Lizasoko komunitatetik Tabakalerako egonaldietara

Agian, datorren asteleheneko ordu txikietan banatuko diren Oscar sariez egin beharko genuke mintzo. Akort. Ados. Apustuetan, The Power of the Dog, Licorice Pizza, Jessica Chastain, Drive My Car eta Flee-ren alde nauzue. Ni. Zuek

Hori bezalako aldarrikapena kaleratu ostean, egin dezagun berba inporta duenaz, Iruñeko Ikuspuntu zinemaldi mugarik gabekoan behatzekin ukitu eta begiekin begiztatu genuen gure euskal zinemaren etorkizunaz.

Handik ez bazineten pasa, zaila suertatuko zaizue irudikatzea ere zeinen oparo, zeinen matxino, zeinen gozo, zeinen guapo, zeinen balent den euskal zinemaren geroa.  Zeinen kamera ausart eta deliziosak darabiltzaten egileek.

Ederki asko dakizue, ordea, Lisboan eta Turinen garaikurrak jaso ondoren, Arantza Santestebanen 918 gau lan indartsuak Ikusleen saria eta Epaimahiaren ohorezko aipamena bereganatu zituela.

Ezinbestekoa ere, errekuerdoetan festibala ireki zuen  Ione Atenea Lameiroren Los caballos mueren al amanecer, ze etxe okupatu batean ageri-agerian den iraganarekin, etorkizunezko argazkilari eta zinegile honek ekiten baitio dialogo eta hausnarketa sakon eta jostalari bati.

Baina geroaz ari garenez, egin dezagun aipu bihar ofizialki prentsaurreko batean iragarriko den notiziya baten inguruan. Bihar, Donostiako Tabakalerak, Donostiako Zinemaldiak, Donostiako Elias Querejeta Zine Eskolak eta Gipuzkoako eta Euskadiko beste hainbat erakundek babesturiko Ikusmira Berriak izeneko ekimen aurtengoan nortzuek hartuko duten parte jakinaraziko da.

"Ikusmira Berriak" direlako horiek sortzaileentzako egonaldiak dira. Eskarmentu handiko mentore batzuen konpainian, hautatutakoek espazio egokia eta kasik nahi eta behar adina denbora, bake eta bitarteko izango dituzte eskura euren proiektuak aurrera eramaten ahal izateko.

Epaileek aukeratutakoen artean, Irati Gorostidi. Nafarra, Eguesibarkoa. Donostian, Bartzelonan eta  Brooklynen irudi asuntoetan trebatua; Arantza Santestebanekin lan egina, baita Maider Fernandez Iriarterekin ere. Eta Ion De Sosarekin. Grande Days musika taldearen "Mourn Song" abestiaren bideoklipa  berak sortua da. Ikuspuntu jaialdian, euskal zinemaren geroa sustatuko duen Mirari Echavarrirekin batera San Simón 62 lana aurkeztu zuen. Bertan, bien gurasoek Lizasoko Arco Iris komunitatean bizi zutenaren gainean egiten dute Iratik eta Mirarik oso gogoeta delikatua, 16 milimetrotan filmatua. Zer pentsatu franko ematen duena. Ez bakarrik esperientzia hartaz. Zinemagintzaz ere. Soinuaz, muntaketaz, kamera zaharrek sortzen duten zarata zeharo zinematografikoaz. Akuilu ezin hobea bilakatzen den baliabideen ezaz. Ispilu batekin pentsatu ez izanak sorrarazten duen irudi gabezia arraro eta emankorraz…

Ikusmira Berriez ari gara, bai, Oscarren bezperetan.