12 pertsona hil eta 50 zauritu dira Berlinen, atentatu batean

Gutxienez 12 pertsona hil eta 50 bat zauritu dira astelehen honetan Berlingo Gabonetako merkatu baten kontra egindako erasoan. Hiriko Poliziak astearte honetan baieztatu duenez, gidariak "nahita" harrapatu du jendetza, eta "ustezko atentatu terrorista" izan dela gaineratu du. Angela Merkel Alemaniako kantzilerrak berak esan du Berlingoa "atentatu terrorista" izan dela. Alemaniako Fiskaltzaren esanetan, ez dago argi erasoa pertsona baten edo askoren kontua izan den, eta oraingoz inork ez du erasoa bere gain hartu.

Berlinen gertatutakoak Nizan uztailaren 14an jazotakoaren antz handia du. Orduko hartan, kamioi batek 84 pertsona hil zituen, harrapatuta. ISISek bere gain hartu zuen atentatua.

Erasoa 20:15ean jazo da. Kamioi bat espaloira igo da Breitscheidplatz plaza inguruan, eta oinezkoen pasealekuan barrena joan da, bertan zegoen jendetza harrapatuta. Gutxienez 12 pertsona hil eta 50 zauritu dira; asko eta asko, larri.

Zauritutakoen artean euskal herritar bat dago, EiTBk jakin duenez. Iñaki Ellakuria bilbotarra da; hausturak ditu bi hanketan eta aldaka batean.

Kamioiak 50 bat metro egin ditu, eta parean zuen guztia eraman du aurretik.

Erasotzaileak ihes eginda jarraitzen duela uste du Poliziak

Harrapaketa bortitza gertatu eta gutxira, pertsona bat atxilotu du Poliziak. Hala ere, Berlingo Poliziak ez du uste atxilotutakoa ustezko erasotzailea denik, Die Welt hedabideak segurtasun-indarretako iturriak aipatuz jakinarazi duenez. Beraz, erasotzaileak ihes eginda jarraitzen duela eta arriskutsua izan daitekeela uste du Poliziak.

Hiriko alkatearekin batera egindako prentsaurrekoan Klaus Kandt Berlingo Poliziaren buruak azpimarratu duenez, "egiaztapenak amaitzeke daude, eta ezin dugu esan atxilotua kamioiko gidaria den ala ez". Ildo horretan, kamioian aurkitutako hatz-markak eta DNA laginak aztertzen ari direla eta frogen emaitzen zain egon behar dela gaineratu du.

Berlingo Poliziak Twitter sarean duen kontuan baieztatu duenez, atxilotuak ukatu egin du atentatuan parte hartu izana. Agintarien esanetan, atxilotua 2015ean Alemaniara heldutako 23 urteko errefuxiatu pakistandar bat da.

Antza, erasoaren lekuko batek ikusi du, eta atzetik joan zaio. Hari esker atxilotu du Poliziak.

Peter Franck Alemaniako fiskal nagusiaren esanetan, argitzeke dago erasoa pertsona baten edo askoren kontua izan den. Ildo horretan, atxilotua ez dela egilea uste badute ere, gaur arratsalde-gauean ezagutaraziko diren behin betiko emaitzen zain daudela gaineratu du. Bestalde, oraingoz inork ez duela erasoa bere gain hartu azpimarratu du.

Berlingo Poliziak baieztatu egin du atentatu terrorista izan dela. Aurrez, Thomas de Maiziere Alemaniako Barne ministroak ez du "eraso" hitza erabili nahi izan, zantzu guztien arabera, "hala izan dela dirudien arren", gaineratu du.

Ibilgailuaren barruan, gizon poloniar baten gorpua topatu dute, ustez atentatuaren egileak tiroz hildakoa.

Kamioia Poloniako garraio-enpresa batena da, eta altzairuzko habeak zeramatzan. Gidaria enpresaren jabearen lehengusua zen, eta, haren esanetan, 16:00etatik aurrera ezin izan zuen berarekin hitz egin.

Segurtasun-indarrek eremu guztia itxi dute, eta berlindarrei etxetik ez ateratzeko eta ingurura ez hurbiltzeko eskatu diete.

Errefuxiatuen harrera zentro bat miatu dute

Atentatuaren biharamunean, Gabonetako hainbat merkatu itxi dituzte, biktimekiko elkartasuna erakusteko asmoz. Jendetza biltzen den ekitaldietan segurtasun-neurriak indartuko dituela iragarri dute Berlingo agintariek.

Fiskaltza Federalak eta Berlingo Estatuko Fiskaltzak ikerketa bana abiatu dute.

Alemaniako Poliziak Tempelhof aireportuko hangar batean paratutako errefuxiatuen zentro bat miatu du astearte honetan. Ez dute inor atxilotu. Alemaniako komunikabideen arabera,  atentatuaren ustezko egilea zentro horretan bizi omen zen.

Merkel: 'Atentatu terrorista izan da"

Angela Merkel Alemaniako kantzilerrak esan du zigortu egingo dituztela "atentatu terrorista" honen egileak. "Gertatutakoa sakon ikertuko dugu", agindu du prentsaurreko labur batean.

Kantzilerraren iritzian, "zaila izango da guretzat onartzea, baldin eta baieztatzen bada, Alemanian asiloa eskatu zuen pertsona batek atentatu terrorista hau egin duela".

Alemaniarentzat Alternatiba izeneko alderdi populistak, berriz, Merkeli leporatu dio gertatutakoa, gidaria errefuxiatua dela nabarmenduta. "Noiz erreakzionatuko du Alemaniako zuzenbide-estatuak? Noiz amaituko da hipokresia madarikatu hau? Merkelen hildakoak dira", esan du Marcus Pretzell eurodiputatuak Twitterren.