Larrauri: 'Laguntza guztiak araudia errespetatuta eman ziren'

Edorta Larrauri Eusko Jaurlaritzako TeknologIa zuzendari ohiak adierazi duenez, 'Hiriko' auto elektrikoari ikerketa eta garapenerako (I+G) emandako laguntza publikoak araudia "zorrotz beteta" eman ziren.

Larraurik 'Epsilon' eta 'Hiriko' proiektuetarako laguntzak aztertzen dituen ikerketa batzordearen aurrean hitz egin du.

Bertan adierazi duenez, Jaurlaritzan izandako denboran emandako laguntzen berri bakarrik hitz egin dezake (2009 eta 2013 artean), eta 'Hiriko' proiektuaren diru-laguntzek "araudia zorrotz bete zuten".

'Epsilon'i dagokionez, ekimen "oso handia" iruditu zitzaiola azaldu du, Arabako Teknologi Parkeko egoísta bisitatu zuela, I+G laguntzak eskuratzeko proiektuak aurkeztu zituela eta ziur zela laguntza horiek "aurkeztutakoarekin bat zetozela".

Larraurik onartu egin du Jaurlaritzak laguntzak eskatzen dituzten enpresa guztien "borondate ona" aurretik jakintzat ematen duela. Hala ere, kontrolerako tresnak hobeak izan daitezkeela ere onartu du, baina kontrol hori zorrotzagoa izateko "baliabide administratiboa asko hazi beharko litzatekeela" ohartarazi du.

Eusko Legebiltzarrean Epsilon eta Hiriko egitasmoei emandako diru-laguntza publikoak aztertzeko batzordeko lehendabiziko agerraldiak 9:30ean hasi dira.

Diru publikoa "zuzen" erabili ote zuten aztertzen ari dira, 15 pertsonaren agerraldiekin. SPRIko zuzendaria izango da horietako bat, eta Euskadiko Parke Teknologikoen presidente ohia izango da beste bat. Biek ateak itxita egin dituzte euren agerraldiak, hala eskatuta.

Brotonsek batzordean sartu aurretik adierazi duenez, berak aurkeztutako txostenak teknikoak ziren eta ez du haien edukia gogoratzen.

Telletxea

Iñaki Telletxea Eusko Jaurlaritzako Teknologia eta Industria Garapenerako sailburuorde ohiak onartu egin du Epsiloni emandako diru-laguntza publikoetan ez zela eskatu funts propiorik izatea, eta egitasmoa % 90ean ordaintzen zela diru publikoarekin.

Telletxeak ere agerraldia egin du ikerketa batzordean, eta egitasmoaren gaitasuna defendatu du. Onartu egin du ez zituztela funts propiorik behar, baina azaldu du garai hartan ohikoa zela egoera hori. Sailburuorde ohiak esan duenez, Jaurlaritzak legea bete zuen laguntzen kontrola egiterakoan. "Edozein Gobernuk gauza bera egingo zukeen", gaineratu du.

Sailburuorde ohiaren hitzetan, 2008an hasi zen proiektuaren ''gainbehera'', krisiak bultzatuta. Epsilonek beste bi urte izanez gero, aurrera aterako litzakeela ere esan du Telletxeak.

Bestalde, Miñaoko egoitza berriro erabiliko dutela iragarri du. "Eratorri daitezkeen erantzukizun politikoak argitzea" izango du helburu aipatutako batzordeak, automobilen munduarekin lotutako bi proiektu horiek porrot egin ondoren.

Joan Villadelprat

Epsilonek 46,1 milioi euroko laguntza jaso zuen, eta enpresak porrot egin zuen. Joan Villadelprat kudeatzailea zigortu egin zuten.

Agerraldi horien bezperan, Epsiloni buruz egin duen txosten ofiziala kaleratu du Herri Kontuen Euskal Epaitegiak. Epaitegi horrek ez du legez kanpoko ezer atzeman, baina, Martinez Churiaque presidenteak boto partikularra eman du, hainbat kritika jasoz.

Boto partikularraren arabera, hutsuneak eta aztertu gabeko zantzuak egon badaude, Epsilon eta Hiriko proiektuek jaso zituzten diru-publikoen ikerketan.

Hala ere, Herri Kontuen Euskal Epaitegiak onartu duen ebazpena beste bat da, EAJk eta PSE-EEk bertan dituzten ordezkariek bultzatuta. Txosten ofizialaren arabera, beraz, lege barruan dago Epsiloni emandako laguntza publikoekin gertatutakoa.

Automobilgintzari lotutako bi proiektu izan ziren Epsilon eta Hiriko (Bat Formulan lehiatzeko asmoz sortutakoa bata eta auto elektrikoa egiteko bestea), eta 60 milioi euro jaso zituzten laguntza moduan, baina porrot egin zuten biek.