Autoen garrantzia artean, Jean Dubuffet, eta Serra eta Seurat, Guggenheimen 25. urteurrena ospatzeko
Guggenheim Bilbao Museoaren Fundazioaren Patronatuak bilera egin du gaur Iñigo Urkullu lehendakaria buru zela. Han izan dira Unai Rementeria Bizkaiko ahaldun nagusia, Bingen Zupiria Eusko Jaurlaritzako Kultura sailburua, Lorea Bilbao Bizkaiko Kultura diputatua, Juan Mari Aburto Bilboko alkatea eta New Yorkeko eta Bilboko Guggenheim museoen zuzendariak, Richard Armstrong (modu telematikoan) eta Juan Ignacio Vidarte.
Lehenik eta behin, urteko jardueraren balantzea egin dute: gaur arte, 506.174 bisitari jaso ditu museoak 2021ean. Azken seihilekoan batez ere, gora egin du apurka atzerritik etorritakoen kopuruak, eta bisitarien % 43 izan dira azkenean.
Aurtengo aurrekontuari dagokionez, 30.208.828 eurokoa izango da, pandemiaren aurretik onartu zen azken aurrekontuaren antzekoa. Museoaren ordutegia orain artekoa bezalakoa izango da, 11:00etatik 19:00etara, eta museoa ordubete lehenago irekiko da joan-etorri gehineko egunetan, 10:00etatik 19:00etara.
Programazioa
2022rako programazio artistikoa ere onartu dute bilkuran. Otsailean, fauvismoko, kubismoko, Parisko Eskolako eta surrealismoko zenbait maisulanen hautaketa bat izango da ikusgai, Parisko Musée d'Art Modernetik ekarritakoa, eta, ondoren, Jean Dubuffet artistaren lanen bilduma bat izango da ikusgai.
Apirilean, "Motion. Autos, Art, Architecture" erakustaldiaren txanda izango da: Norman Foster arkitekto britainiarrak taxututako erakusketak aztergai izango du joan den mendeko artearen historian eta diseinuaren arloan automobilak izandako garrantzia.
Uda hasieran, "Serra/Seurat. Marrazkiak" iritsiko da, eta marrazkigintzak bi sortzaile gailen horien lanean izandako garrantzia azpimarratuko du.
25. urteurrena
Udaren ostean, "Sekzioak / Intersekzioak. Guggenheim Bilbao Museoaren Bildumak 25 urte" erakusketak museo osoa hartuko du, bertatik azaldu dutenez. Erakusketa horrez gain, beste hainbat ekitaldi egingo dituzte urte osoan zehar, mende laurdena ospatzeko.
Zure interesekoa izan daiteke
Arte Ederren Bilboko Museoak Jose Antonio Azpilkuetaren 12 marrazki jaso ditu
Jose Ignacio Olave arte editoreak eman ditu grabatuok, dohaintzan. Edwar Hopper margolari estatubatuarraren pinturan oinarrituta daude marrazkiok, eta apirilaren 19ra arte egongo dira ikusgai.
Arte galeriak astebetez itxiko dituzte, kultur arloko produktu eta zerbitzuen BEZa % 10etik beherakoa izatea eskatzeko
2022an Europan onartutako araudia bete eta kultur arloko produktu eta zerbitzuei BEZ murriztua ezar diezaieten eskatzen dute. Zineman, antzerkian eta literaturan, adibidez, murrizketa hori indarrean da jada, baina, beste herrialdeetan ez bezala, artelanen salmenta kanpoan geratu da. Hori dela eta, otsailaren 2tik 7ra bitartean, galeriek ez dituzte ateak zabalduko.
Artium Museoak AMA ikasketa zentroa sortu du
“Arte garaikideari buruz modu kritikoan pentsatzea” da helburua. Otsailean, 1976ko martxoaren 3an Gasteizen izandako hilketari buruzko memoria ariketa proposatuko du.
Piranesiren grabatuak, Durangoko museoan
Durangoko Arte eta Historia Museoak “Giovanni Battista Piranesi. Erroma amestua” erakusketa du ikusgai apirilaren 26ra arte. Itzal handia izan duen XVIII. mendeko sortzailea izan zen Giovanni Battista Piranesi. Veneton ikasi zuen arkitektoak grabatugintza landu zuen, batez ere, Erroman. José Ignacio Olaveren bilduma da erakusketaren oinarria, eta Garazi Arrizabalaga Durangoko museoaren zuzendaria izan da komisarioa.
Ukitzeko Artea programako beste lan bat aurkeztu du Arte Ederren Bilboko Museoak, pertsona itsuentzat
Luis Melendez artistaren obra baten ukitzeko bertsioa aurkeztu du gaur Arte Ederren Bilboko Museoak. Lan hori eta aurreko hamar edizioetako beste batzuk Bizkaiko 16 ikastetxetan erakutsiko dituzte. Ikusmen arazoak dituzten ikasleei artearen esperientziaz gozatzeko aukera emango die, eta gainerako ikasleek, begiak tapatuta dituztela, ikusmen gabeziaren ondorioak sentituko dituzte.
Zirkulu batetik begira begiraden zirkulu batean , Artiumen
Euskal Herriko Arte Garaikidearen Gasteizko Museoak abuztuaren 30era arte izango du ikusgai Zirkulu batetik begirada begiraden zirkulu batean erakusketa. Hogei artista eta kolektibok hartu dute parte "pentsamendu dekolonialaren, zibernetikaren eta feminismoen eragina duten praktiken genealogia" proposatzen duen bilduman.
Behaketa patxadatsu eta arretatsuaren aldarrikapena, Tabakaleran
"Strong back, soft front" Maite González Martínezen bideo eta collageen erakusketa Iñigo Villafranca Apesteguiak komisariotu du. Martxoaren 2ra arte egongo da ikusgai, "begiratzeko beste modu bat" proposatzen duen bilduma Donostiako zentroan.
"Bizkaiaren espiritua" erakusketa ikusgai, Bizkaiko Eleiz Museoan
Lurraldearen espiritualtasunetik egindako bidaia da "Bizkaiaren espiritua. Nortasun sozial eta erlijiosoaren irudikapenak mende-aldaketan (1870-1936)", XIX. mendearen erdialdetik XX. mendearen lehen hamarkadetara arte.
Iñaki García Erguin pintorea zendu da
Bilbotar pintorea Jose Lorenzo Solisen ikaslea izan zen, eta Emen taldea sortu zuen, 1966an, Jose Maria de Ucelayrekin eta Agustin Ibarrolarekin, besteak beste. 91 urte zituela hil da.
Nafarroako Museorako sarrera doakoa izango da martxoaren 1era arte
Eraikina egokitzeko obren lehen zatia amaitu ondoren, bilduma iraunkorreko lau solairuak bisitarien eskura daude berriro.