Euskal gatazkaren konponbideari heltzeko eskatu dio Amaiurrek Rajoyri

Azaroaren 20ko hauteskunde orokorretan EAEn eta Nafarroan izan ziren emaitzak kontuan hartzeko, gogoetako egiteko eta aro berri bat ireki dela onartzeko eskatu dio Amaiurrek Mariano Rajoyri. "Elkar-ulertzera kondenatuta gaude", nabarmendu du Iñaki Antigüedadek.

Amaiurren bozeramaileak esan du, hauteskundeetako emaitzak aintzat hartuta, euskal gizartearen gehiengoak uste duela Euskal Herriko gatazkak "izaera politikoa" duela eta egun gatazka hori konpontzeko baldintzak egon badaudela.

Euskal Estatuaren aldekoa izan arren, Amaiurrek Kongresuan Euskal Herriaren independentzia aldarrikatuko ez duela adierazi du: "Gatazkaren konponbidea eta erabakitzeko eskubidea exigitzera etorri gara, nortasun-obsesioak albo batean utzita".

Antiguedadek EAEko eta Nafarroako hauteskundeetako "argazkia" begiratzeko gonbita luzatu dio Rajoyri, 333.000 boto eta zazpi diputatu lortu dituztela eta. "Oso argazki garbia da, inflexio puntu bat markatzen duena; hartu behar duzun denbora, baina ez nahastu Estatuko argazkia iparraldeko argazkiarekin", gaineratu du.  Gauzak horrela, ausarta izateko eskatu dio eta, beste neurri batzuen artean, kartzela-politika aldatzeko exigitu dio.

Horrez gain, koalizio independentistak "biktima guztiak" kontuan hartzen dituela esan du eta guztientzako oroimena eskatu du. "Memoria guztia, biktima guztientzat", azpimarratu du.

Rajoy: "Nik zuri ez dizut ezer zor"

Erantzuteko tartean, Espainiako Gobernuaren hurrengo presidenteak esan du espainiarrek espero duten urrats bakarra ETAk bere behin betiko desegitea iragartzea dela. "Nik zuri ez dizut ezer zor", azpimarratu du.

Rajoyk adierazi du "oso ondo" dakiela Euskal Herrian bizi den egoera zein den eta gogora ekarri du bi urtetan Barne ministroa izan zela eta ETAk hildako hainbat pertsonen hiletetara joan behar izan duela.

Amaiurrek hauteskundeetan lortutako emaitzak direla eta, Rajoyk esan du ezker abertzaleak bezala, PPk edota PSOEk ere euren boto-emaileak dituztela, eta Alderdi Popularrak EAEn eta Nafarroan boto gehiago erdietsi dituela nabarmendu du.

Alabaina, demokrazian garrantzitsuena ideiak guztiak defenditu ahal izatea dela erantsi du. "Zu hona etorri zara eta komenigarriena iruditu zaizuna esan duzu", jarri du adibide moduan.

Ezker abertzalea egiten ari den moduan, urratsak emateko eskatu dio Antiguedadek Rajoyri, baina honek ze pausu eman behar dituen galdetu du, erretorikoki; izan ere, bere iritzian, demokrazia, bakea eta legea babesten dutenek ez dute inolako pausurik eman behar.

"Aipatu kontzeptuak babesten ez dituztenak dira urratsak eman behar dituztenak", azpimarratu du, eta norbaitek pausua eman behar badu, hori ETA dela esan du: "Oraindik hor dago eta bere desegitea iragarri behar du".

Antiguedad: "Bakea etsaiarekin hitz eginda lortzen da"

Rajoyri erantzuteko tartean, Antiguedadek berretsi egin du arazoak konpontzeko ezinbestekoa dela alderdi politikoen artean hitz egitea, baita Amaiur eta PPren artean ere. "Muturreko jarrerak izan arren, bakoitzak bere obsesioak izan arren, elkar-ulertzera kondenatuta gaude".

Ildo horretan, "bakea etsaiarekin hitz eginda lortzen da, ez lagunekin hitz eginda", azpimarratu du.