana zienean. Horrekin lotuta, agintariek emandako jarraibideei jaramon egiteko deia egin dute, beste behin. 

12 hildakoei autopsiak egin dizkiete, baina ezin izan dituzte oraindik identifikatu. Lehen zantzuen arabera, gehienak atzerritarrak dira, britainiarrak eta belgikarrak. Zabaldu denaren arabera, aginduei kasurik egin gabe, autoz edo oinez ihes egiten saiatu ziren pertsonak dira zendutakoak. 

Zauritutakoei dagokienez, 18 pertsona artatu dituzte guztira. Horietako bat oso larri dago Torrecardenasko ospitaleko zainketa intentsiboen unitatean. Beste lau larri daude Sevillako Virgen del Rocio erietxean.