'Confebaskek ELA eta LABen akusazioak irmotasunez argitu behar ditu'

Juan Maria Aburto Eusko Jaurlaritzako Enplegu eta Gizarte Politiketako sailburuaren iritziz, "astakeria" da XXI. mendean norbaitek ELA eta LAB sindikatuak legez kanpo uzteko asmoa izatea, Confebaskena dela dioten dokumentu batean irakur daitekeenaren arabera. "Dokumentu hori benetakoa balitz, gobernu honek pentsatzen duenaren kontrakoa litzateke", gaineratu du.

"Sindikatuen borroka demokratikoa da herrialde honetan. Atsekabe asko eragin duten adostasunak badaude, urte askotako lanaren emaitza direnak, eta baten batek ezin du horiek errotik deuseztatzeko nahia izan. Ezohikoa eta oso larria iruditzen zait, beste garai batekoa dirudi eta onartezina da", gaineratu du.

Hori dela eta, "lehenbailehen argitu behar du irmotasunez zer gertatu den" gaiaren inguruan. "Nik ez dakit gertatu diren bi kontu horiez aparte deus: batetik, LABen webgunean Confebasken anagrama duen dokumentu bat zintzilikatu dute; eta, bestetik, Confebaskek ukatu egin du guztia", azpimarratu du.

Radio Euskadiri eskainitako elkarrizketa batean, gaiaz Confebaskekin elkarrizketa informalen bat izan duela aitortu du, eta bertako ordezkariek Confebasken jarrera ez dela hori helarazi diotela adierazi du. "Hori esatea ez dela nahikoa esan diogu patronalari; are gehiago, beharrezkoa dela irmotasunez hitz egitea eta dokumentuarekin zer gertatu den argitzea", nabarmendu du.

Sailburuaren esanetan, "gai garrantzitsu baten inguruan ziurgabetasuna sortu da eta beharrezkoa da irmotasunez jokatzea egoera argitzeko". "Gobernua elkarrizketa sozialeko hurrengo bileran gaia jorratzea pentsatzen ari da, hasiera batean aurreikusita ez bazegoen ere", gaineratu du.

Elkarrizketa soziala "lokaztu" du

Juan Maria Aburtok azaldu duenez, elkarrizketa soziala "futbol-partida bat dela imajinatuko bagenu, horrek jokalekua asko lokaztu duela esango genuke". "Horrek lehendik ere nahikoa lokaztuta dagoen agertoki edo jokalekua zaildu du; izan ere, dagoeneko nahikoa lohituta dago herrialdeko bi sindikatu nagusiak bertan parte hartzearen kontra agertu direlako", azaldu du.

Haren iritziz, "ulertezina dirudi baten bat elkarrizketa ukatzen jardutea. Gai horiek arrazoiak ematen dizkie posizio edo jarrera horiei, eta, horregatik, horrek egoera gehiago zaildu du".

Gobernuak elkarrizketa eta adostasuna bilatzeko egoerak bultzatzen jarraituko duela nabarmendu du, alor guztietan. "Alor sozioekonomikoan ere izaten ari dira", gaineratu du. Sailburuaren iritziz, Mahai Sozialaren hurrengo deialdian gaiari heldu behar zaio eta, hitz eginez, gaia konpondu.