Ortuzar: "Bi hautagaitza aurrez aurre egonda Alderdiaren barruan zatiketa izateko arriskua handia litzateke"

EAJren Euzkadi Buru Batzarra (EBB) berritzeko prozesua abiatu zenean inork gutxik aurreikusi zuena gertatu da. Andoni Ortuzar EBBko egungo presidenteak uko egin dio lehian jarraitzeari, eta lehen itzulia amaituta, lasterketatik erretiratu egingo da. "Euzkadi Buru Batzarreko lehendakaritzarako barne-prozesuaren bigarren itzulira ez pasatzea erabaki dut. Luze pentsatutako erabakia da". Horrela hasten da erabakiaren berri emateko  'Batasuna da indarra' goiburupean militantziari sare sozialen bidez zuzendutako gutuna.

Lehen itzuliko emaitzak ikusi ondoren egindako gogoetak eraman du Ortuzar erabakia hartzera, EAJn "berritzeari tokia" uzteko. "Emaitzak ikusita, uste dut berriro aztertu behar dudala nire jarrera eta nire barru-barruko lehen uste sendora itzuli, hau da, berritzeari tokia uztea, berritzeari paso ematea", esan du, hitzez hitzez.

_______________________________________

PROFILA: EAJren arkitektoa, aro garaikidean

_______________________________________

Joan den igandean amaitu zen EAJren zuzendaritza berritzeko prozesuaren lehen itzulia, ustekabekoarekin amaitu ere. Ortuzar jeltzaleen egungo presidentea eta Aitor Esteban EAJk Espainiako Kongresuan duen eleduna berdinduta iritsi dira aurreneko fasearen amaierara Bizkaian —lurralde guztietako botoak zenbatuta, Ortuzar aurretik dago—, eta bi horiekin batera, Markel Olano Gipuzkoako diputatu nagusi izandakoak eta egun legebiltzarkide denak ere badu bigarren itzulirako aukera, batez ere, Gipuzkoako batzokiek eman dioten babesagatik.

Ortuzarren arabera, "beste hautagaitza bat sortu da anbizio nahikoarekin EBBko presidentetza gidatzeko" eta "arduragabekeria" litzateke bera bigarren itzulira pasatzea,  "Alderdiaren barruan zatiketa izateko arriskua" legokeelako. Hala, ziurtatu du "Alderdian eta haren etorkizunean" pentsatuta hartu duela atzera egiteko erabakia. Iritzi dio hau dela "bigarren itzuliko prozesua ahalik eta ondoen" egiteko bidea. "Elkartzeko unea da, eta hori da nik orain sustatu behar dudana. Batasuna da indarra".

Militantzari, eskerrak

Prozesua abian jarri zenetik "atxikimendu pertsonala" eta "babesa" azaldu dioten militanteei eskerrak eman dizkie, eta "erabakia ulertzea" eskatu die. Erantsi duenez, "lehen itzulian babes gehien jaso duen hautagia" bera den arren, "militantziaren zati txikiago baina esanguratsu batek aldaketa" sustatu du.

EBBko buru izaten jarraitzeko zuen asmoaren berri emanez militantziari urtarrilaren 18an igorritako gutuna ekarri du gogora Ortuzarrek, eta argitu du "konbentzitu" egin zutela erabaki hura hartzera. Bere hasierako jarrera "aldeketaren aldekoa" zela azaldu du, "bi pultsio" zeudela jabetuta: "Alde batetik, erabateko berrikuntza aldarrikatzen zutenak, EBBko presidentearen figura barne; eta, bestetik, gaur egungo presidentziari eustea onena zela uste zutenak, orain arte izandako aldaketek behar duten denbora izan dezaten (...) Baina konbentzitu egin ninduten, eta konbentzitu egin nintzen, beste agindu bat emateko aurkeztu behar nuela nire burua, militantziak hala nahi izanez gero".

Horiek esanda, militantziari eskatu dio "lehen itzulian baino gogotsuago" har dezala parte bigarren bueltan, "EBB kohesionatu eta indartsu bat atera dadin, hurrengo urteetan garatu behar duen eginkizun garrantzitsua bere gain hartzeko gai izango dena".

"Ohorea"

EBB zuzentzeko ardura izango duen hurrengo alderdikideari, berriz, "zorte ona" eta erabakietan "asmatzea" opa dio, jeltzaleek egun duten "ordezkaritza instituzionalaren maila altuari" eutsi ahal izateko. Helburu horretan bere "laguntza" eta "babesa" izango dituela ere helarazi dio.

Hamabi urtez jeltzaleen presidente izatea "ohorea" izan dela, "zoriontsu" izan dela eta "oso maitatua" sentitu dela esanez amaitu du idatzia .

EAJren barruan mugarri izango den erabaki hau hartuta, Aitor Estebani bidea libre utzi dio Ortuzarrek.