Jaurlaritzan "alde bakarrez" aritzea egotzi dio Anduezak EAJri, eta koalizioan jarraitu nahi duen galdetu

Eneko Andueza PSE-EEren idazkari nagusia oso kritiko azaldu da EAJ gobernukidearekin, eta Jaurlaritzaren baitan "alde bakarrez eta desleial" jardutea egotzi dio, bi alderdiek gai jakin batzuen kontura izan dituzten desadostasunak direla eta. "Ez dakit gurekin gobernuan jarraitzeko gogotsu dauden", erantsi du. Horren harira, izan ditzaketen talka horiei buruz "berba egiteko eta adosteko" eta "zintzotasunez eta leialtasunez" aritzeko deia egin du. Giro honetan, ohartarazi duenez, EH Bildu da "etekina ateratzen duen bakarra".

ETBko "Egun On" saioan elkarrizketatu dute Euskadiko sozialisten buruzagia, eta azken egunotan, migrazioaren kontura bazkideek izan duten ika-mikaz galdetu diote. Anduezak aitortu du "sorpresaz hartu" zituela Imanol Pradales lehendakariaren adierazpenak —"behar dugun" eta "iristen ari den" migrazioaren inguruko gogoeta egitea eskatu zuen joan den astean—. Are zorrotzago mintzatu da Joseba Diez Antxustegik esandakoen aurrean —"migrazio selektiboa" defendatu zuen hark— eta "arrazistatzat" jo ditu.

Horrez gain, ukatu egin du gobernu bileran ez zela migrazioari buruz hitz egin. "Bozeramaileak atzo esan zuen gai horren inguruan ez zela berba egin, baina ez da egia (...). Bi sailburuk, lehendakariordeak eta beste sailburu sozialista batek, hitz egin zuten migrazioari buruz. Ez dut ulertzen batzuek zer nolako gogoa duten elkargunetik irteteko", salatu du.

Anduezak gogora ekarri duenez, EAJk eta PSE-EEk gobernu akordioa dute izenpetuta, eta bertan Jaurlaritzaren "posizio politikoak edo elkarguneak" zehazten dira; "horiek bete egin behar dira", azpimarratu du. "Batzuek posizio politiko horietatik ateratzen badira Euskadiko sozialistak ez gara isilduko eta gure posizioa defendatuko dugu", argitu du.

Buruzagi sozialistaren aburuz, "azkenaldian" jarrera hori izan dute lehendakariak berak AHTa dela eta, eta Juan Ignacio Perez Iglesiasek Unibertsitate dekretuaren harira. Anduezak salatu du Perez Iglesiasek "bere kabuz, bere posiziotik eta gobernukidearekin hitz egin barik" adierazi zuela dekretuaren kontrako iritzia. "Hori ez da gobernuaren posizioa eta nik hori publikoki azaldu behar dut", nabarmendu du. 

EAJk, erantzun: "Ez gara probokazioetan sartuko"

Anduezaren adierazpenei erantzun diete EAJren EBBko iturriek. Nabarmendu dutenez, buruzagi sozialistaren adierazpenak "bidegabeak" izan dira, "hitz laidogarriak erabili baititu". Hori horrela, adierazi dute ez direla "probokazioetan" sartuko. EAJren iritzian, Anduezaren esanek "urduritasuna baino ez dute erakusten, berak jakingo du zergatik".

Argitu dutenez, "EAJk behintzat ez du Gobernu koalizioa zalantzan jartzen", eta Eneko Anduezari leporatu diote "leialtasun eza edo mesfidantza terminoak erabili" izana.