Euskadik eta Kanariek elkartasuna eta erantzunkidetasuna eskatu dute adingabeen banaketan

Euskadik eta Kanariek "elkartasuna eta lurralde-erantzunkidetasuna" modu eraginkorrean ezartzea eskatu dute, migrante adingabeen banaketa "orekatua, koordinatua eta zuzena" aplikatzeko. Egoera "dramatikoa" dela azpimarratu dute eta Kanarien kasuan, "sostengaezina". Testuak txosten ekonomiko bat planteatzen du, ezohiko banaketa bermatzeko.

Imanol Pradales lehendakariak eta Fernando Clavijo Kanarietako presidenteak proposamena helarazi diete gainontzeko Erkidego Autonomoetako presidenteei, inoren kargura ez dauden adingabeen atentzioa bermatzeko, eta Kanarietako "baliabideetan sortzen ari den tentsioa" lasaitzeko. 

Testuan premiazkotzat jotzen da "solidaritatea eta lurralde-erantzukidetasuna modu eraginkorrean aplikatzea, ordenamendu juridikoan jasota dagoen bezala". Kanarietako eta Euskadiko gobernuek defendatzen dutenez, "Espainiako Gobernua eta autonomia-erkidegoetako gobernuak lotzen dituen printzipioa eta betebeharra da", eta "inoren kargura ez dauden adingabeen oinarrizko premiak eta oinarrizko eskubideak betetzen direla bermatzea" du helburu.

Kanarietako eta Euskadiko gobernuek beren proposamenean defendatzen dutenez, Espainiako Gobernua da "adingabeen banaketa ekitatiboa modu eraginkorrean sustatzeko ardura duena, modu aktiboan lankidetzan arituz eta dagozkion baliabide materialak eta ekonomikoak emanez". Horrela, bi lurraldeek "adingabeek beren beharretara eta eskubideetara egokitutako ingurune seguru baterako sarbidea izatea bermatu" nahi dute, eta horiek Espainiako eta Europako funtsekin eta Gizarteratze, Gizarte Segurantza eta Migrazio Ministerioen koordinazioarekin finantzatzea eskatzen dute.

Kanariak-Euskadi proposamenaren ardatzak

Kanarietako eta Euskadiko gobernuek lankidetza-hitzarmen bat proposatu dute "berehala" aplikatu beharreko lau kudeaketa-eremutako migrazio-kudeaketari buruz. Lehenengoa Migrazio Plan Estrategiko bat da, plangintzatik abiatuta hainbat agertokiren aurreikuspena, ebaluazio-adierazleak eta memoria ekonomiko erreala jasotzen dituena.

Planari Euskadi iparraldeko mugatzat hartzea gehituko litzaioke, Frantziako Estatuak azaroaren 1ean ezarritako muga itxi ondoren, "bidean diren pertsonei duintasunez arreta emateko diru-zuzkidura handiagoarekin" batera.

Ezohiko eta premiazko banaketa

Joan den abenduko Lehendakaritzen Konferentzian mahaigaineratu zuten bezala, bi gobernuek planteatu dute ezohiko neurria gehienez hiru hilabeteko epean aplikatu beharko litzateke, dagokion figura juridikoarekin. Berehala, Haurren Konferentzia Sektorialak etorkizunean aplikatu beharreko banaketa-koefizienteei buruzko eztabaida lasaiagoa izan dezala planteatu dute

Clavijo eta Pradales buru dituzten exekutiboek defendatutako proposamenak, gainera, epe ertain eta luzerako neurriak hartzeko beharra jasotzen du, hala nola "jatorrizko herrialdeekiko lankidetza". Era berean, jatorrizko herrialdeetan abian diren proiektu pilotuei buruzko informazioa trukatzeko kanalak ezartzea eskatzen da, Kanarietako gobernuak Senegalen zuzentzen duen "Tierra Firme" proiektuari buruz, esaterako.