Hauteskunde eguna dute Aragoin, PP-Vox lehia nola geratuko den ikuskizun

Extremadurari lekukoa hartuta, hauteskunde autonomikoak dituzte gaur Aragoin. Ikuskizun dago aurreko deialdiak utzitako botere banaketa bere horretan mantentzen den eta horrek "blokeoa" areagotzen duen. Izan ere, Jorge Azcon (PP) presidenteak bozak aurreratu zituen, Voxekin 2026ko aurrekontuak ezin adostuta. 

Inkesten arabera, Alderdi Popularrak irabaziko ditu berriro hauteskundeak, baina gehiengo osorik gabe. Hala, eskuin-muturra beharko luke, beste behin ere, gobernatzeko. Auzia da zenbateraino baldintzatuko duen Voxek PPren jarduna.

CISek aurreikusitakoa betez gero, 25-29 eserleku lortuko ditu PPk (28 izan ditu aurreko legealdian). PSOEk bigarren lekuari eutsiko dio, babesak galduta: 17-23 diputatu (23 izan ditu). Voxek gora egingo du, 10-13 ordezkari lortzeraino (7 lortu zituen aurreko hauteskundeetan). Chunta Aragonesista (CHA) alderdiak ere ordezkaritza handituko du: 3-5 eserleku aurreikusi dizkiote (3 izan ditu). IU-Sumar Mugimendua izango da bosgarren indarra, 1-3 ordezkarirekin. Podemosi, aldiz, 0-1 ordezkari aurreikusi dizkio CISek. Teruel Existek babesa galduko du, 1-2 eserleku eskuratuta (3 izan ditu). Baliteke PAR (Partido Aragones) alderdia Aragoiko Parlamentutik kanpo geratzea. 

Guztira, 1,03 milioi herritarrek dute botoa emateko eskubidea, eta 67 diputatu aukeratuko dituzte: 35 Zaragozan, 18 Huescan eta 14 Teruelen. 

Jorge Azcon PPko hautagai eta jarduneko presidentea izan da botoa ematen lehena. Minutu batzuk geroago, gauza bera egin dute Pilar Alegria PSOEko hautagaiak eta Marta Abengocheak (IU-Sumar).  

Mar Vaquero jarduneko Aragoiko presidenteordeak azaldu duenez, hauteslekuak "normaltasunez" zabaldu dituzte eta gorabeheraren bat izan bada ere, ez da oso aipagarria izan, eta mahaiak arazo barik osatu dira. 

Lehen emaitzak 21:30ean kaleratuko dituzte. Abstentzioa izango da, berriro, hauteskunde hauetako gakoetako bat (% 33koa izan zen aurrekoetan). Hain justu, parte hartzeko deia egin dute hautagai guztiek, neguko eguraldiak eragina izango duelakoan. 

Lokaztutako kanpaina

Aragoiko hauteskunde kanpaina gorabeheratsua izan da oso, eta ohikoak izan dira hautagaien arteko gaitzespen eta eraso pertsonalak. PP eta Vox elkarrekin lehian aritu dira boto kontserbadorea lortzeko borrokan. Feijook eta Azconek Zaragozan egin zuten kanpaina amaierako ekitaldian, eta leku berean, Alderdi Popularreko Belaunaldi Berriek gonbidatuta, Vito Quiles ultraeskuindarrak hitzaldia egin zuen. Bere ohiko estiloan, Oscar Puente Garraio ministroa iraindu zuen ("simio" deitu zion), eta, sare sozialen debekua tarteko, gazteek Sanchez "pinu batetik zintzilik" nahi dutela nabarmendu. 

Aragoiko hauteskundeek Espainiako politikagintzan eragin zuzena dutela jakinda, PP, PSOE, Vox eta Podemoseko buruak (Feijoo, Sanchez, Abascal eta Belarra) hainbatetan izan dira euren hautagaiak (Jorge Azcon, Pilar Alegria, Alejando Nolasco eta María Goikoetxea hurrenez hurren) babesten. 

Pilar Alegria sozialistak PPren "muturreko" jarrera salatu du, eta parte hartzeko deia egin die herritarrei, "bi eskuinei mesede ez egiteko". Inkestek aurreikusten dizkioten emaitzak hobetzea espero du Hezkuntza ministro izandakoak.

Ezkerrean, zatiketa lege. IU-Sumar eta Podemos nor baino nor gehiago ibili dira ezkerreko boto-emaileak limurtu nahian. Bereziki CHAk ditu inkestak alde, eta "Madrilen menpe" ibili beharrean, Aragoik "botere propioa izateko alternatiba bakarra" bera dela defendatu du. Ildo beretik mintzatu da Aragon-Teruel Existe koalizioa. "Estatuko alderdi handiek gurera etorri dira euren gaiei buruz hitz egitera, eta Aragoiko arazoak ez dituzte aipatu ere egin", salatu du. 

Azkenik, PAR alderdia inkestei buelta ematen saiatuko da, gehienek ordezkaritza galduko duela baitiote.