Pradalesek humanismoaren alde egin du ziurgabetasunaren aurrean, Euskadiren "euskarri sendoena" delakoan

Imanol Pradales lehendakariak artikulu bat argitaratu du astelehen honetan LinkedInen, eta adierazi du humanismoa Euskadiren "euskarri sendoena" dela egungo ziurgabetasunaren aurrean. Pradalesek udako aste hauek aprobetxatzera gonbidatu ditu herritarrak, berak bezala, askatasun arduratsuari buruz hausnartzeko, eta komunitatearekiko konpromisoan lan egiteko, inor atzean utzi gabe.

Bere argitalpena Jose Maria Arizmendiarrieta apaiz eta Mondragon Korporazioaren sustatzailearen aipu labur batekin hasten da, lehendakariak gaur egun berreskuratzea beharrezkotzat jotzen duena: "Ez dago komunitaterik pertsonaren profila lausotzen den tokian". Hain zuzen ere, Trabajo y Unión argitalpenean utzi zuen idatzita adierazpen hori, 1964ko abuztuan. 

Ikasitakotik aurrera egitea

Horrela, garai hauetako "ezegonkortasun handiaren aurrean", lehendakaria gure aurrekoengandik ikastearen alde agertu da; izan ere, bizi ditugun egoerek gero eta segurtasun falta, hauskortasun eta zaurgarritasun sentipen handiagoa sortzen dute. "Gure tradizio soziopolitikoak erakusten digu gure betebeharra dela humanismoa eguneratzea, estualdi honetan ere, gure euskarri sendoena izan behar baitu", nabarmentzen du bere idatzian.

Horregatik, euskal autogobernuan aurrera egiten jarraitzearen alde egin du, garapen-aukerak sortzen jarraitzeko. Ildo horretatik, Pradalesek 1979ko Gernikako Estatutua onartu zenetik erabilitako eredua jarri du balioan, lehiakortasuna, oreka eta gizarte-kohesioa uztartzea ahalbidetu baitu, euskal komunitatea eraikitzen eta erronka handiei aurre egiten laguntzearekin batera.

Askatasun arduratsua

Agirre lehendakariari dagokionez, gogorarazi du pertsonalismoan oinarritutako printzipioak defendatu zituela, totalitarismoaren eta faxismoaren aurrean, eta gizakia jarri zuen erdigunean, "gizartearekiko konpromisotik garatuta norbere osotasuna lortzeko". Testuinguru horretan, Pradalesek haren legatua goraipatu du, baita askatasun arduratsuari egindako ekarpena ere, "bazekien herri kohesionatu eta erresilientea zela babeslekurik onena zorigaitzaren aurrean, bai eta etorkizunerako berme bakarra ere".

"Diktadura frankistaren ondoren autogobernua berreskuratzearekin batera, gure herriak suspertzea lortu zuen, bere tradizioan ainguratutako kultura soziopolitiko horri berriro helduz", azpimarratu du Pradalesek."Konfiantza osoa dut euskal gizartean, denok eskutik helduta eta helburu komun batekin lan eginez, hori lortzeko gai izango gara", gaineratu du.