Estebanek legegintzaldia aurten amaitzeko eskatu dio Sanchezi, jarraitzea "arduragabekeria" litzatekeela iritzita

Aitor Esteban EBBko presidenteak Espainiako Estatuko egungo egoera politikoa aztertu du jeltzaleek igande honetan Durangon egin duten ekitaldian, udal eta foru hauteskundeetarako urtebete falta denean. Legegintzaldia aurten amaitzeko eskatu dio Estebanek Sanchezi, “arduragabekeria litzatekeelako 2026tik haratago jarraitzea, norabide argirik gabe, aurrekonturik gabe, gehiengo egonkorrik gabe eta agenda kontrolik gabe, eta epaitegietako eraginarekin giro politikoan”.

Estebanek Plus Ultra auziari buruzko azken berriak aipatu ditu, Jose Luis Rodriguez Zapatero presidente ohiari zuzenean eragiten diotenak, eta gogorarazi du dagoeneko bederatzi “eskandalu judizial” irekita daudela Espainiako Gobernuaren inguruan. Horren iritziz, “erabat kaltegarriak dira politikaren eta gobernuaren egonkortasunaren irudiarentzat. Eta oso argi esan nahi dut: hemen ez du denak balio”.

“Estatu espainiarrean ez dago proiekturik, ez dago norabiderik”, deitoratu du EBBko presidenteak, EAJk Landako Gunean egindako ekitaldi jendetsuan. “Zein dira zure lehentasunak? Ez dakigu, ez dago aurrekonturik. Banderatxo ideologikoak dira denak. Gehiengorik gabeko banderatxoak. Kontakizun hutsala”, gaineratu du.

Halaber, Estebanek gogor kritikatu du Monica Garcia Osasun ministroaren jarrera medikuen grebari dagokionez, Osakidetzari zuzenean eragiten ari zaiolako. “Berdin zaie grebak eragin handia izaten jarraitzea osasungintza erabat publikoa den autonomia erkidegoetan, hala nola EAEn. Zuen arduragabekeriak kalte egiten die gure herritarrei”, esan du.

Horregatik, negoziaziorako deia egin du Estatutuaren erreformaren inguruan, gatazka konponduko duen akordio bat lortzen saiatzeko. “Hemendik kudeatzen uzten ez badigute, negoziatzea, negoziatzea eta negoziatzea da bide bakarra. Ez dago besterik. Eser dadila ministroa medikuekin. Edo Sanchezek egin dezala bestela. Izan ere, Espainiako Gobernuko presidente gisa, ministroa bezain arduratsua da”, ziurtatu du.

Testuinguru horretan, EBBko presidenteak argi utzi du: “Egoera horrek oso zail egiten du Sanchezek legegintzaldia amaitzea”. Eta “erantzunak zentralitate politikotik eskaintzeko” deia egin du, “jendea konponbideen zain baitago, zaratarik eta promesa hutsik gabe” etxebizitzaren, segurtasunaren, osasunaren, hizkuntza-eskubideen edo migrazioaren arloetan, besteak beste.