Mobilizazio historikoa Bilbon, bake prozesuaren alde
Bilbok manifestazio historikoa hartuko du gaur; izan ere, alderdi politiko eta sindikatu abertzale guztien babesa izango du, eta helburua bake prozesua indartzea eta giza-ezkubideak eta akordioa aldarrikatzea izango da.
Larunbat honetarako manifestazio "isila" deitu dute EAJk eta Sortuk, Tantaz Tanta plataformak presoen alde antolatutako martxa Eloy Velasco Auzitegi Nazionaleko epaileak debekatu ostean.
Andoni Ortuzar EAJko eta Hasier Arraiz Sortuko presidenteek agerraldi bateratua egin zuten atzo Bilboko Carlton hotelean deialdiaren berri emateko.
Manifestazioaren leloa "Giza eskubideak. Konponbideak. Bakea" izango da. Aralarrek, Eusko Alkartasunak, Geroa Baik, Alternatibak eta ELA eta LAB sindikatuek mobilizazioarekin bat egin dute. Mobilizazioa Casillatik abiatuko da 18:00etan. Era berean, azken orduetan Udalbiltzak ere egin die 1.000tik gora kideei ekitaldian parte hartzeko, eta Etxeratek eta Lokarrik ere bat egin dute deialdiarekin.
Adolfo Muñoz eta Ainhoa Etxaide ELA eta LAB sindikatuetako idazkari nagusiek, Rebeka Uberak (Aralar), Amaia Agirresarobek (Alternatiba) eta Alberto Unamunzagak (EA) Arraiz eta Ortuzar lagundu zituzten EAJ eta Sortu atzoko agerraldian.
Arraizek euskaraz eta Ortuzarrek gazteleraz adierazpen bat irakurri zuten. Manifestazio isilean parte hartzeko dei egin eta "giza eskubideen urraketaren eta salbuespen neurri negatiboen aurrean" agertoki berria sendotu behar dela erantsi zuten. Horregatik, mobilizazioaren leloak aldarrikatzen dituen helburuak lortzeko herritarren lana eskatu zuten.
Bestalde, CCOO-Euskadiren azken hiru idazkari nagusiek, Santiago Bengoak, Josu Onaindik eta Unai Sordok, manifestazioan parte hartzeko deia egin ez badute ere, sindikatuko "militante asko" bertan izango direla aitortu dute. Gainera, gogor kritikatu dute Espainiako Gobernua "ETAren amaieran eta normalkuntza politikoan" egiten ari den lana, "zentzugabekeria" delakoan.
ERC eta CuP alderdi kataluniar independentistek ere babesa agertu diote gaurko ekitaldiari, eta bertan izango dira hainbat kide eta jarraitzaile.
Manifestazio isilean parte hartuko ez duela iragarri du, berriz, Eusko Jaurlaritzak. Hala ere, deialdiaren aurrean erabateko "errespetua" agertu du, nahiz eta Jaurlaritzako ordezkaritzarik ez bidali.
Manifestazio berria debekatzeko dagoeneko Auzitegi Nazionalaren aurrean salaketa aurkeztu du Terrorismoraen Biktimen Elkarteak (AVT).
'Herri mailako erantzuna eskatzen zuen herriak'
Indar abertzaleek gaurko deitu duten manifestazioaz hitz egin dute Joseba Egibar eta Pernando Barrena EAJ eta Sortuko presidenteak, hurrenez hurren, Euskadi Irratiko Goiz Kronika saioan. Azken egunotako polizia operazio eta debekuen aurrean, iritzi eta balorazioetatik haratago, "herriak erantzun bat" eskatzen duela ikusita etorri da erantzun bateratua, bien buruzagion hitzetan. Erdigunean, beraz, Euskal Herrian zabaldu den aro berria jarri dutela nabarmendu dute.
"Oinarrizko eskubideen defentsa"
Uxue Barkos Geroa Bairen diputatu eta buruzagiak esan du "oinarrizko eskubide zibilen defentsa" aldarrikatuko delako babestu dutela manifestazioa.
"Hori esanda, ETAk eta PPk bake iraunkorra lortzeko urratsak" egin behar dituztela iritzi dio agintari nafarrak.
Albiste gehiago politika
Salbuespenezko kartzela-politikaren ondorioak ofizialki aitor ditzatela eskatu du Egiari Zor Fundazioak
Egiari Zor Fundazioak Joxerra Goikoetxea gogoratu du Loiun, espetxean hil zela 40 urte bete direnean. Lau hamarkada hauetan 36 preso eta 16 senide espetxe politikaren ondorioz hil direla salatu dute.
Salbuespenezko kartzela-politikaren ondorioak ofizialki aitor ditzatela eskatu du Egiari Zor Fundazioak
Egiari Zor fundazioak ekitaldia egin du larunbat honetan Loiun, Jose Ramon Goikoetxea Bilbao ETAko kide izandakoaren herrian, Alcala Mecoko kartzelan hilda agertu zenetik 40 urte bete direnean. 50 eguneko inkomunikazio aldiaren ondoren hilda agertu zela gogoratu du Egiari Zor fundazioak. 24 urte zituen eta lau urte zeramatzan preso. Goikoetxea presoaren heriotza ekidin zitekeela salatu du Egiari zor fundazioak eta azken 40 urteotan kartzelan hil diren 36 presoen heriotzak aitortuko dituen legea aldarrikatu du Pilar Garaialde bozeramaileak: “Azken 40 urteetan, demokrazia deritzon garai honetan zehar, 36 euskal preso politikok eta 16 senidek galdu dute bizitza egoera ezberdinetan, sistematikoki aplikatu diren salbuespen neurrien ondorioz. Horiez gain, beste bi pertsonak bere buruaz beste egin zuten kartzelatzea saihestu nahian”, gogoratu du Pilar Garaialdek. “Osasun arreta ukatzea, isolamendu luzeak, komunikazioen interbentzioa, kartzelako bizitza baldintza gogorrak etab.” aipatu ditu Garaialdek eta espetxe sistemak eragindako zuzeneko eta zeharkako biolentzia oro errekonozitzeko beharra azpimarratu du. EAEko Aitortza eta Erreparaziorako Euskal legeak ez dituelako jasotzen sakabanaketa eta urruntze politikak eragindako edo hildako senide eta lagunen kasuak salatu du Garaialdek eta egoera hori zuzentzeko eskatu du.
Ibarrolaren arabera, "Chiviteren irtenbide duin bakarra" dimisioa da
Cristina Ibarrola UPNko presidentearen esanetan, "susmopean eta gainbeheran dagoen gobernu baten gidaritzari" eusten dio Maria Chivitek. "Haren ibilbide politiko osoa altxatu, zuzendu eta kontrolatu dutenak erori dira: Cerdan eta Alzorriz. Berak eusten dio oraindik, baina badaki eroriko dela, ezingo duela saihestu", erantsi du.
EAJk "argitasuna" eta "azalpenak" eskatu dizkio PSOEri
EAJ Nafarroan duela 115 urte ezarri zela ospatzeko Iruñean egindako ekitaldian, Aitor Estebanek EBBko presidenteak azalpenak lehenbailehen eman ditzala esijitu dio Pedro Sanchez Espainiko Gobernuko presidente sozialistari. Jeltzaleek ez dutela egoeraz baliatuta etekinik atera nahi esan du Estebanek, eta duintasun demokratikoa babestea dela euren helburua.
Anduezak esan du euskal sozialismoa "zintzotasunaren eredu" dela
Eusko Jaurlaritzaren lehen urtearen balantzea egiteko Barakaldon egindako ekitaldian euskal sozialisten idazkari nagusiak azpimarratu duenez, "ekintzekin" frogatu da PSE-EEren hauteskunde-programa "ez zela ideien zerrenda hutsa, euskal gizartearekiko benetako konpromisoa baizik".
Ibarrola (UPN): "Chiviteren gobernua azkenetan da, eta irtenbide duin bakarra dimisioa da"
UPNko presidentearen hitzetan, PSNren zuzendaritzaren "duintasuna galdu da jada", baina "Nafarroaren eta nafarren duintasuna jokoan dago, eta horri eutsi egin behar zaio".
Gorenak Cerdan inputatu du eta ekainaren 30erako deitu du bere deklarazioa
Epaileak bost enpresaburu ere deitu ditu deklaratzera ikertu gisa. Esleipenen truke ustez legez kanpoko eskupekoak ordaindu zituzten enpresen administratzaileak dira.
Ainhoa Unzuk ordezkatuko du Ramon Alzorriz PSNren Parlamentuko bozeramaile bezala
Unzuk iragarri duenez, lehenik eta behin, "nire talde parlamentarioko kide bakoitzarekin hitz egingo dut, erabakia ezagutzen baitute", eta, ondoren, Foru Gobernua osatzen duten gainerako talde politikoen bozeramaileekin.
UCO Ferrazen sartu da, epaileak aginduta, Santos Cerdanen posta klonatzeko
Ikerketako iturriek jakitera eman dutenez, agenteak PSOEren egoitzara, ADIFen instalazioetara eta Errepide Zuzendaritza Nagusira joan dira, Leopoldo Puente Auzitegi Goreneko epaileak eskatutako informazioa eskatzeko.
UCO Ferrazen sartu da, epailearen aginduz, Cerdanen posta klonatzeko
Ikerketako iturriek jakitera eman dutenez, agenteak PSOEren egoitzan, Adifen instalazioetan eta Errepide Zuzendaritza Nagusian sartu dira, Leopoldo Puente Auzitegi Goreneko epaileak eskatuta.