Zigorrak ezarri dizkiete Basauri BEA taldeari, entrenatzaileari eta lau jokalariri, epaile neska bati eraso egiteagatik

Emakumezko epaile adingabe batek salatutako irain eta mehatxuen ostean, diziplina-batzordearen ebazpena etorri da. Basaurin izan zen futbol partida, asteburuan, Soloarteko zelaian, eta orain zigorren ebazpena etorri da.

Horren arabera, etxeko taldeko lau jokalariri lau eta sei partida arteko zigorra eta isun ekonomikoak ezarri dizkiete. Era berean, entrenatzaileari isuna eta bost partidako zigorra jarri diote. Klubak, berriz, hiru partida jokatu beharko ditu ateak itxita. Zigor ekonomikoa ere jarri diote: 600 euroko isuna ordaindu beharko du.

Gertaerak Basauri BEA eta Delta Duo taldeen arteko neurketan izan ziren, talde bisitariak luzapenean berdindu zuenean (3-3). Une horretatik aurrera, epaileak aktan jaso zuenez, hainbat jokalari, talde teknikoko kide eta zale iraintzen hasi zitzaizkion, eta mehatxu larriak egin zizkioten.

Aldagelara joan zen, eta mehatxuekin jarraitu zuten; are, batzuk bertara sartzen saiatu zirela ere salatu zuen emakumeak.

Zigorrak

Kasua Bizkaiko epaileen batzordera eraman zuten. Gertatutakoa aztertu eta zigorrak ezarri ditu. Gertatutakoa gorabehera, gazteak hurrengo partidetan arbitratzen jarraitzeko asmoa agertu du.

Eder Perez Manzanares Bizkaiko Futbol Federazioaren idazkari nagusiak adierazi du Basaurin jazotakoa “oso larria” dela, eta erakundeak “epaileen aurkako indarkeria ezabatzeko” duen determinazioa nabarmendu du.

“Gure epaileak babestu nahi ditugu, eta indarkeriaren aurkako jarrera sendoa dugu. Bizkaian epaileen aurkako indarkeria desagertu egin behar da”, adierazi du. Era berean, azpimarratu du zigorrak “zorrotzak” eta “ezohikoak” direla.