AEBk eta EBk muga-zergen akordioa lortu dute

Donald Trump ABko presidenteak iragarri duenez, AEBk eta Europar Batasunak akordio bat lortu dute Europako produktuei % 15eko muga-zergak ezartzeko eta EBk energia eta ekipamendu militarra erosteko.

Itun horren arabera, EBk AEBri energie erosi beharko dio 750.000 milioi dolarreko balioaz, eta ekipamendu militarrean 600.000 milioi dolar gehiago inbertitu beharko ditu, Trumpen esanetan. 

Washingtonek, bere aldetik, % 15eko muga-zerga finkoa ezarriko die Europar Batasuneko inportazioei, baita automobilei ere; itunik ezean abuztutik aurrera %30eko tasekin egin zuen mehatxu Trumpek. 

Gainera, Trumpen arabera, Europako herrialdeek zero muga-zerga ezarriko diete AEBetako inportazioei, baina AEBko presidenteak ez du xehetasun gehiagorik eman.

Farmazia produktuak negoziaziotik kanpo geratu dira, buruzagi errepublikanoak Ursula von der Leyen Europako Batzordeko presidentearekin izandako bileraren ostean prentsari adierazi dionez.

"Uste dut biok akordio batera iritsi nahi genuela", adierazi du Trumpek, Eskoziako mendebaldean, Turnberryko golf gunean, Hogeita zazpien ordezkariarekin bostekoa eman ondoren.

"Negoziazio hau duela hilabete batzuk hasi zen, beraz, bagenekien zertara gentozen, eta "bi aldeentzako akordio egoki batera iristeko borondatea zegoen", adierazi du.

"Oso ona izango da guztiontzat", adierazi du Trumpek, eta EBrekin egindako akordioa "denetan handiena" dela berretsi du. 800 milioi kontsumitzaileko merkatua dute bien artean. 

Ituna itxi ostean, Europako ordezkaria aireportura joan da, eta bertan Von der Leyenek adierazpenak egin ditu. 

Von der Leyen: "Akordioak ziurtasuna eta egonkortasuna dakar"

Ursula von der Leyen Europako Batzordeko presidenteak Estatu Batuekin lortutako muga-zergen akordioa defendatu du. Von der Leyenek baieztatu duenez, aldebiko itunak % 15eko muga-zerga finkoa eta maximoa jasotzen du "Europako esportazio gehienentzat".

% 15 hori "sektore gehienei aplikatuko zaie, hala nola autoei, erdieroaleei eta produktu farmazeutikoei", zehaztu du Von der Leyenek. Trumpek berak lehen adierazitakoarekin kontraesanean dago datua, produktu farmazeutikoak negoziaziotik kanpo geratzen zirela adierazi baitu hark.

Von der Leyenek iragarri du, gainera, "zero muga-zerga" adostu dutela bi aldeetatik, "produktu estrategiko" batzuetan, sektore aeroespazialean eta haren osagaietan, bai eta zenbait produktu kimikotan, nekazaritza produktuetan, baliabide naturaletan eta lehengaietan ere.

Europako Batzordeko buruak aurreratu du lanean jarraituko dutela zerrenda horri elementu gehiago gehitzeko.

Von der Leyenen arabera, enpresa komunitarioentzat beharrezkoa den "ziurtasuna eta egonkortasuna" ekarriko du, hilabete luzeetako negoziazio gogorren ondoren lortutako akordioak.

Von der Leyenek eskerrak eman dizkio Trumpi ituna ixteko hartu duen "konpromisoagatik eta lidergoagatik", eta esan du, "negoziatzaile gogorra bada ere", "akordioak egiten" dituela.

Hitzartutako erosketa energetikoari dagokionez, Von der Leyenek adierazi du munduko lehen potentziari erosteak Hogeita zazpiei hornidura dibertsifikatzen eta Errusiako hidrokarburoekiko mendekotasuna murrizten lagunduko dietela.

Batzordeko presidenteak azpimarratu duenez, "erraza izan ez den" akordio horrek "munduko bi ekonomia handienak" inplikatzen ditu, urtean 1,7 bilioiko bolumen komertzialarekin, 800 milioi kontsumitzaileko merkatu bateratuarekin eta barne produktu gordinaren (BPG) % 44arekin.