CUPek Kataluniarako erabakigarria den Batzar Nagusia dauka gaur

Kataluniako etorkizunerako erabakigarria izango den Batzar Nagusia egingo du CUPek igandean; 3.577 lagunek hartuko dute parte asanbladan, eta erabaki beharko dute ea Artur Masi inbestiduran babesa emango dioten ala ez. Igandean erabakitakoak eragin handia izango du Kataluniako politikan; izan ere, baliteke ondorengo egunetan presidentea izatea, eta, halaber, baliteke ere hauteskundeak berriro deitu behar izatea.

Alderdi independentistetako ordezkariek Eguberri Egunean egiten den lore-eskaintza aprobetxatu zuten CUPi babesa eskatzeko. Hain zuzen, Francesc Macia errepublika garaiko Kataluniako presidentearen hilobiaren aurrean egin zuten ekitaldia.

Artur Mas jarduneko presidenteak, aldiz, ez zuen CUPen Batzar Nagusiaren gainean hitz egin: "CUPek bere hausnarketa egin behar du, eta erabakia inoren interferentziarik gabe hartu behar du; batez ere, nire interferentziarik gabe. Egin ahal dudan onena da gaiaren gainean ez hitz egitea; izan ere, nik esaten dudana txarto ulertu ahal da".

CDCko koordinatzaile nagusi Josep Rullek, hauteskunde orokorretan ERCko zerrenda-buru Gabriel Rufianek eta Kataluniako Parlamentuko presidente Carme Forcadellek, berriz, hitz egin dute gaiari buruz. Forcadellek esan du uste duela CUP "bizi garen garai historikoaren parean" izango dela, eta "Urte Berriak Kataluniarako presidente berria" ekarriko duela. Forcadellek erantsi du presidentea Artur Mas izango dela, "proposatutako hautagai bakarra da-eta".

"Badago Katalunian atsotitz bat, honela esaten duena: 'Inoiz ez utzi ikusten duzuna ikusten ez duzunagatik'; badugu ikusten den aukera bat, eta ezin diogu utzi ihes egiten", nabarmendu du.

Josep Rull CDC koordinatzaile nagusiak ere eskatu dio CUPi "garai historiko honi probetxua ateratzeko"; izan ere, Kataluniako herritarrek "aukera handia" dute aurrerako pausoa emateko. Rullek berretsi du beharrezkoa dela independentisten batasuna, eta orain lehentasuna dela kataluniarrek eurek erabakitzeko aukera izatea. "Zein herrialde-eredu dugun eztabaidatzea, Madrilek gobernatu egiten duenean, keinu antzuak dakartza", azpimarratu du.

Gabriel Rufian ERCko diputatuak adierazi du espero duela CUPek erraztea akordioa; hain zuzen, une honetan "ez dute partida bat irabazi behar, baizik eta herrialde oso bat".

CUPeko ehun zinegotzik "eskuzabaltasuna" eskatu dute, Junts pel Sirekin ituna egiteko

CUPeko ehun bat alkatek eta zinegotzik agiri bat plazaratu dute, non eskatzen duten "eskuzabaltasuna, malgutasuna eta enpatia", alderdiak adostasuna egiteko Junts pel Sirekin. Horrela, Kataluniak gobernua izango luke, eta martxoan ez leudeke berriro hauteskundeak.

Sabadellen egingo duten Batzar Nagusirako orduak falta direnean, zinegotziek "Independentziarantz, atzerako pausorik ez" agiria sinatu dute. Bertan ohartarazten dute ondorio negatiboak izango lituzkeela Junts pel Sirekin akordiorik ez lortzeak.

SCCk enpresari eta enbaxadoreei azaldu die nolakoa den Masek Espainia suntsitzeko duen plana

Bestalde, Societat Civil Catalana erakundeak (SCC) gutuna bidali die 150 enpresari, enbaxadore eta iritzi-emaileri, xede izanik ohartaraztea Katalunian "Estatua suntsitzeko plana dagoela zehaztuta". Artur Masek babesten du, SCCren iritziz, plan hori; izan ere, CUPi eskaini dion inbestidura-akordioak "Espainia suntsitzen du".

Rafael Arenas SCCko presidenteak sinatutako gutunak atxikita du Junts pel Sik CUPi helarazitako proposamena. Gaztelaniara itzulita dago eta paragrafo batzuk horiz nabarmenduta daude, "larrienak" direlakoan.

"Societat Civil Catalanakoak kezkatuta gaude egoera politikoarekin. Desafio sezesionistak erakusten du, gure iritziz, guztiok elkarrekin lan egin behar dugula gure herrialdearen egonkortasuna eta aurrerabidea lortzeko", dio Rafael Arenasek gutunean. Efek ikusi ahal izan du testua.

SCCk enpresa, ekonomia, komunikabide eta nazioarteko politikako munduetako esku handiko 150 pertsonari gogorarazi dienez, "desafio sezesionista" Kataluniako Parlamentuak azaroaren 9an adostutako ebazpenean oinarritzen da. Auzitegi Konstituzionalak deuseztatu zuen gerora, eta aurreikusten zuen enbaxadak sortzea, Kataluniako ogasuna, funtzionarioen transferentzia eta errepublika kataluniarra sortzeko gainerako neurriak.