Israelek ziurtatu du Mohammed Sinwar Hamasen buruzuagia bonbardaketa batean hil egin dutela

Benjamin Netanyahu Israelgo lehen ministroak gaur Parlamentuan adierazi duenez, Israelgo Armadaren eraso batek Mohammed Sinwar Hamasen buruzagi berria omen zena hil du.

Tel Aviven arabera, Mohammed Sinwarrek bere gain hartu zuen Hamasen kontrola Zerrendan, 2024ko urrian Israelek Yahya Sinwar anaia hil ondoren. Israelek 2023ko urriaren 7ko erasoen antolatzailetzat jo zuen Yahya. Hamasek 1.200 pertsona inguru hil eta 250 bat gatibu hartu zituen eraso hartan. Oraingoz, erakunde palestinarrak ez du buruzagiaren heriotza baieztatu.

Iragan martxoan, Israelek Salah al-Bardawil hil zuen, Hamasen buruzagi politikoa, aireko eraso batean. 2024ko uztailean, Ismail Haniyeh Hamasen orduko buruzagia ere hil zuen Israelek Teheranen egindako eraso batean.

Negoziazioak Egipton

Bien bitartean, Hamasek gaur esan du Steve Witkoff AEBko ordezkariarekin akordio batera iritsi dela Gazan su-eten iraunkorra bermatuko duen marko orokor baten inguruan. Akordioak 10 gatibu israeldar askatzea jasoko luke.

Hamasen esanetan, proposamen horrek "su-eten iraunkorra, Israelgo Armada Gazako Zerrendatik erabat erretiratzea, laguntza fluxu etengabea, eta akordioa iragarri eta berehala Zerrendako kontrola bere gain hartuko duen batzorde profesional bat bermatzeko marko orokor bat" jasotzen du.

Duela bi egun, Israelgo goi-funtzionario anonimo batek ziurtatu zuen Israelgo negoziatzaileek uko egin ziotela AEBk Gazako su-etenerako egindako proposamenari, baldintza berdinekin: bizirik dauden hamar gatibuak askatzea eta erasoaldiaren amaiera negoziatzea.

Bishara Bahbah bitartekari palestinar-estatubatuarrak aurkeztutako proposamenak Witkoffen laguntza eta onespena zuen, iturri palestinar batek zehaztu zuenez.

Asteartean, Israelgo ordezkaritza bat Kairora iritsi zen, Egiptok su-etenaren negoziazioak "bultzatzeko" egindako ahaleginen baitan, herrialde horretako segurtasun iturri batek baieztatu zuenez.