PSOEk eta Sumarrek bi dekretu adostu dituzte, krisiari aurre egiteko neurriak eta etxebizitzaren ingurukoak jasotzeko

Espainiako Gobernuko kideen artean tentsio handiko orduak izan dira ostiral goizekoak, baina PSOEk eta Sumarrek desadostasunak gainditu dituzte eta Ministroen Kontseiluaren bilera akordioa adostuta amaitu dute azkenean. 

Irango gerrak sortu duen krisiari aurre egiteko neurrien inguruko dekretua  jorratu behar zuen ezohiko Ministroen Kontseilua atzeratu egin da, Sumarreko kideek uko egin baitiote bilera gelan sartzeari, alokairuko kontratuen luzapena eta enpresen marjinak kontrolatzeko neurriak dekretutik kanpo uzten ziren bitartean. 

Ministroen Kontseilua 09:30ean zen hastekoa, baina bi ordu pasako atzerapenarekin hasi da azkenean. Tarte horretan, aurrez aurre aritu dira negoziatzen Pedro Sanchez Espainiako gobernuko presidentea eta Yolanda Diaz Sumarreko buru eta bigarren presidenteordea. Antza, elkarrizketa horiei esker lortu dute azken orduetan tenkatutako negoziazioetan aurrera egitea. 

Azkenik, Sumarreko iturrien arabera, bi dekretu onartu dituzte: bata, erregaien, gasaren eta elektrizitatearen gaineko beherapenak eta neurri fiskalak jasoko dituena, Sumarrek eskatuta enpresen marjinak mugatzeaz gainera, eta, bestea, alokairuko kontratuen luzapena barne hartuko duena (negoziazioetan beste oztopo nagusia zen). 

Lehenengoan sartuko diren neurrien artean, erregaien gaineko zerga % 10era jaistea dago, bai eta elektrizitatearen gaineko zergak murriztea eta baita beste neurri batzuk ere, hala nola bonu sozial elektrikoa handitzea. Gainera, energia-iturrien hornidura etetea debekatzen du.

Bigarren dektretuak Sumarrek eskatzen zituen etxebizitzari buruzko ekimenak jasotzen ditu, besteak beste aurten iraungiko diren 600.000 errenta-kontratuak automatikoki luzatzeko. Hala ere, Sanchezek aurreratu duenez, gaur-gaurkoz ez dago dekretu hau baliozkotzeko gehiengorik Kongresuan. 

Sanchez: "Ezohiko egoerek ezohiko erantzunak eskatzen dituzte"

Pedro Sanchez Espainiako Gobernuko presidentearen hitzetan, Irango gerrak izango duen eragin ekonomikoa arintzeko planak 80 neurri jaso eta 5.000 milioi euro bideratuko ditu "herritarrak babesteko, eta enpresa txiki eta ertainei, lehen sektoreari eta, jakina, industriari laguntzeko".

"Ezohiko egoerek ezohiko erantzunak eskatzen dituzte, eta hori da Ekialde  Hurbileko krisiari erantzuteko plan integral honek jasotzen duena", esan du Espainiako gobernuburuak komunikabideen aurrean, Ministro Kontseiluaren ostean egindako agerraldian.

Sanchezen arabera, Ekialde Hurbilean piztutako "legez kanpoko gerra" mundu mailako lurrikara ekonomiko baten lehen dardarak eragiten ari da, eta herritarrak dira lurrikara hori sumatzen lehenak, esaterako autoa hartzen duten bakoitzean, erregaien prezioen igoera jasaten hasiak baitira, horren hitzetan. 

"Inork ez daki norantza doan egoera eta nola eboluzionatuko duen krisiak. Ez dakigu gatazka honek zenbat iraungo duen; egunak, hilabeteak edo urteak izango diren. Eraginen neurriaren arabera, ondorioei eutsi ahal izango zaie edo krisi larri bilaka litezke", adierazi du.

Sanchezek esan duenez, Lehiaren Merkatuen Batzorde Nazionalari gainbegiratze- eta zigortze-gaitasun berriak emango zaizkio, "krisi hau nahiz Estatuak emandako dirulaguntzak euren burua aberasteko aprobetxatzen dituen edozein enpresa jazarri eta gogor zigortzeko".

Helburua da laguntzak benetan erabilgarriak izatea, eta "zergadunen ahaleginetik ateratzen den plan honetako euro bakoitza beraiengana itzultzea osorik". "Onartuko ez duguna da inork gerra honen lepotik aberastu nahi izatea", azpimarratu du.

Sumar, pozik

Sumarrek esan du pozik daudela nahi zituzten hainbat neurri sartu dituztelako, batez ere enpresen marjinak kontrolatu eta alokairuak luzatzeko; izan ere, gaur goizean Kontseilua egin aurretik mahai gainean zegoena zergak jaisteko dekretu hutsa zen. "Orain oso bestelakoa da egoera", esan dute, pozik.

Monica Garcia Osasun ministroak esan du Ministroen Kontseiluan "alokairuen luzapena eta enpresen marjinen kontrola gehituz ezkutu soziala handitzeko" adostasuna lortu dutela.

"Gerra bidegabe eta immorala honen ondorioak arintzeko laguntzez gain, indarrean izango dira maizterrak babesteko neurriak eta espekulazioa blokeatzeko neurriak, prezioen marjinena kasu", gaineratu du.

EAJ "pozik" agertu da, baina EH Bilduren ustez, "ez da nahikoa"

EAJk eta EH Bilduk ohar bana zabaldu dute hartutako neurrien berri izan ondoren. EAJ "pozik" agertu da euren eskaerei erantzun dietelako; izan ere, "familiek eta autonomoek ez dituzte krisi honen ondorioak ordaindu beharko".  "Gure ustez, Euskal Taldeak proposatutako 31 neurrien filosofiari jarraitzen dio sektore jakin batzuetan", gaineratu du EAJk.

Bestalde, EH Bilduk positibotzat jo du Sanchezen gobernuari eskatu eta helarazi zizkion herritarren babeserako hiru neurri garrantzitsu jaso izana dekretuan: bonu sozial elektriko eta termikoa zabaltzea, oinarrizko horniduren mozketak debekatzea eta industria elektrointentsiboei bideratutako laguntza mekanismoa berreskuratzea. Horren iritzian, baina, "ez da nahikoa".

PPk ez du bere babesa ziurtatu nahi, eta Podemosek esan du ez dela eraginkorra

PPk ez du argitu nahi izan krisiaren aurkako dekretuak Kongresuan bere babesa jasoko duen, baina, adierazi duenez, bere "proposamen guztiak" jasotzen badira bakarrik bozkatuko dute Ekialde Hurbileko gerrak eragindako ondorioak arintzeko dekretuaren alde.

Irene Monterok, bere aldetik, kritikatu duenez, Espainiako Gobernuak onartu duen dekretuan jasotako "neurriak ez dira nahikoak, ezta eraginkorrak ere". Monteroren arabera, bere taldearen aldeko botoa ez dago ziurtatuta, eta dekretu horrek elikagaien eta energiaren prezioak mugatzen laguntzeko baino ez du balioko.