Jendetza Baionan,presoen eskubideen eta bakearen aldeko manifestazioan

Milaka eta milaka pertsonak parte hartu dute Baionako kaleetan bake prozesuaren alde urratsak emateko eta presoen eskubideak errespetatzea eskatzeko egin den manifestazioan. Bake Bidea plataformak antolatutako martxak gisa honetako ekimen batek inoiz lortutako babesik handiena lortu du.

Manifestazioa 17:00etan abiatu da Lapurdiko hiriburuko Lauga kiroldegitik, eta bertan 8.000 lagunek parte hartu dute manifestazioan, antolatzaileen arabera.

Amaieran, Isabelle Pargadek eta Peio Ospitalek hartu dute hitza. Hasteko, euskal iheslariek eta preso politikoek gatazkaren konponbiderako egindako ekarpena txalotu dute. Segidan, gaurko manifestazio jendetsuaren balorazioa egin dute, eta gaurkoa bakerako eta gatazkaren konponbiderako pauso bat gehiago dela azpimarratu dute. Azkenik, Frantziako estatuari dei egin diote gatazkaren konponbidean engaia dadin.

Euskal Preso Politikoen Kolektiboak ohar bat kaleratu du, eta horren arabera, "adierazpenetik haratago urrats erabakigarria egiteko garaia da. Makurkeria alboratu eta luzamendu gehiago gabe sakabanaketa eta espetxe politika honekin amaitzeko erabakitasunarena". Bide horretan, eragile politikoei eta erakundeei "erabaki politiko-instituzionalak" hartzeko dei egin die. Halaber, herriari mobilizatzeko eskatu diote "presio bideak garatzeko" eta oinarrizko eskubideen urraketarekin amaitzeko.

EPPKren esanetan, "Giza eskubideak, konponbidea, bakea erreakzioak segida eskatzen du. Euskal Herriratze eskabideek erantzun positiborako espazioa soilik izan behar dute". Bestalde, gatazkaren ondorioen atal guztiak arrakastaz garatzeko eta konponbideari ateak irekitzeko dinamika horrekin jarraitzea ezinbestekoa dela adierazi du kolektiboak.

Amaitzeko, EPPK-k bere erabaki guztiak berresten dituela adierazi du. "Gure posizio politiko berriak ibilbide emankorra eskaintzen duela sinetsita gaude", gaineratu du.

Gabi Mouesca EPPK-ko ordezkariak lehen balorazioa egin du manifestazioaren amaieran, eta gaurko martxa "historikotzat" jo du "agerian geratu den aniztasun politikoagatik".

Bestalde, gaurko egunean François Hollande Frantziako presidenteari dei egin diote espetxe politika aldatzeko eta presoen eskubideak babesteko.

Inoizko batasun irudirik handiena

Giza eskubideak, bakea, konponbidea lelopean abiatutako martxak Ipar Euskal Herriko ordezkari politiko gehienen babesa jaso du, eta 200 hautetsi baino gehiagok parte hartu dute bertan; tartean, erregioak Frantziako Kongresuan eta Senatuan dituen sei ordezkarietatik bost. Manifestazioak Ipar Euskal Herrian instituzioek sekula eman duten sostengurik handiena lortu du.

Horren moduko ekimen batek inoiz lortutako babesik handiena lortu du Bake Bideak deitutakoak.Babesa agertu dioten politikari batzuk:Sylviane Alaux Frantziako Alderdi Sozialistako diputatua, Pirinio Atlantikoetatik; Colette Capdevielle Frantziako Alderdi Sozialistako diputatua, Pirinio Atlantikoetatik; Jean Lassalle MoDem alderdiko diputatua, Pirinio Atlantikoetatik; Frederique Espagnac PSFren senataria Pirinio Atlantikoetatik eta Jean Jacques Lasserre MoDem-eko senataria Pirinio Atlantikoetatik. Azken orduan, Jean Ziegler Nazio Batuen Erakundeko (NBE) Giza eskubideen komite kontsultatiboko lehendakariordeak ere babesa eskaini dio manifestazioari.

Manifestazioarekin bat egiteaz gain, Aieteko bideari ekin behar zaiola azpimarratu zuten orain dela aste pare bat agerraldi bat egindako hautetsiek. Frantziako eta Espainiako estatuek prozesua blokeatu dutela azpimarratu ondoren, blokeo egoera gainditu eta urratsak emateko eskatu zuten.

Halaber, presoen eskubideak errespetatzea eskatu zuten; alegia, gaixorik dauden presoak aske uzteko, espetxe-politika aldatzeko...