Alain Iriart hautatu dute Euskal Hirigune Elkargoko lehendakari

Aldaketa Euskal Hirigune Elkargoko buruzagitzan. Aurrerantzean, Alain Iriart izango da lehendakari, Jean-Rene Etchegarayren ordez. Bigarren bozketan lortu du Lehendakaritza EH Baiko Hiriburuko (Lapurdi) auzapezak. 119 boto jaso ditu, beharrezkoa zuen gehiengo absolutua (114 boto) gaindituta. Baionako auzapez zentrista denak, bere aldetik, 102 boto erdietsi ditu. 

Botoa sekretua da, baina bigarren bozketan, dirudienez, gakoa izan dira aurrenekoan Peio Etxeleku EAJko kide eta Kanboko auzapezaren alde egin duten hautetsien botoak. Izan ere, Etxelekuk bere hautagaitza erretiratu, eta ezker abertzaleko hautagaiaren alde egingo duela iragarri du. Babes horri esker gainditu du Iriartek gehiengo osoaren langa. 

Eskerrak Etchegarayri eta Etxelekuri

"Mila esker handi bat denei", euskarazko hitzokin abiatu du Iriartek, nabarmen hunkituta, bere hitzaldia (frantsesez egin du gainerakoa). Aitortu duenez, "segundo bakar batez ere ez nuen imajinatzen hemen egongo nintzatekeela". Ondoren, eskerrak eman dizkio Jean-Rene Etchegaray 2017tik, Elkargoa sortu zenetik, lehendakari izan denari. "Eskerrik asko eta zorionak Jean-Rene Etchegaray ia 10 urteotan egin duzun lanagatik". Hautetsiek txalo zaparrada bat eskaini diote Baionako auzapezari. 

Segidan, Etxeleku jeltzaleari ere eman dizkio eskerrak Iriartek. "Nire alde bozkatuko duzula iragarri duzu. Azkenean, zuok (232 hautetsiek) aukeratu duzue", erantsi du. 

Iriartek batasunerako deia egin du. "Bidea elkarrekin egingo dugu. Ezberdinak gara, baina komunitatearen zerbitzupean gaude", esan du, eta honakoa erantsi du: "Guk ez dugu gugatik lan egiten, interes orokorraren alde baizik". 

Gainera, Hiriburuko alkate izateari utziko diola iragarri du Iriartek, eta datozen egunetako trantsizioa prestatuko duela. Izan ere, Elkargoarekiko "konpromiso pertsonal handia" duela adierazi du.

Otegi: "Guretzat ametsa da"

Arnaldo Otegi EH Bilduren (EH Bairen koalizio-anaia, Hego Euskal Herrian) idazkari nagusia Baionan izan da gaur, Euskal Hirigune Elkargoaren lehendakari berriaren aukeraketan. 

Iriart hautatu ostean kazetariei aitortu dienez, "ikaragarria da, perspektiba historikotik, hemengo lehendakaria abertzalea eta ezkerrekoa izatea". "Guretzat ametsa da", erantsi du. 

Otegiren aburuz, Elkargoa EH Baiko hautetsi batek gidatzeak esan nahi du "Euskal Herria Lapurdi, Zuberoa eta Nafarroa Beheretik eraikitzen dela".

Imanol Pradales lehendakariak ere zoriondu du Alain Iriart. X sare sozialean kaleratutako mezu batean, "elkarlanean aritzeko eta sakontzeko erabateko prestutasuna" helarazi dio EH Baiko politikariari.

EAJ: "Ez dago aliantza estrategikorik EH Bairekin edo EH Bildurekin"

EAJk esan du "testuingurura egokitutako erabaki bat" izan dela, "irtenbide baliagarri" bat bilatzeko bidean, "orain arteko gobernatzeko moduak haserrea piztu duelako herritarren artean".

Horren harian erantsi du "erabaki zuzena" hartu dutela, eta ez dagoela EH Bairekin edo EH Bildurekin "aliantza estrategikorik", "ezta marko politikoan aldaketarik ere".

Etchegaray izan da garaile lehen bozketan, baina gehiengo osotik urrun

Bilkura 09:00etan hasi dute, lau hautagai zirela: Jean-Rene Etchegaray, Alain Iriart, Peio Etxeleku eta Pascal Lesellier. Lehen bozketan, ezein hautagaik ez du lortu beharrezkoa zuen gehiengo osoa. Hauxe izan da bozketa horren emaitza: Etchegarayk 99 boto lortu ditu; Iriartek, 80; Etxelekuk, 49; eta Lesellierrek, 1. Ondoren, 15 minutuko etenaldia egin ostean, Etxelekuk eta Lesellierrek adierazi dute ez zirela bigarren itzulira aurkeztuko, eta Etxelekuk Iriarten alde bozkatuko zuela iragarri du.