Estatu Islamikoak bere gain hartu du Alemanian hiru pertsona hil eta zortzi zauritu dituen erasoa

Estatu Islamikoak bere gain hartu du Alemaniako Solingen hirian bart izandako erasoa, larunbat arratsaldeko azken orduan zabaldu denez. Erasoa "Palestinako eta beste leku batzuetako musulmanen mendekua" dela esan du talde armatu horrek zabaldutako komunikatuak, ZDF Alemaniako telebistaren arabera.

Alemaniako Poliziak bi pertsona atxilotu ditu erasoarekin zerikusia dutelakoan.

Batetik, larunbat arratsaldeko lehen orduan, 15 urteko mutil bat atxilotu dutela iragarri dute, Solingenen ostiral gauean labanaz egindako erasoarekin zerikusia duelakoan. Erasotzaile batek hiru pertsona hil eta zortzi zauritu zituen, horietako bost larri. Erasoaren berri aurretik izan arren hori saihesteko ezer ez egitea leporatuta atxilotu dute antza nerabea, baina Poliziak ez du uste bera denik erasotzailea. 

"Polizia-operazioan, lagun bat atxilotu dugu, eta beharrezko ikerketak egiten ari gara krimenarekin zerikusirik duen argitzeko", azaldu du Dusseldorfeko Poliziak ohar baten bidez. 

Der Spiegel aldizkariaren esanetan, atxilotua errefuxiatuentzako harrera-zentro batean bizi den Kirgizistango herritar bat da.

Testuinguru honetan, ARD Alemaniako telebista publikoak jakinarazi du Polizia operazio bat egiten ari dela errefuxiatuentzako aterpe batean.

Zonaldea hesituta dute operazio berezietako ehunka agentek. "Informazioa jaso dugu, eta horretan oinarrituta, operazio bat egiten ari gara", esan du Poliziaren bozeramaile batek.

Hala, larunbat gauean oharra kaleratu du Poliziak berriz ere, beste pertsona bat atxilotu dutela jakinarazteko. Litekeena da operazio horretan atxilotu izana.

Erasoa

Atentatua ostiral iluntzean gertatu zen, 21:45 inguruan, Ipar Renania-Westfalia estatu federatuko Solingen hiriaren 650. urteurrena ospatzeko jaialdian. Oraindik identifikatu gabe dagoen gizon bat jendea sastatzen hasi zen. Kaosa aprobetxatuz, ihes egitea lortu zuen, hiru pertsona hil eta zortzi zauritu ondoren, horietatik bost larri.

Alemaniako Poliziak operatibo handi bat abiatu du egilea bilatzeko; agente armatuak, ibilgailu bereziak eta helikopteroak erabiltzen ari dira horretarako.

Poliziak erasoaren inguruko informazioa edo irudiak emateko eskatu die herritarrei, Interneten horretarako bereziki sortutako atari baten bidez, erasotzailea identifikatu eta aurkitzen laguntze aldera.

Agintariek uste dute gizon bakar batek egin zuela erasoa. Hainbat pertsona lepoan sastatu ondoren, erasotzaileak ihes egitea lortu zuen izuaren erdian.

Kontzertu baten erdian izan zen erasoa, eta jaialdia bertan behera utzi zuten. Herritarrei eskatu diete hiriko alde zaharra saihesteko eta, ahal dela, etxean geratzeko.

"Solingenen denok gaude atsekabetuta. Gure hiriaren urteurrena ospatu nahi genuen, eta orain hildakoengatik dolua gorde behar dugu eta zaurituak deitoratu. Malkoak ditut begietan eta bihotza hautsita. Hil direnak ditut gogoan, eta otoitz egiten dut oraindik euren bizitzaren alde borrokan ari direnen alde", idatzi du Tim Kurzbach Solingen hiriko alkateak Facebooken.

Nancy Faeser Barne ministroak labanak bide publikoan mugatzeko planak iragarri eta egun gutxira gertatu da erasoa. Poliziaren datuen arabera, iaz arma zuriz egindako 9.000 lesio kasu erregistratu ziren Alemanian.