Auzipetuek ukatu egin dute tarta-jaurtiketaren egunean Tolosan zeudela

Yolanda Barcina Nafarroako Gobernuko presidenteari hiru tarta jaurtitzeagatik auzipetu dituzten lau lagunek Auzitegi Nazionalean deklaratu dute eta ukatu egin dute gertatu zen egunean, 2011ko urriaren 27an, Tolosan (Okzitania) zeudela.

Gorka Ovejero, Julio Martin, Ibon Garcia eta Mikel Alvarez auzipetuek defentsa abokatuaren galderei erantzunez azaldu dutenez, bat Iruñeko makrobiotika zentro batean zegoen, eta besteak etxean zeuden tarta-jaurtiketak gertatu ziren unean.

Defentsa abokatuaren galderei soilik erantzun diete auzipetuek, eta Abiadura Handiko Trenaren (AHT) kontrako kolektiboetako kideak direla aitortu dute. Horren harira, epaiketa "trenaren kontrako borroka kriminalizatzeko ahalegina" dela salatu dute.

Barcinaren deklarazioa

Yolanda Barcina Nafarroako presidenteak ere deklaratu du, eta "justizia" eskatu du jasan zuen "erasoa" dela eta.

Barcinak bederatzi urtera arteko zigorra eskatzen du auzipetuentzat, eta Fernando Grande-Marlaska epaileari esan dio tartek min egin ziotela aurpegian eta buruan, eta desorientatuta geratu zela.

Nafarroako presidenteak aitortu du, jaso zuen "kolpearekin, merengea begietan eta begiak itxita", ezin izan zituela egileak ikusi.

Gertatutakoa azaldu du Barcinak. Auzipetuak ikus-entzuleen artean egongo zirela uste du, eta "oso ondo jantzita" zeudela, bertan zeudela ez ohartzeko. "Ezustean altxatu eta gerturatu ziren, tartak atera eta jaurtitzeko. Dena oso azkar gertatu zen", gaineratu du.

"Hiru tarta jaurti zizkidaten, horietako bat oso gogorra, aurpegian eta buruan. Irteeraren bila hasi nintzen desorientatuta: buruan kolpeak jasotzen eta instintuz mugitzen ari nintzen", gogorarazi du.

Nafarroako presidenteak azpimarratu du eraso fisikoa jasaten zuen lehenengo aldia zela: "Kolpe gogorra sentitu nuen, mina. Inork ez nau jo lehenago, hau da lehenengo aldia".

Akusazioa

Fiskalak bost urteko espetxe zigorra eta 2.700 euroko isuna eskatu du auzipetuentzat, agintariaren aurkako atentatua egitea leporatuta. Akusazio partikularrak, berriz, bederatzi urteko zigorra eskatu du auzipetuetako batentzat, udal agintaria delako (Arruazuko alkateordea da), eta seikoa gainerakoentzat.

Protesta ekintza 2011. urteko urriaren 27an izan zen, Barcina Pirinioetako Lan Elkargoan (CTP) parte hartzen ari zela, eta Mugitu Abiadura Handiko Trenaren (AHT) aurkako plataformak aldarrikatu zuen.

Plataforma horrek auzia artxibatzea eskatu zuen, eta, epaiketa egitekotan, Frantzian egin beharko litzatekeela adierazi zuen.

Blanca Rodriguez fiskalaren arabera, lau auzipetuak CTPren ekitaldian izan ziren, eta, ekitaldia hasita zegoela, horietako bat Barcinari gerturatu zitzaion, eta "ezkutatuta zeraman tarta bat jaurti zion, ezustean eta modu bortitzean".

Barcina "zorabiatuta" zegoela, beste bi auzipetuk bi tarta gehiago bota zizkioten. Laugarren auzipetua eztabaida-mahaira hurbildu zen, "erasotzaileak babesteko".

Dagoeneko epaituta

Gonzalo Boye akusatuen abokatuak epaiketa Espainiako Auzitegi Nazionalean ez egitea eskatu zuen, hori Tolosako epaitegiari dagokiola argudiatuta.

Gainera, auzia dagoeneko epaituta dagoela esan zuen, Frantzian artxibatu egin zutelako ikerketa.

Auzitegi Nazionalak, baina, epaiketa egiteko eskuduntza duela erabaki zuen, eta Frantziako Justiziak auzia Espainian zabaldu zelako artxibatu zuela ikerketa gaineratu zuen.