EAJ "pozik" dago krisiaren aurkako neurriekin, baina "ez da nahikoa", EH Bilduren ustez

EAJk eta EH Bilduk oharra zabaldu dute Espainiako Gobernuak Ekialde Hurbileko gerrak eragindako ondorio ekonomikoak arintzeko asmoz hartutako neurrien inguruan. Ezohiko Ministroen Kontseiluak lehen neurri sorta bat onartu du ostiral honetan, bi dekretu adostuta: bata, krisiari aurre egiteko neurriei buruzkoa, eta bestea, etxebizitzari buruzkoa.

Testuinguru horretan, EAJ "pozik" agertu da euren eskaerei erantzun dietelako; izan ere, "familiek eta autonomoek ez dituzte krisi honen ondorioak ordaindu beharko". Jeltzaleek azpimarratu dutenez, “industria, Euskadiko ekonomiaren motorra eta milaka lanpostu sostengatzen dituena, ez da salbuespena, bereziki industria elektrointentsiboa”.

EAJk positibotzat jo ditu Gobernuak gaur onartutako neurriak, erregaien eta energiaren prezioak kontrolatzeko: "Gure ustez, Euskal Taldeak proposatutako 31 neurrien filosofiari jarraitzen dio, sektore jakin batzuetan, hala nola garraioan, industrian, abeltzaintzan eta arrantzan, zuzeneko laguntzekin eta ekimen fiskalekin jardutea bilatzen baitute".

Jeltzaleen arabera, neurri horiek "elektrizitatearen eta erregaien azken prezioa familientzat eta autonomoentzat eskuragarriagoa izaten lagunduko dute". Hala, Ekialde Hurbileko gatazkak herritarrengan duen eragina murriztea dute helburu. 

Etxebizitzari buruzko neurriak jasotzen dituen bigarren dekretuari edo enpresen marjinen gaineko kontrolei dagokienez, behin betiko testua oraindik ez dutela jaso adierazi dute jeltzaleek, eta, baloratu ahal izateko, lehenik irakurri eta aztertu egin behar dutela.

EH Bilduk, bere aldetik, positibotzat jo du Sanchezen gobernuari eskatu eta helarazi zizkion herritarren babeserako hiru neurri garrantzitsu jaso izana dekretuan: bonu sozial elektriko eta termikoa zabaltzea, oinarrizko horniduren mozketak debekatzea eta industria elektrointentsiboei bideratutako laguntza mekanismoa berreskuratzea. Horren iritzian, baina, "ez da nahikoa".

"EH Bildu ez dator bat, prezioen eta mozkinen igoera espekulatiboa eragotziko duten neurririk hartu gabe, zergen murrizketa orokorra egitearekin, horrek energia eta petrolio enpresa handien irabaziak handitzea baino ez baitu eragingo, Ukrainako gerraren bueltan egiaztatu genuen bezala. Ez ditzagun errepikatu dagoeneko huts egin duten neurriak", nabarmendu du koalizio abertzaleak.

EH Bilduren ustez, "ezinbestekoa da, ziurgabetasun eta babesgabetasun egoera honetan, aberastasunaren bidezko banaketa bermatzea". Horregatik, lanean jarraitzeko prest agertu da, "gizartearen gehiengoa, euskal industria eta gerrak gogorren jo dituen sektoreak babestuko dituen ezkutu sozial eta ekonomikoa lortzeko".

"Beharrezkoa da babes sozialean eta etxebizitzaren arloan neurriak hartzea: hala nola alokairuen kontratuak eta hipoteka kuota aldakorrak luzatzea, prezioak eta enpresen irabaziak mugatzea espekulazioa saihesteko, industriari laguntzea, iturri berriztagarrietan oinarritutako trantsizio energetikoa bultzatzea, eta enpresa handiak krisi honi aurre egitera behartuko dituen bidezko fiskalitatea sustatzea, gerraren ondorioak berriro ere klase herrikoien gain gera ez daitezen", gaineratu du EH Bilduk.

PPk ez du bere babesa ziurtatu nahi

PPk ez du bere babesa ziurtatu nahi izan krisiaren aurkako dekretuari Kongresuan; izan ere, adierazi duenez, bere "proposamen guztiak" jasotzen badira bakarrik bozkatuko dute Ekialde Hurbileko gerrak eragindako ondorioak arintzeko dekretuaren alde.

Hala, Miguel Tellado PPko idazkari nagusiak baieztatu duenez, Talde Popularrak ez du etxebizitza neurriei buruzko "ezkerreko" lege dekretua babestuko, eta "sakon" aztertuko du krisiari aurre egiteko neurriak biltzen dituenarekin zer egin.

"PPk Espainiako Gobernuari bermatu ziezaiokeen aldeko boto modu bakarra dekretu bat zen, Talde Popularrak duela bi aste erregistratutako legez besteko proposamenean jasotako neurri guzti-guztiak jasotzen zituena, beste proposamenik jaso gabe", gaineratu du PPk.

Krisiaren aurkako plana ez dela eraginkorra salatu du Podemosek 

Irene Monterok kritikatu du Espainiako Gobernuak onartutako dekretuan jasotako "neurriak ez direla nahikoak ezta eraginkorrak ere". Monterok ohartarazi duenez, bere taldearen aldeko bozka Kongresuan ez dago ziurtatuta, eta soilik baliagarria da elikagaien eta energiaren prezioak mugatzen laguntzeko.

"Uste dut neurriak ez direla nahikoak ezta eraginkorrak ere, PPk proposatzen dituen neurriak dira. Argi eta garbi esaten dut: Podemosen aldeko bozka kontuan hartu nahi badute, Espainiako Gobernuak alokairu-merkatuan esku hartu behar du eta elikagai, energia eta premia biziko produktuen prezioak mugatu", azpimarratu du Monterok.