'Itzalaldi exekutiboa'ri amaiera eman zaiola esan du Barkosek

Nafarroako gobernu berriak haren lehen 100 egunetan "itzalaldi exekutiboa"ri amaiera eman diola esan du Uxue Barkos Nafarroako gobernuko presidenteak. Haren hitzetan, Nafarroak gobernu itzalaldia pairatu du azken urteetan.

Uxue Barkos Nafarroako gobernuko presidenteak agintaldiko lehen 100 egunen balorazioa egin du prentsaurrean.

"Uztailaren 23an aldaketa lasaia eta integratzailea egiteko bokazioarekin hasi genuen gure ibilbidea eta gaur egun errealitate bihurtu da", azpimarratu du Uxue Barkosek. Agintaldiko lehendabiziko 100 egunetan hartutako neurrien berri eman du Nafarroako Gobernuko presidenteak Manu Aierdi Ekonomiaren Garapenerako lehendakariordearekin eta Miguel Laparra Gizarte eskubideen lehendakariordearekin batera eskainitako prentsa agerraldian.

Barkosek azpimarratu du Nafarroako gizarteko hainbat alorretan normaltasun giroa ezartzeko anbizioa izan duela haren gobernuak. Halaber, nabarmendu du ziurtatuta dagoela gobernuaren egonkortasuna, nahiz eta tentsioak eta iritzi kontrajarriak izan diren Gobernua sostengatzen duten alderdi politikoen artean.

Ildo horretan, eskerrak eman dizkie Geroa Bairi, EH Bilduri, Ahal Duguri eta Izquierda-Ezkerrari "zorroztasunez, seriotasunez eta konfiantzaz" lan egiten ari direlako.

PSNri dagokionez, Barkosek adierazi du sozialistekin harremanetan izan direla "lehen unetik". "Ziur nago bidean zehar topo egingo dugula", zehaztu du.

Halaber, ukatu egin du EH Bilduk Nafarroako gobernu berrian pisu handia duenik eta gaineratu ez EH Bilduk, ez Geroa Baik, ez Ahal Duguk eta ezta Izquierda-Ezkerrak ere ez dutela pisu espezifikorik.

Imanol Haranbururen izendapenaren inguruan sortutako eztabaidaz galdetuta, Barkosek esan du ebazpena "agerikoa" izan zela. "(Gobernu egitura hau) formula positiboa eta operatiboa denaren erakusle izan da kasu hori", azpimarratu du. Ildo horretan, aitortu du bidean iritzi ezberdinak izango dituztela gobernua sostengatzen duten alderdien artean, baina argi eta garbi zehaztuta daudela alde bakoitzaren egitekoak. Gobernu hau akordio programatiko batean oinarrituta dago eta, zailtasun egoeretan ere akordioetarako tartea dago", gaineratu du.

Lehendabiziko 100 egunetan gobernuak hartutako neurriei dagokionez, Barkosek esan du hiritarren interes orokorrerako neurriak jarri dituztela mahai gainean, tartean, gizarte eskubideekin eta eredu ekonomiko eta produktiboarekin loturiko "larrialdizko" neurriak.

Bestalde, Uxue Barkosek nabarmendu du neurriak hartu dituztela Nafarroa estatu espainiarraren barruan eta handik kanpo birkokatzeko, eta adibide gisara jarri du Nafarroa Euskadi-Akitania eskualdean sartzeko egindako eskaera.