Islamarekin kritikoa den mediku saudiarabiar bat da Magdeburgeko gabon azokako atentatuaren ustezko egilea

Nancy Faeser Alemaniako Barne ministroak baieztatu duenez, Magdeburgeko harrapaketaren ustezko egilea "islamofoboa da, argi eta garbi". Sarraskia izan eta gutxira atxilotu zuten susmagarria.

Alemaniako segurtasun-iturrien esanetan, Taleb Al Abdulmohsen da atxilotua, 50 urteko mediku saudiarabiarra, psikiatrian eta psikoterapian espezialista, eta bizileku-baimen iraunkorra du, 2016an errefuxiatu gisa onartua izan ondotik Alemanian.

DPA agentziaren arabera, duela urtebete inguru gizon honi buruzko ohartarazpena igorri zitzaien Alemaniako agintariei, horren joera erradikalagatik. Antza denez, Islamarekiko kritikoa den ekintzaile gisa aurkeztu zuen bere burua, "musulman ohi" gisa definituz.

Der Spiegel aldizkariak eta Frankfurter Rundchau egunkariak, besteak beste, zabaldu dutenez, atxilotuak fede musulmana utzi zuenetik bat egin du ultraeskuinaren mezurik erradikalenekin, Alemaniarako Alternatiba (AfD) ultraeskuindarraren aldekoa da, eta Alemaniako Gobernuari mugimendu islamiarraren konplize izatea egozten dio, eta Angela Merkeli Europa islamizatzeko balizko plan batekin bat egitea.

2006an iritsi zen Alemaniara

Atxilotua 2006an iritsi zen Alemaniara, ikasle gisa, eta asiloa jaso zuen 2016ko uztailean, Islametik aldentzeagatik heriotza-mehatxuak jaso ondoren. Psikiatra gisa egiten zuen lan, eta Bernburgen bizi zen, 32.000 biztanleko hirian.

Ekintzaile gisa, Saudi Arabiako emakumeei euren herrialdetik ihes egiteko aukerei buruzko informazioa eta aholkuak ematen zizkien, eta Alemaniako asilo-sistemari buruzko informazioa biltzen zuen webgune bat zuen.

2009an Frankfurter Rundschau egunkariari emandako elkarrizketa batean esan zuen Saudi Arabiako emakume askok jotzen zutela berarengana babes bila, mendean zituen gizonak bortxatu ondoren. Alemaniako asilo-sistema emakume horientzat askatasunerako bidea zela esan zuen elkarrizketa horretan.

Urte bereko beste elkarrizketa batean, Frankfurter Allgemeine egunkarian, "Islamaren historiako kritikari handiena" bezala definitu zuen bere burua.

Une jakin batetik aurrera, Islamarekiko hartutako distantziak Alemaniako migrazio-politikaren aurkako jarrera zuzena izatera eraman zuen. Azaroan X sare sozialean mezua argitaratu zuen "Saudi Arabiako oposizioaren lau eskakizunekin", eta bertan esan zuen Alemaniak legez kanpoko migraziotik babestu behar zituela bere mugak. Gainera, Europa islamizatzeko plan bat izatea leporatu zion Merkeli.

Sare sozialetako beste mezu batzuetan, AfD goraipatu zuen Alemanian Islamari aurre egiten dion alderdi bakarra dela esanez, eta AfDrekin batera, musulman ohientzako akademia bat sortu nahi zuen Alemanian, Der Spiegelen arabera.

X sareko bere profilean argitaratu zuen biografian, "Alemaniak Europa islamizatu nahi du" esanez amaitu zuen testua.

Duela astebete, AEBko blog islamofobo baten bidez, bere elkarrizketa bat zabaldu zuen. Bertan esan zuen Alemaniako Estatuak operazio sekretu bat zuela Saudi Arabiako musulman ohiak mundu osoan jazartzeko, eta, aldi berean, asiloa ematen ziela jihadista siriarrei. Ezabatu egin zuen, baina beste mezu batean mendekua iragarri zuen, berriro, Die Welt egunkariaren arabera.

Azken asteetan ez du lanik egin, eta bajan egon da, Magdeburger Zeitung egunkariaren arabera.

Bost hildako eta 200 zauritu

Alemaniako agintariak erasoa izan zen lekuan izan dira gaur goizean. Inguruan, dozenaka herritarrek kandelak, loreak eta mezuak utzi dituzte biktimen omenez.

Bost dira jada Magdeburgeko (Alemania) gabonetako azokan izandako harrapaketan hildakoak, eta zaurituak 200 baino gehiago dira, dozenaka zauritu larri tartean.

Hildakoen artean gutxienez adingabe bat dagoela jakinarazi zuen Reiner Haseloff Saxonia-Anhalteko lehen ministroak erasoa gertatu zen lekuan bertan.

19:00ak pasatxo zirenean izan zen erasoa. Erasotzaileak gabonetako azoka zeharkatu zuen, 400 bat metroan jendea aurrean eramanez, Municheko matrikula zuen alokatutako auto batekin.

Duela 8 urte, 2016ko abenduaren 19an, kamioi batek azoka baten aurka egin zuen Berlinen, eta 13 pertsona hil zituen. Erasotzaileak Italiara ihes egin zuen, eta Poliziak tiroz hil zuen bertan.

Olaf Scholz Alemaniako kantzilerrak erasoa "izugarrikeria" izan dela salatu du, eta une honetan "batuta" egoteko deia egin die alemaniarrei. Scholzek esan du Alemaniak batuta egon behar duela gertatutakoaren aurrean, eta ez duela utzi behar gorrotoa nagusitzen eguneroko bizitzan.

"Ez dago bakea gabonetako azoka txiki batek bezainbeste ordezkatzen duen lekurik. Zer ekintza barbaroa den bertara jendea hiltzera joatea", esan du Scholzek atentatua izan zen lekuan bertan, Reiner Hasseloff Saxonia-Anhalt estatu federatuko lehen ministroa ondoan zuela. "Une honetan elkartuta egon behar dugu, ezin gara gorrotoan erori", gaineratu du.