Europako Justizia Auzitegiak ohartarazi du EBko estatu guztiek onartu behar dituztela batasuneko edozein herrialdetan egindako sexu berekoen arteko ezkontzak

Alemanian ezkondutako bi poloniarren kasuaren hariria Europar Batasuneko Justizia Auzitegiak (EBJA) gaur adierazi duenez, EBko estatu kideak behartuta daude Europar Batasuneko edozein herrialdetan egindako sexu berekoen arteko ezkontzak aitortzera, nahiz eta herrialdearen barne-araudian horrelako ezkontzak ez onartu. 

Kasua 2018an Berlinen ezkondutako bi poloniarri dagokie, zeinetako batek nazionalitate germaniarra ere baduen; bi gizonezko horiek beren ezkontza-ziurtagiria Poloniako Erregistro Zibilean transkribatzeko eskatu zuten, ezkontza Polonian aitor zezaten. Baina Poloniako agintariek ukatu egin zieten hori, Poloniako Zuzenbideak sexu bereko pertsonen arteko ezkontzak ez dituela baimentzen argudiatuta. 

Auzia Poloniako Administrazioarekiko Auzien Auzitegi Gorenera iritsi zen, eta horrek Europako araudia interpretatzeko auzi prejudizial bat helarazi zion Europar Batasuneko Justizia Auzitegiari. 

Europar Batasuneko gorteak bere erantzunean adierazi duenez, "Batasunean zirkulatzeko eta bizitzeko duten askatasuna erabili duten Batasuneko bi herritarrek beste estatu kide batean legez egindako ezkontzaren aitorpena ukatzea Batasuneko Zuzenbidearen aurkakoa da, askatasun hori urratzen duelako eta bizitza pribatua eta familiarra errespetatzeko eskubidea urratzen duelako".

Estatu kideak "behartuta daude beste estatu kide batean legez eskuratutako ezkontza-estatutua onartzera, Batasuneko Zuzenbideak ematen dituen eskubideak egikaritzeko", erantsi du Auzitegiak.

Hala ere, gorteak zehazten duenez, horrek ez du esan nahi sexu berekoen arteko ezkontza barne zuzenbidean sartu behar denik.

Baina estatu kide batek beste estatu kide batean egindako ezkontzak aitortzeko bide bakarra ezartzea erabakitzen duenean, hala nola ezkontza-ziurtagiria Erregistro Zibilean transkribatzea, bitarteko hori aplikatu behar die sexu berekoen arteko ezkontzei ere.

"Ezkontideek, Batasuneko herritar diren aldetik, EBko lurraldean zirkulatzeko eta bizitzeko askatasuna dute, bai eta familia-bizitza normala izateko eskubidea ere, bai askatasun hori gauzatzen dutenean, bai jatorrizko estatu kidera itzultzen direnean", argudiatu du auzitegiak.

Horri uko egiteak "eragozpen administratibo, profesional eta pribatu larriak eragin ditzake, ezkontideak jatorrizko estatu kidean ezkongabe gisa bizitzera behartzen baititu", zehaztu du Europar Batasuneko Justizia Auzitegiak.