Lehendakariak Euskadirentzako botere judizial propioa aldarrikatu du

Iñigo Urkullu lehendakariak Euskadirentzako botere judizial propioa aldarrikatu du, "berezko arauak interpretatu eta aplikatzeko", eta "bermeen aldebiko erregimena, Estatutua, onartu eta berretsia, berme demokratiko eta juridiko guztiekin betetzen dela bermatuko duena".

Lehendakariak euskal autogobernua "eguneratzea eta sakontzea" eskatu du, duela 43 urte Gernikako Estatutua onartu zenean "existitzen ez ziren eta imajinatu ere egin ez ziren" alderdiak barneratzeko, eta Euskadin botere judizial propio baten alde egin du. "Ezin dugu gutxietsi norberaren arauak interpretatzeko eta aplikatzeko botere judizial propioa izatearen garrantzia", gaineratu du.

Urkullu, Gobernantza Publiko eta Autogobernuko sailburu Olatz Garamendirekin batera, Bilboko Euskalduna Jauregian izan da gaur goizean, Gobernantza Publiko eta Autogobernu Sailak antolatutako "Euskal Autogobernua: Orain eta bihar" jardunaldian.

"Estatutuaren itunean aurrera egin dugu, baina gehiago aurreratu behar genuen", adierazi du lehendakariak irekiera hitzaldian. Izan ere, "gure Estatutua bete gabe dago oraindik, eta politika propioak diseinatzeko gaitasuna murrizten jarraitzen du".

Bere hitzaldian, Urkulluk adierazi du autogobernuak "adostasun orokorra" biltzen duela Euskadin, eta "gizartearen gehiengoaren topagune" bihurtu dela, "identitatea zaintzeko, ongizatean eta bizikidetzan aurrera egiteko eta komunitate politiko bereizi bat eraikitzeko modu bat islatzen duelako".

Lehendakariak gogorarazi duenez, joan den irailaren 22an, Eusko Legebiltzarreko Politika Orokorrari buruzko Eztabaidan, "beste behin ere, Espainiako Gobernuak urtarrilean onartu zuen egutegia betetzea" eskatu zuen, eta 2020ko urriaren 14an eguneratuta bidali zion Eusko Jaurlaritzari.

Ildo horretan, "konfiantza-froga" gisa aldarrikatu zituen hiru bultzada politiko zehatz ekarri ditu gogora: trenbideen arloko transferentziaren negoziazio irekia berehala burutzea; aldebiko lantaldeak berehala irekitzeko agindua ematea, Eusko Jaurlaritzak igorritako eskualdatze-proposamenak negoziatzeko; eta bi gobernuen arteko Batzorde Iraunkorra deitzea, Espainiako Gobernuak bidalitako egutegiaren arabera, egiteke dauden gainerako eskumenak egokitzeko moduak eta oinarriak lantzeko eta ezartzeko.

Urkulluk esan du hiru eskari horietako bat ere ez dela bete, eta "bat bakarrik" dagoela "negoziazio bidean". Gainera, adierazi du ez duela jaso Espainiako presidentearen erantzun instituzional formalik.