Espainiako Gobernuak migratzaileen erregularizazioa onartu du, baldintza gisa jarririk aurrekari penalik ez edukitzea

Milioi erdi migratzaile inguru ohiz kanpo erregularizatzeko Errege Dekretua onartu du eguerdi honetan Ministroen Kontseiluak. Testuak baldintza gisa jasotzen du aurrekari penalik ez izatea eta "ordena edo segurtasun publikorako mehatxu ez izatea". 

Hala azaldu du Elma Saiz Espainiako Gobernuaren bozeramaile eta Inklusio, Gizarte Segurantza eta Migrazio ministroak, Ministroen Kontseiluaren osteko prentsaurrekoan, eta argi utzi du "koherentzia etiko eta justizia sozialeko ekintza" dela erregularizazioa, eta legegintzaldi honetako "mugarri nagusietakoa".

Gogorarazi duenez, izapidea egiteko beharrizana dutenek apirilaren 16tik aurrera izango dute erregularizazioa telematikoki eskatzeko aukera, eta egun horretan bertan eskatu ahal izango dute hilaren 20tik aurrera prozesua aurrez aurre egiteko hitzordua. Bi bideetako edozein erabilita ere, ekainaren 30a izango da eskaera egiteko azken eguna. 

Prozesu horren bitartez Espainian bizi diren milaka lagun erregularizatu ahal izango dira, "gurekin bizi dira, gure seme-alabekin eskolara doaz, gure herriei eta gure kaleei bizia ematen diete, eta, gaurtik aurrera, haien eskubideez gozatu eta beren betebeharrak bete ahal izango dituzte", azpimarratu du ministroak.

Saizen ustez, erregularizazioak "zilegitasun hirukoitza" du; soziala —900 elkartek baino gehiagok eta 700.000 sinadurak babestutako herri ekimen legegilea izan zen abiapuntua—; politikoa —310 diputatuk babestu zuten hori aintzat hartzea—; eta ekonomikoa, "norabide horretan arraunean urteak daramatzaten" sindikatuek eta enpresariek, eta nekazaritza, eraikuntza eta garraio sektoreek babestu baitute. 

Bozeramaileak Estatu Kontseiluaren txostena azpimarratu du; izan ere, prozesua erregelamendu bidez egitea bermatzeaz gain, "positiboki baloratu ditu erregularizazioaren helburu orokorrak: gizarteratzea, segurtasun juridikoa eta irregulartasun administratiboa murriztea".

Erregularizazioa eskatu ahal izango dute 2026ko urtarrilaren 1a baino lehenagotik Espainiako Estatuan dauden eta eskaera egiten den unean gutxienez bost hilabetez jarraian Espainian egon direnek.

Gainera, ezinbestekoa izango da zigor-aurrekaririk ez izatea eta ordena eta segurtasun publikorako mehatxu ez izatea. 

Plan operatiboa

Prozesu horren zain jende asko dagoela ziurtatu ondoren, ministroak azpimarratu du ekimen horretan "lan eta maitasun handia" jarri dela, "prozesuak berekin dakarren erronkari erantzuteko".  

Horretarako, Estatu osoan 450 bulego egongo dira, eta 550 profesional estra prestatu eta gaituta egongo dira arreta emateko, eskaerak izapidetzeko, espedienteak aztertzeko, zuzenketak eta dokumentu berriak eskatzeko eta baimena ebazteko.

"Ondo ateratzea nahi dugu, zain eta muin aritu gara prozesu honetan", gaineratu du ministroak.