51 pertsona, tartean Granados, atxilotu dituzte ustelkeriagatik

Auzitegi Nazionalak aginduta, ustelkeriaren kontrako operazioa jarri du abian Guardia Zibilak, Madrilen, Murtzian, Leonen eta Valentzian: denera, 51 pertsona atxilotu dituzte, obrak esleitzearen truke eskupekoak ordaindu edota kobratu dituztelakoan.  Tartean da Francisco Granados Madrilgo Erkidegoko presidenteorde izandakoa.  Ustelkeriaren kontrako Fiskaltzak uste du sare bat osatzen zutela atxilotutakoek, eta Estatu Espainiarreko hainbat udaletan eta erkidegotan aritzen zirela. Punica izena jarri diote operazioari.

Atxiloketak ez ezik,  259 bulego eta lokal miatu dituzte, diru-kontuak blokeatzeko 400 bat agindu helarazi zaizkie hainbat finantza erakundeei eta 30 bat luxuzko ibilgailu enbargatu dituzte.

Fiskaltzaren arabera,  sarekadan atxilotutakoek hainbat udaletako eta erkidegoetako zinegotziekin eta funtzionarioekin elkar hartuta, kontratu  publikoen esleipenak eraikuntzako edota energia alorreko enpresaburuen artean esleitzen zituzten. Sareak egindako operazio eta kontratuetan 250 milioi euro elkar-trukatu direla uste da. "Hainbat udaletan eta erkidegotan infiltratutatutako sarea da",  ikertzaileen iritzian.

Eloy Velasco magistratuak agindutako operazioa sekretupean dago, eta datozen egunotan atxiloketa eta miaketa gehiago egon daitezkeela iragarri dute.

Atxilotutako beste bat Marcos Martinez buruzagi popularra da, Leongo Diputazioko presidentea. Maiatzean  Isabel Carrasco presidentea hil ondoren hartu zuen kargua.

Madrilgo sei udalerritako alkateak ere atzeman ditu Poliziak, ustelekeria sareakin lotura dutelakoan: Valdemoro, Collado-Villalba, Parla, Torrejon de Velasco, Casarrubuelos eta Serranillos del Valle herrietako alkateak daude atxilotuta.

Valdemoroko Udala miatu du Guardia Zibilak. Argazkia: EFE

Ikerketako iturriek jakitera eman dutenez, sarea osatzen zuten kideak aberastea zen helburua, eta ez alderdiak finantzatzea. Hiru alderdi politikoetako ordezkariak daude atxilotuen artean: PP, PSOE eta UDMA alderdietako udal ordezkariak ete erkidegoetako gobernuetan ardura politikoak dituztenak daude atxilotuen zerrendan. Desegindako sareko kideek ustez politikarien eta enpresaburuen arteko bitartekari lana egiten zuten, kontratu publikoak bideratzeko.

Guardia zibil bat inputatuta

Guardia Zibileko agente batek ohartarazi zion Granadosi Ustelkeriaren kontrako Fiskaltzak eta Auzitegi Nazionalak bere operazioen gaineko ikerketa abiatu zutela, epaitegietatik adierazi dutenez.

Ustelkeria sare honen gaineko ikerketan, zenbait inputaturi telefonoa zulatu zieten, eta orduan agenteek jakin zuten guardia zibil batek Granados jakinaren gainean jarri zuela.

Agentea sekretuak ezagutaraztea delitua leporatuta inputatu dute, baina ez dago gaurko atxilotuen artean.

Ikerketa urtarrilean abiatu zen

Suitzako  Gobernutik erreguzko mandatua jaso zuen, urtarrilean, Auzitegi Nazionalak,  diru-zuriketa zantzu larriak atzeman zirela esanez.  Hori dela eta,  Ustelkeriaren Kontrako Fiskaltzak ikerketa jarri zuen abian, Estatuko Zerga Agentziarekin eta Guardia Zibilarekin elkarlanean.

Ikerketan jasotako informazioarekin helegitea jarri zuten, eta Velasco epaileak ekainean diligentziak zabaldu zituen, ondorengo delituak egon zitezkeela iritzita: kapitala zuritzea, dokumentuak faltsutzea, iruzur fiskala, funtzionario-eroskeria, diru publikoa bidegabe erabiltzea, prebarikazioa, sekretupeko informazioa zabaltzea edota administrazioaren aurkako iruzurra.

Otsailean dimititu zuen Granadosek

Duela zortzi hilabete utzi zituen Granadosek Madrilgo Erkidegoko diputatu kargua eta senatari kargua. Suitzan diru-kontu bat zuela zabaldu eta berehala eman zuen dimisioa. Hainbat hedabidek jakitera emandakoaren arabera, 1,5 milioi euro zituen Granadosek Suitzan gordeta.

Granadosek ukatu egin zuen ardura politikoa izan zuen urteetan Suitzan dirua gorde zuenik. Dena dela, onartu zuen aurretik, kargudun izan baino lehen, Suitzako banketxe baten dirua izana.

Adierazpenok egin eta hurrengo egunean, politika utziko zuela iragarri zion Alderdi Popularrari Granadosek, "lintxamendu baten biktima" zelako.  Suitzan gordeta zuen dirua erabat garbia zela eta bere ekimen pribatu bati zegokiola gaineratu zuen.

Francisco Granados Lerena  Esperanza Aguirreren konfiantzazko gizona izan zen Madrilgo Erkidegoko Gobernuan.

Alderditik kanporatuak

PPk eta PSOEk iragarri dute alderditik kanporatuko dituztela gaurko polizia-operazioan atxilotutakoak.

Hori horrela, Alderdi Popularrak arratsaldean kanporatu ditu atxilotutako militanteak, eta dimisioa emateko exijitu die. Horixe azpimarratu du Esteban Gonzalez Pons PPren agintariak, kargua "berehala uzteko" exijituko dietela zehaztu aurretik.

PSOEri dagokionez, Jose Maria Fraile Parlako alkatea alderditik kanporatu dute, atxilotua izan ostean. Cesar Luena PSOEren Antolakuntza idazkariak azaldu duenez, "atxilotuta dagoen bitartean gutxienez" alderditik kanpo egongo da alkate madrildarra, eta kargua uzteko eskatu diote.