Santos Cerdan behin-behinean espetxera bidali du Auzitegi Gorenak

'Koldo auzia'ren instrukzioa egiten ari den Auzitegi Goreneko epaileak behin-behinean eta fidantzarik gabe kartzelara bidali du Santos Cerdan PSOEko Antolakuntza idazkari ohia, obra publikoak esleitzearen truke komisioak kobratzea egotzita. Leopoldo Puente instrukzio epaileak hainbat delitu leporatu dizkio: talde kriminaleko kide izatea, eroskeria eta influentzia trafikoa.

PSOEko buruzagi ohia Madrilgo Soto del Real presondegian espetxeratu dute dagoeneko. Auziko iturriek jakitera eman dutenez, PSOEko Antolakuntza idazkari eta diputatu izandakoa 17:00ak baino lehentxeago iritsi da kartzelara, Guardia Zibilaren furgoi batean.

Deklarazio hartu ondoren, Fiskaltzaren eskaria aintzat hartu du magistratuak, eta espetxeratzeko agindua eman du, delitua egin izanaren "hainbat zantzu" daudela iritzita. Cerdani ezarri dio, beraz, orain arteko neurri gogorrena auzi honetan. Jose Luis Abalos ministro ohiari eta Koldo Garcia aholkulari izandakoari Espainiatik ateratzeko debekua ezarri zien. 

"Paper nagusia"

Epaileak argudiatu du Cerdanek "probak ezkutatu, moldatu eta suntsitzeko arriskua" dagoela. Oraindik, ikertzaileek ez dituzte haren etxibizitza eta bulegoa miatu, UCOk agindua emana badu ere. Abalosen eta Garciaren kasuan, berriz, miaketak eginak dituzte. 

PSOEren Antolakuntza arduraduna izandakoak ustezko ustelkeria sarean zuen zeregina nabarmendu du magistratuak. "Talde kriminala antolatu eta kudeatzea" leporatzen dio, Abalos eta Garciaren laguntzarekin. 

Zehatzago, Puenteren hitzetan, Cerdanek jasotzen eta banatzen zituen legez kanpoko eskupekoak. Bera omen zen enpresekin bitartekari aritzen zena. 

Deklarazioa

PSOEko hirugarrena zenak Auzitegi Gorenean ikertu gisa deklaratu du estreinakoz, Guardia Zibilaren UCO unitateak ustelkeria kasu horrekin lotzen duen txostena argitara eman eta PSOEn zituen kargu guztiak eta diputatu akta utzi ostean.

Epailearen aurrean, Cerdanek ukatu egin du obra publikoen legez kanpoko esleipenetan parte hartu eta horren truke komisioak kobratu izana. Halaber, auzi judiziala jazarpen politikoari egotzi dio, horren ustez, inbestidura EAJrekin eta EH Bildurekin negoziatzeagatik. 

Erreakzioak

Cerdanen espetxeratzearen albistea ezagutu berritan, "aukera bat" zela esan dute Moncloan. 

Gaineratu dute politika arloan lehen unetik jardun dutela eta, hortaz, epaia gorabehera, ez dela ezer aldatuko. 

Halaber, "albiste okerragoei aurre egiteko prest" daudela adierazi dute Moncloako iturriek. 

Espainiako Gobernuak erabaki du Cerdanek epailearen aurrean esandakoez baloraziorik ez egitea. Dena den, "oldar politikoa" zer den eta zer ez den bereizten duztela eta kasu horretan "ageriko frogak" daudela nabarmendu dute.