Bartzelonako Meridiana gainezka, Kataluniako Errepublikarako bidean

Beste manifestazio izugarri bat egin dute Bartzelonan, Kataluniaren independentzia eskatzeko, Diada  eguna aprobetxatuta. Ehunka mila lagun elkartu dira eta Meridiana etorbidea gainezka izan da, 'Eman bidea Kataluniako Errepublikari' lelopean egindako mobilizazioan.

Manifestazioa Kataluniako Asanblada Nazionalak (ANC) deitu du eta bertan izan dira Junts pel Si eta CUPeko hautagaitzetako ordezkariak.

Antolatzaileen arabera, bi milioi pertsona izan dira mobilizazioan; Bartzelonako Udaltzaingoak emandako datuak aintzat hartuta, berriz, 1,4 milioi.

Aurretiaz, 500.000 pertsonek eman zuten izena Meridiana etorbideko zati ezberdinak beteta egoteko. Erdigunean sei metroko zabalera zuen tartea utzi dute, eta, 17:14ean manifestazioa abiatu da, aurretik zenbait kirolarik gezi erraldoi bat zeramatela. Sinbolo horren bitartez Kataluniako Errepublika eraikitzeko bidea zein den adierazi nahi izan dute.

Diada guztiak dira bereziak Katalunian, baina aurtengoak Kataluniako historian izan den hauteskunde kanpaina garrantzitsuenaren hasierarekin bat egin du, eta, ondorioz, gaurko mobilizazioak hauteskunde kutsua izan du.

Raul Romeva Junts pel Si hautagaitzako zerrendaburuak Kataluniako herritarren gehiengoarenganako ?errespetua? eskatu du eta gogora ekarri du laugarren aldia dela Bartzelonako kaleetan jende oldea biltzen dela. Era berean, ?hauteskundeetako emaitza errespetatzea ezinbestekoa da, hau behetik gora doan mugimendua baita?, erantsi du.

?Beste urte betez erakutsi dugu mobilizaziorako ahalmen izugarria daukagula?, nabarmendu du.

ANCk eta Omniumek ?leialtasuna? eskatu diete diputatuei

Manifestazio bukaeran egindako ekitaldian, ANCko Jordi Sanchezek eta Omnium Culturaleko Quim Torrak hartu dute hitza. Irailaren 27ko hauteskundeen ostean diputatu izango direnei emaitzekiko ?leialtasuna? eta oztopoen aurrean ?amore ez emateko? eskatu diete.

Sanchez ziur agertu da hauteskundeetan independentziaren aldekoak nabarmen nagusituko direla. ?Hauteskundeetan erabakitakoaren aurrean leialak izan beharko dira diputatu berriak, ausartak izatea eta guri hutsik ez egitea eskatzen diegu?, adierazi du.

Horrez gain, ?Katalunia berria munduari irekia, eskuzabala eta ustelkeriarik gabekoa? izan behar dela aldarrikatu du.

?Prozesu independentistaren hasiera aldarrikatzen duzuenean zuen ondoan egongo gara; une zailak iristen badira, zuen ondoan izango gara; eta Errepublikaren Konstituzioan idazten duzuenean, zuen ondoan izango gara?, azpimarratu du Torrak.

Agertoki nagusiaren aurrean alderdi soberanistetako ordezkariak izan dira, besteak beste, Josep Rull (CDC), Oriol Junqueras (ERC), Antonio Baños (CUP) eta Raul Romeva eta Lluis Llach (Junts pel Si).

Bestalde, hainbat pertsona ezagunek hartu dute parte gaurko manifestazioan, hala nola, Gerard Pique FC Bartzelonako jokalaria, Xavier Sala i Marti ekonomialaria, Joan Laporta FC Bartzelonako presidente ohia eta Juanjo Puigcorbe aktore eta ERCko zinegotzia Bartzelonako udaletxean.

Gaurkoa ANCk antolatzen duen laugarren manifestazio erraldoia da. 2012ko Diadan jendetza bildu zuten Bartzelona erdigunean; 2013an, giza-kate batek Katalunia iparraldetik hegoaldera zeharkatu zuen; eta iaz, Bartzelonako Kale Nagusia eta Diagonala betetzea lortu zuten.

Masek Espainiako Gobernuari: ?Irudei erreparatu diezaietela?

Artur Masek ez du manifestazioan parte hartu, baina ondoren, 20:00ak inguruan, harrera egin die antolatzaileei, Jordi Sanchezi (ANC) eta Quim Torrasi (Omnium Cultural), Generalitateko Jauregian.

Bileraren ostean egindako agerraldian, Generalitateko presidenteak ?harrotasuna? eta ?ilusioa? adierazi ditu, arratsaldeko mobilizazioa izugarria izan delako, eta Estatuari ?harrotasun inperiala? albo batean uzteko eta ?lege berriekin mehatxurik ez? egiteko exijitu dio.

Espainiako Gobernuari eta Estatuko erakundeei manifestazioko irudiak aintzat hartzeko eskatu die. ?Gaurko irudiek ez dute hitzik behar?, azpimarratu du.

?Utzi albo batean miopia politikoa eta harrotasun inperiala; utzi legeekin mehatxu egiteari eta gu gaizkileak baikina bezala tratatzeari. Pertsona normalak gara, lasaiak, baketsuak eta ilusioz beteak. Legeak elkarrizketaren zerbitzura jarri, demokraziaren zerbitzura, eta uneren batean legeren bat aldatu behar bada, alda dezagun guztion artean, ez da ezer gertatuko, mundua ez da hondoratuko?, azaldu du.

Kataluniak mobilizatzeko duen ?ahalmen handia? ere nabarmendu du. ?Mezu ikaragarria bidali diegu Europari eta mundu guztiari?, erantsi du.

Amaitzeko, Katalunian ?abian? dela esan du, eta prozesu soberanista ez dela inoren aurkakoa, ?ezta Espainiaren kontrakoa ere?, gogoratu du.

Lore-eskaintzak

1714an, Espainiako Oinordetza Gerran, Bartzelona erori zenekoak gogoan hartzeko ekitaldiak goizean hasi dira, Rafael Casanova orduko alkatearen monumentuaren aurrean, lore-eskaintzak eginez. Artur Mas Kataluniako presidentea, gobernuko kontseilariak ondoan zituela, izan da eskaintza egiten lehena. Ondoren etorri dira gainerako erakundeen, alderdien eta elkarteenak ere.

Euriak tregoarik eman ez duen goizean, Ada Colau Bartzelonako alkateak edo Nuria de Gispert Parlamentuko presidenteak izan dira, besteak beste, lore-eskaintza egiten. Erakundeetako ordezkariak ez ezik, hauteskundeetara aurkeztuko diren hautagaitzak ere izan dira ekitaldian: Junts pel Si, Catalunya Si que es Pot, PSC eta Unio. PPk eta C'sen ez dute lore-eskaintzarik egin.

Horrez gain, euskal ordezkaritza zabala izan da Bartzelonan, besteak beste, EAJ eta Sortuko presidenteak edo EAko buruzagiak.