Bost euskal finalista, Espainiako Arte Eszenikoen Max sarietan

Espainiako Arte Eszenikoen Max sarien antolatzaileek 23. edizioko finalisten zerrenda  argitaratu dute gaur, asteartearekin.

60 finalisten artean, Barsanti Konpainia eta Zanguango Teatro euskal taldeak daude, Kale Gorrian/Deshaucio eta Al otro lado lanekin, hurrenez hurren, kale ikuskizun onenaren atalean, eta Kukai Dantzak Dantza ikuskizun onenaren sarirako hautagai da Gauekoak lanarekin.

Bestalde, Iñaki Rikarte aktore eta zuzendari arabarra eszenako zuzendari onenaren sarirako finalista da El desdén con el desdén Antzerki Klasikoko Espainiako Konpainia Nazionalaren lanagatik, eta Fernando Bernués donostiarrak espazio eszenikoko diseinu onenaren saria eskura lezake Kukai Dantzaren Gauekoak-en kokapenagatik.

 Max Sarien irabazleak irailaren 7an jakinaraziko dituzte Malagako Cervantes antzokian.