Torrent inbestidura prestatzeko bilera sorta telefonoz egiten ari da

Generalitateko presidentearen inbestidurarako hautagaia bilatzeko bilera sorta telefonoz egiten ari da Roger Torrent Parlamenteko presidentea, Parlamentuko iturriek jakitera eman dutenez.

Bitartean, Junts per Catalunyak (JxCat), ERC eta CUP ostegun honetan inbestidura saioa egiteko aukera negoziatzen ari dira, Jordi Turullen izena mahai gainean dagoela. Horrela, auzipetzeen berri emateko, Pablo Llarena Auzitegi Goreneko epaileak ostiralerako deitu duen agerraldiari aurrea hartu nahi diote.

Ordu batzuk lehenago, Torrentek azaldu duenez, gaur goizean jaso du Parlamentuak Jordi Sanchezen erabakia -Generalitateko presidentegai izateari uko eginez- eta, hortaz, bihar bilera-sorta berria abiarazi behar zuen alderdiekin, inbestidurarako beste hautagai bat adosteko asmoz. Hala, egoera "behin betiko desblokeatzea" da helburua, inbestidura saioa "datozen egunotan" egiteko.

Bere bulegotik egindako agerraldi batean, Torrentek Sanchezen "eskuzabaltasunaren keinua" goraipatu du, baina, era berean, kritikatu egin du hautagaia izateko aukeratik ez izatea, Auzitegi Gorenak aske uztea eta Ganberara joateko baimena ukatu ondoren.

Horren ildotik, "Estatuaren esku-hartze bidegabeak, eta demokraziaren aurkakoak", deitoratu ditu, eta ziurtatu du zigor gaberik ez geratzeko lanean jarraituko duela. Gainera, Parlamentua Pablo Llarena Auzitegi Gorenaren epailearen aurka kereila bat aurkeztea ikertzen ari dela gogorarazi du.

Era berean, Estatuari dagokionez, "izaera politikoa duten arazoei aurre egiteko gaitasun falta" kritikatu du, eta "inboluzio demokratikoa eragin eta Zuzenbide Estatua arriskuan jartzea" egotzi dio. Horrez gain, "urrats irmoak eta eraginkorrak" izatea eskatu du, "agindu demokratikoei erantzun eta aurrera egin ahal izateko".

Torrentek "zorroztasuna, zintzotasuna eta errespetua" eskatu, eta, halaber, penagarritzat jo du "egoeraz baliatzea erakundea kaltetzeagatik, alderdikeriak" bultzatuta.

"Parlamentuaren  gehiengoak proposatu ez duen izena nik proposatzea eskatzen dutenek hautetsontziek emandako agindua ez betetzea nahi dute. Hau ez da gertatu, eta ez da gertatuko. Inbestidurarako hautagai bat galarazi nahi denean, diputatu gisa dituen eskubideak eta horren hautesleenak urratu, eta hiritarren bozkatzeko eskubidea ere urratzen da, bozkatzen duena bozkatzen duela", ohartarazi du.

Horregatik, azaldu duenez, proposatu zuen Jordi Sanchez, aurreko bilera sortan -Puigdemonten inbestidura bertan behera geratu ostean-  "proposatu zuten hautagai bakarra izan baitzen, eta botoak batu zitezkeen bakarra".

Torrenten agerraldia baino lehen, Jordi Pina abokatuak aurreratu du Jordi Sanchezek Generalitateko presidente izateari uko egiteko erabakia helarazi diola "behar zionari".

Sanchezen asmoa atzo ezagutu zen, Auzitegi Gorenean egin zuten saioan, berak atxiloaldiaren aurka jarritako helegitea aztertzeko. Orduan, abokatuak esan zuen Sanchez ez dela inoiz politikan egon, irakaskuntzan baizik; eta, horretara itzuliko litzatekeela, berak nahi duen gauza bakarra askatasunean egotea baita, bere alabak besarkatzeko; eta ondorioz, politikari uko egin behar badio, egingo duela esan zuen.

Bestalde, Auzitegi Goreneko Fiskaltzak Jordi Sanchez espetxean mantentzea eta Joaquim Forn Barne kontseilari ohia fidantzapean aske uztea eskatu zuen.